رۋحانيات اتتى ۇلى ۇعىمنىڭ ماعىناسىنا ءجىتى ءۇڭىلەتىندەر ساۋساقپەن سانارلىق قءازىر. سول ساۋساقتىڭ سانىنداي زيالىنىڭ اراسىندا قر مءادەنيەت جءانە سپورت مينيسترلىگى ءدىن مءاسەلەلەرى جءونىندەگى عىلىمي-زەرتتەۋ جءانە تالداۋ ورتالىعىنىڭ ديرەكتورى, فيلولوگيا عىلىمدارىنىڭ كانديداتى اينۇر ءاءبدىرءاءسىلقىزى (سۋرەتتە) بار. كەي ەر-ازاماتتارعا بىتپەگەن قايسارلىعى ءۇءشىن ەل الدىندا بەدەلى ارتقان, جانى نءازىك بولسا دا سءوءزى سالماقتى, ەڭ باستىسى, سءوءزى مەن ءىسىنىڭ بىرلىگى اركەز بايقالاتىن اينۇردىڭ بءۇگىنگى سۇحباتى  بارىمىزگە  وي سالارىنا سەنىمدىمىن...

− ارمىسىز، اينۇر ابدىراسىلقىزى! اڭگىمەمىزدى سوڭعى جاڭالىقتاردان باستاساق. جاقىندا ساتباەۆ قالاسىندا ءدۇبىرلى ءىس-شارا وتكىزگەندەرىڭىزدەن الەۋمەتتىك جەلىلەر ارقىلى حاباردار بولدىق. شارانىڭ ءمان-جايىن تاراتا ايتىپ بەرسەڭىز.

− قاراعاندى وبلىسىنىڭ ساتباەۆ قالاسىندا 13-15 مامىر ارالىعىندا «قازىرگى ءدىني احۋال جاعدايىنداعى ءداستۇرلى رۋحاني قۇندىلىقتاردى جاڭعىرتۋ جانە ىشكى تۇراقتىلىق ماسەلەلەرى» اتتى رەسپۋبليكالىق عىلىمي-تاجىريبەلىك كونفەرەنتسيا جانە وسى تاقىرىپتا مەملەكەتتىك قىزمەتكەرلەرگە، ءدىن قىزمەتكەرلەرىنە، اقپاراتتىق-ناسيحات توپتارىنىڭ مۇشەلەرىنە، ء«دىنتانۋ نەگىزدەرى» مۇعالىمدەرىنە ارنالعان ءۇش كۇندىك سەمينار وتكىزدىك.

سەمينار جۇمىسى كونفەرەنتسيادان بۇرىن باستالعان بولاتىن. ءبىزدىڭ ءدىن ماسەلەلەرى جونىندەگى عىلىمي-زەرتتەۋ جانە تالداۋ ورتالىعىنىڭ التى بىردەي قىزمەتكەرى كەزەك-كەزەگىمەن ءارتۇرلى تاقىرىپتاردا دارىستەر وقىپ، سونىمەن ءبىر مەزگىلدە فوكۋس-توپتىق تالداۋ جۇمىستارى مەن ساۋالنامالار، سۇحباتتار جۇرگىزىپ وتىردى. وسىنداي شارالار ىرگەلەس جەزقازعان قالاسىندا دا قاتار جۇرگىزىلدى.

وسى شارالاردىڭ اسەرلى ءارى مازمۇندى بولعاندىعىنىڭ ناتيجەسى بولسا كەرەك، سوڭعى كۇنگى كونفەرەنتسياعا كەلۋشىلەر سانى وتە كوپ بولدى. 400 ادامدىق زال لىق تولىپ، سىيماي قالعان قانشاما حالىق ەسىك الدىندا ءيىن تىرەسىپ تۇردى. سويلەۋشىلەردىڭ لەبىزىن وسىنشا ىستىق ىقىلاسپەن قابىلداپ، ۇزاق قول سوققان اۋديتوريانى مەن بۇعان دەيىن كورگەن جوقپىن. ساتباەۆتاعى ساپار ءبىزدىڭ ورتالىق قىزمەتىنىڭ مارتەبەلى ءبىر ساتىسى بولدى. ماماندارىمىزدىڭ وسكەنىن، بەينەتىمىزدىڭ زەينەتىن ەل كورە باستاعانىن تاعى ءبىر سەزىنىپ، مارقايىپ قايتتىق.

