بيىل «الاش» اۆتونومياسىنىڭ 100 جىلدىعى. الاش قايراتكەرلەرىنىڭ قازاققا سىڭىرگەن ەڭبەگى ولشەۋسىز. ولار باستاعان جول – ازاتتىق جولى. بىلتىرى الاشتىڭ تۋ ۇستاعان كوشباسشىسى ءاليحان بوكەيحانوۆتىڭ 150 جىلدىعى يۋنەسكو كولەمىندە تويلانعانى بەلگىلى.

«الاش» اۆتونومياسى بۇگىنگى قازاقستان رەسپۋبليكاسىنىڭ نەگىزى. وسى تاريحي ماڭىزى زور تويدى ەلدىك دەڭگەيدى اتاپ ءوتۋ ءۇشىن استانادا پرەمەر-ءمينيستردىڭ ورىنباسارى يمانعالي تاسماعامبەتوۆتىڭ توراعالىعىمەن كەڭەس ءوتتى.

«حح عاسىردىڭ باسىندا ۇلتتىڭ زيالىلارى ازاتتىق ءۇشىن بولعان كوپ عاسىرلىق كۇرەستە ماڭىزدى ءرول اتقاردى. «الاش» العاشقى ساياسي پارتياسى جانە الاش وردا ۇكىمەتىنىڭ پايدا بولۋى ازاماتتىق كەمەلدەنگەن جانە حالىقتىڭ بولاشاق تاعدىرىن شەشە الاتىن قازاقتىڭ ساياسي زيالىلارىنىڭ جوعارعى الەۋەتىن كورسەتتى» (strategy2050.kz), - دەپ  الاش ارداگەرلەرىنە ساياسي باعا بەرە سويلەگەن تاسماعامبەتوۆ تويى قامىنا كىرىسۋدى جەدەلدەتۋدى ايتىپ، بىرقاتار تاپسىرمالار دا بەردى.

«الاشتىڭ 100 جىلدىعىنا دۇرىستاپ دايىندالۋىمىز كەرەك. قازىر ەڭ باستىسى، جاقسى جوسپار قۇرۋىمىز قاجەت. وعان ءبىر-ەكى اپتاداي ۋاقىت الىپ، دۇرىس جوسپار قۇرىپ، ونى ەلباسىمەن كەلىسىپ، ۋاقىتىن بەلگىلەگەن ءجون. الاشتىڭ 100 جىلدىعى سول زامانمەن قالىپ قويماي، بۇگىنگى تاۋەلسىز مەملەكەتپەن بايلانىستىرۋ ورىندى بولادى. الاش زيالىلارىنىڭ ارمانى، ونىڭ ورىندالعانى، تاۋەلسىز ەل بولعانىمىز، وسىنىڭ بارلىعى ۇلتتىق جانە تاريحي سانانى كوتەرەتىن جاقسى دۇنيە بولۋى كەرەك» (strategy2050.kz) دەگەن تاسماعامبەتوۆ الاش اۆتونومياسىن قۇرۋ مەن قالىپتاستىرۋدى، ونىڭ ءىسىن جالعاۋدا ەڭبەك ەتىپ، ۇلت جولىندا باسىن بايگەگە تىككەن زيالىلاردىڭ  ءومىرى مەن شىعارماشىلىعى، قىزمەتىن زەرتتەپ، كىتاپ عىپ شىعارۋ، دەرەكتى فيلم ءتۇسىرۋ سىندى ماسەلەلەردى قولعا كەرەكتىگىن ايتتى.

تاسماعامبەتوۆ الماتىعا كەلگەن ساپارىندا احمەت بايتۇرسىنۇلىنىڭ مۇراجاي ۇيىنە بارىپ، ارالاپ كورىپ، مۇراجاي ۇيگە مەملەكەتتىك مارتەبە بەرۋ تۋرالى سول جەردە مادەنيەت جانە سپورت ءمينيسترى ارىستانبەك مۇحامەديۇلىنا تاپسىرما بەرگەن ەدى. ءارى احمەت بايتۇرسىنۇلىنىڭ 10 تومدىق ەڭبەگىن شىعارۋدى دا تاپسىرعان.

نۇرا ماتاي

Abai.kz