قۇرمەتتى پرەزيدەنت مىرزا!

ارداقتى نۇرسۇلتان ءابىشۇلى!

سىزگە وسى حاتتى جازۋىمنىڭ ءمانىسىن ءتۇسىنىپ وتىرعان بولارسىز، مازاڭىزدى السام - عافۋ ەتەرسىز...  ءوزىڭىز حاباردار شىعارسىز، مەن ءبىر ىڭعايسىز جاعدايعا تاپ بولىپ وتىرمىن. مەن پروديۋسسەرلىك ەتەتىن "فەنيكس" ءفيلمىن تۇسىرۋگە دايىندىقتار كەزىندە، ونى ۇيىمداستىرۋشىلار تاراپىنان بولىنگەن قارجىنىڭ ىسىراپ بولىپ جاتقانى جايلى تەرگەۋ ءىسى ءجۇرىپ جاتىر. "نەگىزسىز جۇمسالدى" دەگەن قارجىعا مەنىڭ قاتىسىم بولماسا دا، ءىستى ۋشىقتىرمايىن دەپ، تۋىستارىم مەن شاكىرتتەرىم اقشا جيناپ، كورسەتىلگەن 5 ملن. اقشانى قايتاردىق. وسى ۋاقيعادان كەيىن، سارىۋايىمعا سالىنىپ، شۇعىل ەمحاناعا ءتۇستىم. سودان بەرى سىرقاتىم ۇدەپ بارادى.

بىلەسىز، مەن قارجىگەر ەمەسپىن، بولىنگەن قارجىنى ورنىمەن جۇمساۋعا ءتيىستى ادامدار، وعان تىكەلەي جاۋاپ بەرەتىن ورىنداۋشى پروديۋسسەر بار. مەنىكى جالپى باسشىلىق، اقشا جاعىنا ارالاسقان ەمەسپىن، ونداي بىردە-ءبىر قۇجاتتاردا، جاسالعان كەلىسىم-شارتتاردا مەنىڭ قولىم جوق. باستى ارمانىم - ەلىمىزدىڭ ءيميدجىن ودان ارى كوتەرەتىن فەنتەزي جانرىنداعى كوركەم فيلم جاساۋعا قاتىسىپ، باستى ءرولىنىڭ ءبىرىن ورىنداۋ عانا ەدى...

ەندى، مەنىڭ سول "سەنگەن" ادامدارىم ءبارىن ماعان جاۋىپ، وزدەرىن اقتاپ الماقشى بوپ جاتىر. مەنىڭ ول اقشانىڭ رەتسىز جۇمسالۋىنا ەشقانداي قاتىسىم بولماسا دا، ءىستى تەرگەۋشىلەردىڭ تەگەۋرىنىنە تۇسكەن قارجىعا جاۋاپتى ايەل ادامداردى اياپ، ءبىر جاعى قۇرىلتايشىسى ءوزىم كومپانيانىڭ ابىرويىن جابۋ ءۇشىن جاساعان ادال ارەكەتىمە قارايتىن تۇرلەرى جوق. مەنىڭ كىنام - توڭىرەگىمدەگى ادامدارعا قۇلاي سەنىپ، سالاقتىق جاساپ، ءجيى تەكسەرىس جاساماعانىم بولىپ وتىر. دەگەنمەن، قانشا تەكسەرسەم دە، مەن كينو ءتۇسىرۋدىڭ قارجىلىق قۇپيالارىن تۇسىنبەيتىن دە ەدىم. الدىندا بولعان ءبىردى-ەكىلى اۋديت، ت.ب. تەكسەرۋلەردەن تازا شىققانداي ەدى...

       قىمباتتى نۇرسۇلتان ءابىشۇلى!

اۋەلى، عاسىرلار بويى اتا-بابالارىمىزدىڭ ارمان ەتكەن تاۋەلسىزدىكتىڭ تۋىن تىگىپ، ىرگەسىن قالاپ، ۇلى دالانى ىمىرامەن ماڭگىلىك ەلگە باستاعان وزىڭىزدەن، وسى كەلەڭسىز جاعدايعا دۋشار بولعانىم ءۇشىن، مەنى سىيلاپ قادىرلەيتىن، بۇگىنگى جاعدايىما كۇيزەلىپ جۇرگەن بۇكىل كورەرمەن حالقىم مەن ارىپتەستەرىمنەن كەشىرىم سۇرايمىن. مەنىڭ سىزدەن باسقا سەنەرىم دە، سۇيەنەرىم دە جوق. اڭعالدىقپەن ۇياتتى بولعان ءبىر ىنىڭىزگە شاپاعاتىڭىزدى تيگىزەر مە ەكەنسىز... جەتپىسكە تايانعان جاسىمدا تاعدىردىڭ مۇنداي تاۋقىمەتىنە تاپ بولعانىما قاتتى كۇيىنۋدەمىن...

وزىڭىزگە دەگەن قۇرمەتى شەكسىز باۋىرىڭىز -

تۇڭعىشباي جامانقۇلوۆ      

Abai.kz