− قانداي وزەكتى تاقىرىپتار ءسوز بولدى؟

− ءاربىر ءىس-شارا وزىنشە ءبىر مازمۇندىق تۇتاستىقپەن ورىلەدى عوي. سەمينار جۇمىسىنىڭ كىرىسپە تاقىرىبى زايىرلى مەملەكەت زاڭناماسىنان، زايىرلىلىق قاعيداتتارى جانە ءدىن اراقاتىناسى ماسەلەلەرىنەن باستالدى.

نەگىزگى بولىمىندە قازىرگى ەلىمىزدەگى ءدىني احۋالدىڭ جاي-كۇيى، نەگىزگى دامۋ ۇردىستەرى، قازاقستانداعى ءداستۇرلى دىندەردىڭ دۇنيەتانىمدىق قىرلارى، سونىڭ ىشىندە يسلامداعى حانافي مازحابىنىڭ ەلىمىزدە تارالۋ ەرەكشەلىكتەرى، ماتۋريدي اقيداسىنىڭ قازاق دۇنيەتانىمىنداعى ورنى، قازاقستانداعى ءدىني-ۇلتتىق بىرەگەيلەنۋ، ءدىن جانە ءداستۇر سۇحباتى ماسەلەلەرى، ءدىني جانە دىنتانۋلىق ءبىلىمنىڭ جاي-كۇيى، ءداستۇرلى ەمەس ءدىني بىرلەستىكتەردىڭ قىزمەتى، تەرىس پيعىلدى جانە تىركەلمەگەن ءدىني اعىمداردىڭ ءىس-ارەكەتى مەن زارداپتارى، ءدىني ەكسترەميزم مەن تەرروريزم يدەولوگياسىنىڭ ۇلتتىق قاۋىپسىزدىككە قاتەرى سىندى وزەكتى تاقىرىپتار جان-جاقتى تالداندى. قورىتىندىسىندا سۇراق-جاۋاپ الماسىلىپ، سۇحباتتار بەرىلىپ، سەرتيفيكاتتار تابىستالدى.

سەمينار بارىسىندا ءبىزدىڭ ورتالىقتان ديرەكتوردىڭ عىلىمي ءىس جونىندەگى ورىنباسارى، تاريح عىلىمدارىنىڭ كانديداتى بايماحانوۆ بەكجىگىت كوبەيۇلى، يسلامدى زەرتتەۋ ءبولىمىنىڭ باسشىسى، قۇقىقتانۋ ماگيسترى، يسلامتانۋ دوقتورانتى مۇقان يساحان، حريستياندىق جانە قازاقستان ءۇشىن ءداستۇرلى ەمەس ءدىني اعىمداردى زەرتتەۋ ءبولىمىنىڭ باستىعى نوۆيكوۆا گالينا نيكولاەۆنا، عالىم حاتشى، فيلوسوفيا عىلىمدارىنىڭ كانديداتى وماروۆ اسان قايىربەكۇلى، يسلامدى زەرتتەۋ ءبولىمىنىڭ باس عىلىمي قىزمەتكەرى مۋسليموۆ مارلەن ءجۇنىسۇلى سەكىلدى ماماندار قاتىسىپ، دارىستەر جۇرگىزدى.

− وسىنداي ايتۋلى شارانى شالعايداعى ساتباەۆ وڭىرىندە وتكىزۋلەرىڭىزگە نە سەبەپ بولدى؟

− ساتباەۆ قالاسىنداعى ءدىن ماسەلەلەرى جونىندەگى ورتالىقتىڭ باسشىسى ز.قيانوۆا اقپان ايىندا ءبىزدىڭ ورتالىققا ارنايى ساپارلاپ كەلىپ، بىرلەسكەن ءىس-شارالار وتكىزۋ جايىن كەڭ وتىرىپ كەڭەسكەن ەدىك. سەمينار وتكىزۋ باستاماسى سول كىسىنىڭ تاراپىنان تۋىندادى.

