«ەكسپو-2017 كورمەسى بۇكىل الەمنەن جانە قازاقستاننان كوپتەگەن تۋريستەردىڭ استاناعا كەلۋىن قامتاماسىز ەتۋى ءتيىس. كورمە قوناقتارى مەن كەلۋشىلەرىنە ىڭعايلى بولۋى ءۇشىن «ەكسپو-گيد» ۇتقىر قوسىمشاسى ازىرلەندى. وندا حالىقارالىق كورمەگە قاتىسۋشى ەلدەردىڭ پاۆيلوندارى گەولوكاتسيامەن كورسەتىلگەن. قوسىمشا كومەگىمەن كەز كەلگەن ادام كورمەنىڭ قاي پاۆيلونىنا قالاي بارۋ قاجەتتىگىن ءبىلىپ قانا قويماي مەيرامحانالار، تاكسي مەن اۆتوبۋستار، انىقتاما بيۋروسى قىزمەت تۇرلەرىن دە الا الادى. ايتا كەتەرلىگى، اتالعان قوسىمشانى استانانىڭ 10 جاسار وقۋشىسى ايمەن نۇرجان جاساپ شىعاردى»، - دەلىنگەن Inventor Academy مەكتەبى ءباسپاسوز قىزمەتىنىڭ حابارلاماسىندا.

ايمەن كىشكەنتاي كەزىنەن-اق ءىت-تەحنوولوگيامەن اۋەستەنەدى. ول «بولاشاق» پرەزيدەنتتىك باعدارلاماسى تۇلەكتەرىنىڭ كومانداسىمەن بىرگە قوسىمشا اۆتورى بولىپ وتىر. وقۋشىنىڭ اتاپ وتۋىنشە، قوسىمشا كورمە قوناقتارىنا «ەكسپو-2017» ەكستوناتتارىمەن كەڭىنەن تانىسۋعا مۇمكىندىك بەرەدى.

«كىشكەنتاي كەزىمنەن ادامدارعا قولۇشىن بەرەتىن وزىندىك دۇنيە جاساعىم كەلگەن ەدى. ەلىمىزدە ەكسپو-2017 سىندى اۋقىمدى شارا وتەتىندىگىن بىلگەننەن كەيىن وعان قاتىسقىم كەلدى. استاناداعى باعدارلاما جاساۋ مەكتەبىندەگى ۇستازدارىم ەكسپو-2017 ءۇشىن قوسىمشا جاساۋعا كومەكتەستى. ول وسى جازبا بىزگە قوناققا كەلەتىن بارلىق ادامدارعا پايدالى بولادى دەپ ۇمىتتەنەمىن»، - دەدى ايمەن نۇرجان.

استانادا Inventor Academy باعدارلاما جاساۋ مەكتەبىنىڭ نەگىزىن قالاۋشىلار ويرات ازبەرگەنوۆ پەن جانىبەك يسابەكوۆتىڭ اتاپ وتۋىنشە، مۇنداي باعدارلامانى كەز كەلگەن بالا جاساي الادى. ەڭ باستىسى، نيەت پەن ەڭبەكسۇيگىشتىك بولسا جەتكىلىكتى.«وكىنىشكە وراي قاراپايىم مەكتەپتەردە وعان از كوڭىل بولىنەدى. ويتكەنى، سىنىپتا بالا سانى كوپ. باعدارلاما جاساۋ  ادامنىڭ  قيالى مەن يدەيالارىن جۇزەگە اسىرۋدىڭ بىرەگەي قۇرالى. بۇعان قوسا، ادامدى ويلاۋعا ۇيرەتەتىن وتە پايدالى داعدى جانە ول بولاشاقتا بالاعا قاجەت بولادى»، - دەدى يسابەكوۆ.

نۇرسۇلۋ نايمانوۆا.

Abai.kz