ءوزىن ءتىرى پايمعامبار اتاعان ءنۇرالى امىراليەۆ شوشقانىڭ مايى مەن اراقتى ادال تاماقتاردىڭ قاتارىنا قوسىپ جۇرتتى شۋلاتتى.

بۇل تۋرالى “ايتىلماعان اڭگىمە” باعدارلاماسىندا ايتىلدى.

– ءتۇسىرىلىم كەزىندە شوشقا مايىن جەپ، ونى ادال تاعامداردىڭ قاتارىنا قوستىڭىز. ءالى دە وسى پىكىردى ۇستاناسىز با؟

– قۇراندا مۇحاممەد پايعامبارىمىزعا “تاماقتىڭ ىشىندە نەسى ادال، نەسى حارام؟” دەپ سۇراق قويعان ەكەن. سونىڭ جاۋابىن ايتىپ كەتەيىن. ول “مەن تاماقتىڭ ىشىندە ارامىن كورمەدىم” دەگەن. ونى كىم ارام قىلادى؟ البەتتە، قۇراندى تۇسىنبەي وقىعان ادامدار. ياعني شوشقانىڭ ەتى – حارام، ال مايى  – ادال. مۇنى كەزىندە يسرايل پايعامبارعا دا بەرگەن. قۇراننىڭ ىشىندە تەمەكى تۋرالى جازۋ جوق. الايدا اناشا تارتۋعا تىيىم سالىنعان.

– سۇحباتتارىڭىزدىڭ بىرىندە “بالالارعا كورسەتپەي اراق ىشۋگە بولادى” دەپ ەدىڭىز. وسى تۋرالى نە دەيسىز؟

– اراق ءىشۋدىڭ وزىندىك ورنى بار. قۇراندا ءۇشىنشى جاناتتاعى بۇلاقتاردان اراق اعاتىنى تۋرالى جازىلعان. “بوتاكوز قىزدار شەلەكتەپ اكەلىپ، شاينەك پەن كەسەگە قۇيىپ بەرەدى” دەلىنگەن. جاناتتاعى اراقتىڭ ءتۇسى اق، ءمولدىر بولادى. بىراق ول قانشا ىشسەڭ دە، ماس قىلمايدى. دەنەڭدى بالقىتىپ وتىرادى. مەن اراقتى ءدارى ەسەبىندە پايدالانۋعا بولاتىندىعىن ايتىپ وتىرمىن.

– ياعني، ءسىزدىڭ ويىڭىزشا، اراق ادال عوي؟

ءيا، ول ادال. اللا تاعالانىڭ بەرگەن تاعامىن كىم ارام قىلادى؟ ءبىرىنشى – قۇراندى تۇسىنبەيتىن مولدالار، ەكىنشى – ءىشىپ الىپ، بالا-شاعاسى مەن ايەلىنە ءزابىر كورسەتەتىندەر، ءۇشىنشى – ءىشىپ الىپ ەل-جۇرتتىڭ مازاسىن الاتىندار. ادال تاماقتى نيەتىمەن دۇرىس قابىلداسا، ول قالاي ارام بولادى؟ سەندەر سەنبەي وتىرسىڭدار. قۇراندا اراقتى قاجەت دەسەڭىزدەر، 10 رەت قايتالاپ ادال دەگەن. وسىعان ءوزىم جاۋاپ بەرەمىن.

الايدا ءنۇرالى امىراليەۆتىڭ پىكىرىمەن ستۋديا قوناقتارى كەلىسپەدى. “قۇراندا اللا تاعالا كەشىرىمدى بولۋىمىز كەرەكتىگىن ايتادى. ونى تەك سىزگە ەمەس، بۇكىل حالىققا ايتىپ جاتىر. مۇنىمەن قاتار، ءسىز سەكىلدى جاھيد نادانداردان اۋلاق بولۋعا كەڭەس بەرەدى. يمان كەلتىرگەندەردىڭ اراسىنا ىرىتكى سالىپ، جامان اڭگىمەلەر ايتۋ – جاقسى دۇنيە ەمەس. ول ادام اللانىڭ ۇلكەن قاھارىنا ۇشىرايدى”، – دەيدى قاناعات قاجى.

نۇرسۇلۋ نايمانوۆا

Abai.kz