ال كەشەندى شاراعا «قازىرگى ءدىني احۋال جاعدايىنداعى ءداستۇرلى رۋحاني قۇندىلىقتاردى جاڭعىرتۋ جانە ىشكى تۇراقتىلىق ماسەلەلەرى» دەگەن اتتى ءوزىمىز قويىپ، باعدارلاماسىن جاساقتاپ، ءساتتى كۇنى جۇزەگە دە اسىردىق. اتاپ ايتۋ كەرەك، ءدال وسى اتپەن ەلىمىزدىڭ بارلىق وڭىرلەرىندە ءىس-شارالار تسيكلىن وتكىزۋدى جوسپارلاپ وتىرعان بولاتىنبىز. ونىڭ كەشەگى ءۇش ءجۇزدىڭ باسىن قوسقان سارىارقانىڭ سايىن دالاسىنان، قاسيەتتى ۇلىتاۋ ولكەسىمەن ۇلاسىپ جاتقان وڭىردەن باستاۋ الۋىن جاقسىلىققا جورىدىق. «دىنگە قىزمەت – ەلگە قىزمەت»، «حالىققا قىزمەت – حاققا قىزمەت» دەپ تۇيسىنگەن ۇلتتىڭ ۇلانى بولعان سوڭ ءاربىر ىستەن ىزگى ناتيجە كۇتۋگە بەيىمبىز عوي.

ەندىگى باعىتىمىز – وڭتۇستىك پەن باتىس وڭىرلەر. قىزىلوردا، وڭتۇستىك قازاقستان، جامبىل وبلىستارىنداعى ءىس-شارالار باستالىپ تا كەتتى، ال باتىسقا جول تارتۋدى جاڭا ايعا جوسپارلاپ وتىرمىز.

− وسى ورايدا ءوزىڭىز باسقاراتىن ورتالىقتىڭ قىزمەتىمەن تولىعىراق تانىستىرۋدىڭ رەتى كەلگەن ءتارىزدى...

− ءبىزدىڭ ءدىن ماسەلەلەرى جونىندەگى عىلىمي-زەرتتەۋ جانە تالداۋ ورتالىعى 2007 جىلدان بەرى قىزمەت اتقارىپ كەلەدى. ءدىن سالاسىنداعى ىرگەلى زەرتتەۋلەر، ءدىني احۋال مونيتورينگى، ءدىنتانۋ ساراپتاماسى وسى ورتالىقتا جۇرگىزىلەدى. ءدىن ماسەلەلەرىنە، ءدىني بىرلەستىكتەر قىزمەتىنە، ءدىني ءبىلىم مەن ءدىنتانۋ ساراپتاماسىنا قاتىستى اقپاراتتىق-انىقتامالىق جانە ادىستەمەلىك ماتەريالدار، زەرتتەۋ ەڭبەكتەرى، تالداۋ جۇمىستارى جاسالادى.

رەسپۋبليكا بويىنشا ءدىن ماسەلەلەرى جونىندەگى اقپاراتتىق-ناسيحات توپتارىنىڭ جۇمىستارىنا تىكەلەي قاتىسۋ جانە ادىستەمەلىك كومەك كورسەتۋ دە ءبىزدىڭ ورتالىقتىڭ مىندەتىنە جاتادى. كوپتەگەن مەملەكەتتىك مەكەمەلەردە ءدىني احۋالدىڭ وزەكتى ماسەلەلەرىنە قاتىستى دارىستەر وقۋ، وقىتۋ سەمينارلارى مەن ءتۇرلى پىشىمدەگى ءىس-شارالار ۇيىمداستىرۋ، سونىڭ ىشىندە جاستار مەن ايەلدەر اۋديتورياسىنا قاتىستى ماقساتتى جۇمىستار جۇرگىزۋ ورتالىق جۇمىستارىنىڭ ءبىر بولىگى بولىپ تابىلادى.

سونىمەن قاتار رەسمي سايتىمىز بەن الەۋمەتتىك جەلىلەردە اقپاراتتاندىرۋ جۇمىستارىن جۇرگىزەمىز. جوعارىدا اتالعان باعىتتار بويىنشا كوپتەگەن باسىلىمدار ازىرلەپ، اۋماقتىق ءدىن ىستەرى باسقارمالارى ارقىلى ەل كولەمىنە تاراتامىز. سول ەڭبەكتەردىڭ ىشىنەن اسىرەسە وتكەن جىلى ەكى تىلدە ازىرلەنىپ، جارىق كورگەن ء«دىنتانۋشى-ساراپشىنىڭ ۇستەل كىتابىن»، ء«دىنتانۋ نەگىزدەرى» ءپانىنىڭ وقىتۋشىلارىنا ارنالعان قوسىمشا قۇرالدى، «دىنتانۋلىق زەرتتەۋلەر» جيناعىن جانە «يمامعا كومەكشى» ۇستەل كىتابىن ەرەكشە اتار ەدىم.

