...مۇقاعا، مەنىڭ دە ءسابي بولعىم كەلەدى... كوڭىلى كىرشىكسىز، كۇلكىسى كۇمىس، جۇرەگى پاك، جولداسى پەرىشتە ءسابي بولعىم كەلەدى... مەنىڭ، قورعانسىز – سول سەبەپتى قامقورشىسى كوپ، اڭعال – سول سەبەپتى الداۋشىسى جوق ءسابي بولعىم كەلەدى... جىلاۋىنىڭ ءزىلى جوق، كۇلكىسىنىڭ مۇڭى جوق، بىراق كوزىندە كۇنى بار، كەۋدەسىندە جىرى بار، سويلەگەندە ءتىلى – بال، بىلدىرىنىڭ ءمانى بار، قىلىعىنىڭ ءسانى بار، ءوز ولشەمى، زاڭى بار ءسابي بولعىم كەلەدى...

مەنىڭ ءسابي بولعىم كەلەتىندىگىم – ەسەيۋدەن قاشۋىم، جاۋاپكەرشىلىكتەن جالتارۋىم، قاۋىپتەن قورقىپ، سىناقتان سىرعاقسۋىم ەمەس; ەسەيگەنمەن ەركەلىگىمدى جوعالتپاۋ، كۇرسىنسەم دە كۇلكىمدى ۇمىتپاۋ، قۇمارتسام قالىپتان شىقپاۋ، اداسسام ادال جىلاۋ; ءتۇپ ءمانى – جۇرەگىمدى تازا ۇستاۋ جولىنداعى ىزدەنىسىم...

يسا پايعامباردان (ول كىسىگە اللانىڭ سالەمى بولسىن!) شاكىرتتەرى: «قۇداي پاتشالىعىندا كىمنىڭ جولى ۇلكەن؟» دەپ سۇراعاندا، «سەندەرگە اقيقاتىن ايتام: بالالار سياقتى بولماساڭدار، ول پاتشالىققا كىرە المايسىڭدار» دەگەن ەكەن... باقىتتى ءومىر ءسۇرۋ جولىن، ادامدىق جولىن، اللانىڭ اق جولىن ىزدەگەن، تاپقان دانالاردىڭ ايتۋىنشا: ادام ومىرگە دەنەسىمەن، بيولوگيالىق جاعىنان ءبىر-اق رەت كەلىپ، ءبىر-اق رەت كەتەتىن بولعانىمەن، ول رۋحاني جاعىنان بىرنەشە رەت ء«ولىپ-تىرىلەدى» ەكەن. ءوزىڭىز ويلاپ كورىڭىزشى، وسى ۋاقىتقا دەيىن، ءدال وسى جاسىڭىزعا دەيىن ءسىزدىڭ كوزقاراسىڭىز، ادەتىڭىز، مىنەز-قۇلقىڭىز قانشاما رەت وزگەرىسكە ءتۇستى؟ مىنە، وسىنىڭ ءبارى – كىشىگىرىم ء«ولىپ-تىرىلۋلەر»، تۇلەۋ مەن جاڭارۋلار. بىراق سول ومىرگە قايتا كەلگەندەي بولعان ساتتەردە ءوزىڭىزدى قالاي سەزىندىڭىز؟ ماسەلە - وسىدا. ەگەر كوڭىلىڭىز كۇڭگىرتتەنىپ، قايعىڭىز قويۋلانىپ، ۇرەيىڭىز ۇدەپ، جانىڭىز جابىرقاسا، وندا تۇلەۋ ەمەس تۇنەرۋ، جاڭا اسۋ ەمەس – اداسۋ بولعانى... ال ەگەر كوڭىلىڭىز كوتەرىلىپ، جان-دۇنيەڭىزدى جايلى دا جىلى سەزىم كەرنەسە، ساناڭىز سەرگىپ، قۋاتىڭىز ورلەسە، ءومىر وزگەشە كورىنىپ، قۋانعان جۇرەك وي-جالعانعا كونبەسە، وندا شىن مانىندە قايتا تۋىلعانىڭىز – جارىعىڭىزدىڭ كوبەيگەنى، جولىڭىزدىڭ ۇلكەيگەنى! 

