وڭتۇستىك قازاقستان وبلىسىندا مايكەنە مايىن شىعاراتىن زاۋىت ىسكە قوسىلىپ، العاشقى ءونىمىن شىعارا باستادى. بولاشاقتا زاۋىت تاۋلىگىنە 30 توننا ءونىم شىعاراتىن بولادى، - دەپ حابارلايدى اباي-اقپارات.

سوڭعى الەتتە بۇل ونىمگە اۆياتسيا، عارىش جانە كوسمەتيكا سالاسىندا سۇرانىس ارتىپ وتىر. مەديتسينادا دا كەڭىنەن قولدانىلاتىنى بەلگىلى. وتە سيرەك كەزدەسەتىن ءونىمدى كوپتەپ وندىرگەن جاعدايدا جەردە قالماسى انىق.

نەگىزىنەن مايكەنە وسىمدىگى وڭىردەگى ماقتاارال، شاردارا، ارىس جانە وتىرار اۋداندارىندا وسىرىلەدى. زاۋىتتىڭ ونىمدىلىگىن ارتتىرۋ ءۇشىن الداعى ۋاقىتتا اتالعان وسىمدىكتى مولىنان ءوسىرۋ قاجەتتىگى تۋىنداپ وتىر. مايكەنەدەن ساپالى ماي الۋ ءۇشىن كوپ ۋاقىتتان بەرى تىنباي ىزدەنىپ، جان-جاقتى زەرتتەگەن مامانداردىڭ ەڭبەگى جاندى. ەندى كاسىپورىن تاۋلىگىنە 30 توننا ءونىم شىعاراتىن بولادى. بۇل وسىمدىكتىڭ قۇرامىندا 47-50 پايىز كەپپەيتىن ماي بولسا، ونىڭ جاڭا تۇقىمىندا 73-74 پايىزعا دەيىن جەتەدى. وسىمدىك مايى 310 گرادۋس ىستىقتا دا قىزبايدى جانە 18 گرادۋسقا دەيىنگى سۋىقتا قاتپايدى.

قازىردىڭ وزىندە وتاندىق ونىمدى رەسەيگە تاسىمالداۋ جونىندە كەلىسىم جاسالىنىپ قويىلدى. ال ءوندىرىس كولەمىن ۇلعايتۋ ءۇشىن ينۆەستور ىزدەستىرىلىپ جاتىر. كاسىپورىن باسشىسى كەڭەسباي تورەقۇلوۆ: ء«بىز ەندى بۇل ءوندىرىستى ارى قاراي دامىتۋ ءۇشىن ءوزىمىزدىڭ جانىمىزدان كوسمەتيكتەردى، فارماتسەۆتەردى شاقىرىپ، كىشكەنە تسەح سالساق پا دەپ وتىرمىز. ەگەر ول بولاتىن بولسا، ينۆەستورلار تابىلاتىن بولسا، سونىمەن اينالىساتىن ماماندار بولاتىن بولسا، جۇمىس كوزى تابىلادى عوي دەپ وتىرمىز». الداعى ۋاقىتتا اتالعان زاۋىتتا  50 ادام تۇراقتى جۇمىسپەن قامتىلماق. 

اباي-اقپارات