− ءسوزىڭىز اۋزىڭىزدا، وتكەن جىلدىڭ سوڭىندا وتكەن بريفينگتە ءسىز «حانافي ادەبيەتتەرى» سەرياسىنىڭ كىشىگىرىم تانىستىرىلىمىن جاساعان ەدىڭىز...

− ءيا، بۇل سەريا – ءبىزدىڭ ءدىن ىستەرى اگەنتتىگى قۇرىلعان كەزەڭنەن باستاپ، ءۇش جىل بويى جاساعان ەڭبەگىمىزدىڭ ەلەۋلى جەمىسى. سەرياعا ەنگەن ون بەس كىتاپتى ەلىمىزدىڭ تۇكپىر-تۇكپىرىنەن تۇيىرلەپ جيناپ، كەيبىرىن اۋدارتىپ، رەداكتسيالاپ، كەيبىرىن قايتا باسپاعا دايارلاپ، سەريانىڭ اتى مەن لوگوتيپىن ويلاپ تاۋىپ، ديزاينىنا دەيىن نەگىزگى يدەيالاردى جۇزەگە اسىرۋ وزىمە ءناسىپ بولدى.

سەرياعا ەنگەن ءاربىر كىتاپتىڭ وزىندىك دايىندالۋ تاريحى بار. مىسالى، يمام عازاليدىڭ «باقىتقا جەتۋ الىپپەسىن» («كيمياي-ساادات») كەزىندە وڭتۇستىكتىڭ بەلگىلى اقىنى، مارقۇم ءتۇرسىنالى اينابەكوۆتىڭ اۋدارعانىن كەزدەيسوق ءبىر مالىمەتتەن وقىپ قالدىم. سودان كەيىن وڭتۇستىك قازاقستان وبلىستىق ءدىن ىستەرى باسقارماسىنىڭ ماماندارى ارقىلى مارقۇمنىڭ وتباسىمەن بايلانىسىپ، قولدارىنداعى جالعىز نۇسقانىڭ كوشىرمەسىن الدىق. ءماتىندى قايتا تەرگىزىپ، تولىعىمەن قايتا رەداكتسيالادىق. مۇراگەرلەرىمەن باسپا ارقىلى كەلىسىمشارت جاساسىپ، قايتا باسۋ قۇقىعىن الىپ، بۇرىن وسى كىتاپتى جاريالاعان «قاسيەت» باسپاسىنا سىلتەمە جاساي وتىرىپ، جارىققا شىعاردىق.

ال عازاليدىڭ «جان تاربيەسى» كىتابىن وڭتۇستىك وڭىرىنە جاساعان كەزەكتى ساپارىمدا كىتاپ دۇكەنىنەن كەزىكتىردىم. وسى كىتاپتىڭ العىسوزىنەن عۇلامانىڭ «اللاعا ماحاببات» اتتى ەڭبەگىنىڭ دە قازاق تىلىنە اۋدارىلعانىنان حاباردار بولدىم. اۋدارماشىسى ءوزىمىزدىڭ زامانداسىمىز، يسلامتانۋشى عالىم، كوپتەگەن يسلامدىق ەڭبەكتەردى وتاندىق وقىرمانعا تانىستىرعان جالعاس سادۋاقاسۇلى بولىپ شىقتى. سول كىسىمەن بايلانىسىپ، قوس كىتاپتىڭ اۋدارماسىن قايتا باسپاعا دايارلاتتىق.

ءابۋ حانيفا يمام اعزامنىڭ «ەڭ ۇلكەن فيكھ» («فيكحۋل اكبار») جانە «وسيەتتەر» («ۋاسيات») كىتاپتارىنىڭ ازداعان اۋدارما نۇسقالارىن سالىستىرا كەلىپ، زامانداس اۆتورىمىز ريزابەك باتتالوۆتىڭ اۋدارماسىنا توقتالدىق. اۆتور سول كەزەڭدە ەگيپەت اراب رەسپۋبليكاسىندا وقۋدا بولاتىن، ءساتى ءتۇسىپ، كايرگە بارعان ساپارىمىزدا جولىعىپ، اۋدارمانىڭ ەلەكتروندىق نۇسقاسىن الىپ، جارىققا شىعاردىق.