«ەندى، ولاي تۇلەۋگە بولار، بىراق ءسابي بولىپ قايتا تۋىلۋ قيىن بولار» دەرسىز. دۇرىس ايتاسىز: قيىن بولادى. الايدا قيىن دۇنيەنىڭ قىزىعى مەن قۋانىشى كوپ بولادى. ەڭ باستىسى: بولادى! انامىز ءبىزدى دۇنيەگە اكەلمەس بۇرىن 9 اي 10 كۇن كوتەرىپ، قينالا تولعاتىپ تاپقانى سيقتى، ءبىزدىڭ دە قايتا تۋىلۋىمىز بىردەن بولا قويمايدى. الدىمەن ادالدىققا، تازالىققا، سۇلۋلىقققا، شىندىققا، ماحابباتقا – اق جولعا «جۇكتى بولامىز». سودان كەيىن سول ء«سابيدى» تەرەڭىمىزدە تەربەتىپ جەتىلدىرەمىز، ۋاقىتى كەلگەنشە «كوتەرەمىز»: سىنايدى – شىدايمىز; تولعانامىز – تولعاتامىز; تۋامىز – تۋىلامىز...

قايتا تۋ دەگەنىمىز – جۇرەكتىڭ كىرىن جۋ دەگەن ءسوز. ء«سابي كوڭىل ادام» دەپ جۇرەگى تازا ادامدى ايتامىز. ال جۇرەكتىڭ تازالىعى – سانانىڭ سارالىعىنا، تۇلعانىڭ دارالىعىنا، ماحابباتتىڭ ارالىنا، باقىتتىڭ داراعىنا باستايتىن، جەتكىزەتىن جول... ءيا، ءسابي بولۋ – سانادان قاشىپ، اقىلدان ازۋ، اقىماق بولۋ ەمەس; السىزدىك، نارسىزدىك، قامسىزدىق ەمەس. ءسابي بولۋ – اقىلدى ارشۋ، قايراتتى قايراۋ، جۇرەكتى تازالاۋ.

مەنىڭ سابيلىگىم – ءومىردىڭ سىنىنان وتكەن، ءناپسىسىن سوككەن، جارىقتى تانىعان، جىگەرىن جانىعان، سوندىقتان الداۋعا تۇسپەيتىن، اينىمايتىن ادالدىق، قايعىرمايتىن ادىلدىك، تاڭ سىيلايتىن ىنساپ، تاۋسىلمايتىن مەيىرىم... مەنىڭ سابيلىگىم – شايتاننىڭ ءوزىن ادامنىڭ رۋحاني ءوسىپ-تولۋى ءۇشىن جاراتقان، مەيىرىمى مول، راقىمى زور جاراتقان يەگە دەگەن شەكسىز سەنىم مەن شەكسىز سۇيىسپەنشىلىك!..
مۇقاعا، مەنىڭ دە ءسابي بولعىم كەلەدى. اداسىپ جۇرگەننىڭ ەسىنە ارمانىن تۇسىرەتىن، شارشاعاننىڭ دارمەنىن كىرگىزەتىن; بىلدىر ءسوزى – ءدارى، كۇلىم كوزى – ءدارى; قايعىنىڭ ەمشىسىندەي، عايىپتىڭ ەلشىسىندەي ءسابي بولعىم كەلەدى!.. 

دوستار، سىزدەرگە دە ومىرگە «قايتا كەلۋدى» تىلەيمىن! وزدەرىڭىز دە، پەرزەنتتەرىڭىز دە ماحابباتتان جارالعاي!.. 

1999 جىل

العاداي ابىلعازىۇلى

Facebook-تەگى پاراقشاسىنان