«بتا بانك» اق ديرەكتورلار كەڭەسىنىڭ بۇرىنعى توراعاسى مۇحتار ءابىليازوۆ 10 اقپاندا استاناعا كەلمەدى. Cىبايلاس جەمقورلىققا قارسى ءىس-قيمىل ۇلتتىق بيۋروسى جاۋاپ الۋ ءۇشىن ونى 15 اقپانعا قايتا شاقىرتتى دەپ حابارلايدى NUR.KZ.

تەرگەۋ بارىسىندا ەكس-توراعا مۇحتار ءابليازوۆ ءوزىنىڭ قاراماعىنداعى كومپانيالار ارقىلى جىمقىرعان قوماقتى قاراجات ەسەبىنەن بانكتىڭ اكتسيالارىن ساتىپ الىپ، ونىڭ كاپيتالىن جاساندى جولمەن وسىرگەنى انىقتالدى.

«2005-2008 جىلدارى حالىقتىڭ دەپوزيتتەرى مەن شەتەل ينۆەستيتسيالارىن بارىنشا ارتتىرۋ ارقىلى بانك كاپيتالىن 8 ەسەگە وسىرگەن ءابليازوۆ ءوزىنىڭ كومپانيالارى ارقىلى ۇلكەن كولەمدەگى اقشانى جىمقىرعان»، - دەلىنگەن ۆەدومستۆونىڭ ءباسپاسوز قىزمەتى جاريالاعان اقپاراتتا.

سونداي-اق، جەمقورلىققا قارسى قىزمەت ءابليازوۆ پەن ونىڭ سىبايلاستارىنىڭ زاڭعا قايشى ارەكەت ەتكەندىگىن دالەلدەيتىن قوسىمشا ايعاقتار تاپتى. بانكتەن جىمقىرىلعان اكشانى زاڭداستىرۋدىڭ جاڭا سحەماسى اشىلدى. انىقتالعان فاكتىلەردەن ءابليازوۆ قازاقستان اۋماعىندا جانە ودان تىس جەرلەردە جۇمىس ىستەگەن ۇيىمداسقان قىلمىستىق توپ قۇرىپ، وعان جەتەكشىلىك ەتتى دەگەن كۇدىك تۋىپ وتىر.

قىلمىستىق-پروتسەسسۋالدىق كودەكستىڭ 206 بابىنىڭ 1 بولىگىنە سايكەس، كۇدىكتىنىڭ ءىس-ارەكەتىن سارالاۋ تۋرالى قاۋلى، ەگەر قورعاۋشىنىڭ قاتىسۋى زاڭ بويىنشا مىندەتتى بولسا نەمەسە بۇل تۋرالى كۇدىكتى ءوتىنىش جازسا، قورعاۋشىنىڭ قاتىسۋىمەن جانە قاۋلى شىعارىلعاننان باستاپ جيىرما ءتورت ساعاتتان كەشىكتىرىلمەي جاريا ەتىلەدى. كۇدىكتى نەمەسە ونىڭ قورعاۋشىسى كەلمەي قالعان جاعدايدا، قاۋلى جيىرما ءتورت ساعات وتكەننەن كەيىن دە جاريالانۋى مۇمكىن.

مۇحتار ءابىليازوۆتىڭ قازاقستان رەسپۋبليكاسىنان تىس جەردە بولۋىنا جانە ۇلتتىق بيۋروعا كەلۋدەن باس تارتۋىنا بايلانىستى قىلمىستىق-پروتسەسسۋالدىق كودەكستىڭ 206 بابىنىڭ 8 بولىگىنە سايكەس ەكس-توراعا 2017 جىلدىڭ 15 اقپانىنان دەيىن مىنا مەكەنجاي بويىنشا ورنالاسقان ۇلتتىق بيۋرونىڭ اكىمشىلىك عيماراتىنا كەلۋى ءتيىس: قازاقستان رەسپۋبليكاسى، استانا قالاسى، سەيفۋللين كوشەسى، 37", — دەلىنگەن ۇلتتىق بيۋرونىڭ حابارلاماسىندا.

اباي-اقپارات