مۇحاممەد يبن مۇحاممەد شىمىر بي (التىبارماق) بابامىزدىڭ ەكى تومدىق «مۇحاممەدتىڭ پايعامبارلىق دالەلدەرى» («مااريجۋن-نۋبۋا») كىتابى مەن سوپى اللاياردىڭ «السىزدەردىڭ تاباندىلىعى» («ساباتۋل اجيزين») كىتابىن وتاندىق اۆتور، يسلامتانۋشى ءزارىپباي ورازبايدىڭ اۋدارعانىنان وزىمىزگە ءدىنتانۋ ساراپتاماسىنا كەلىپ تۇسكەن «قازىنالى وڭتۇستىك» سەرياسىنىڭ باسىلىمدارى ارقىلى حاباردار بولدىق. ول كىسىنى سوناۋ قازىعۇرت تورىندەگى مەكەنىنە ىزدەپ بارىپ، كونە كىتاپتاردىڭ ءىنجۋ-مارجاندارىن جيناقتاعان جەكە كىتاپحاناسىمەن تانىسىپ، اتالعان ەڭبەكتەردى قايتا دايارلاۋىنا مۇرىندىق بولدىق.

قازىرگى بىرقاتار بەلگىلى ءدىنتانۋشىلار ەرشات وڭعاروۆ، ەركىنبەك شوحاەۆ، مۇحيتدين يساۇلىنىڭ كىتاپتارى، سونىمەن قاتار ءوزىمنىڭ ء«دىن. ءداۋىر. ءداستۇر» اتتى ەڭبەگىم دە وسى سەريا اياسىندا جارىق كوردى.

كىتاپتاردىڭ سوڭعى ديزايندىق ۇلگىسىن ازىرلەۋگە «حيكمەت» ستۋدياسىنىڭ ماماندارى كومەكتەستى. سەريا باسىلىمدارى «الەۋمەتتىك ماڭىزى بار ادەبيەت تۇرلەرىن شىعارۋ» باعدارلاماسى اياسىندا ەكى مىڭ دانامەن «باسپالار ءۇيى» باسپاسى ارقىلى جارىققا شىعىپ، ەل اۋماعىنداعى بارلىق كىتاپحانالارعا تارالدى. اۋماقتىق ءدىن ىستەرى باسقارمالارىنا، مەشىتتەر مەن مەدرەلەسەرگە ءدىن ىستەرى كوميتەتى ارقىلى جولداندى. ەلىمىزدەگى بارلىق ءدىنتانۋ كافەدرالارىنا وسى جىلى ورتالىقپەن جاسالعان مەموراندۋمدار بارىسىندا ءوز قولىممەن تابىستادىم.

−       جاڭا جوبالارىڭىز جايلى بىرەر ءسوز...

− وتكەن جىلى ورتالىقتىڭ رەسمي سايتىن قايتا جاساقتاپ، ء«بىزدىڭ جوبا: ءدىن جانە ءداستۇر» دەگەن ايدار اشىپ، تولىقتىردىق. ء«دىن سالاسىنداعى وزەكتى ماسەلەلەر جونىندەگى 20 سۇراق-جاۋاپ» سەرياسىمەن ء«دىن جانە ءداستۇر»، ء«دىن جانە قوعام» تاقىرىپتارىندا ەكى جيناق قۇراستىرىلىپ، ورتالىق سايتىنا ورنالاستىرىلدى جانە بارلىق وڭىرلەرگە تاراتىلدى. اتاپ ايتۋ قاجەت، بۇل جيناقتى قۇراستىرۋدا «E-islam» اقپاراتتىق-اعارتۋشىلىق پورتالىنا كەلىپ تۇسكەن ساۋالدار نەگىزگە الىندى. جيناق جۇمىسىنا ورتالىق ماماندارىمەن قاتار اتالمىش پورتال قىزمەتكەرلەرى مەن بىلىكتى ءدىنتانۋشى عالىمدار دا اتسالىستى.

ۇستىمىزدەگى جىلى قازاق راديوسىندا ء«داستۇرلى قۇندىلىقتار» اتتى ارنايى حاباردى ەفيرگە شىعارا باستادىق. ءبىزدىڭ باستامامىزبەن شىعاتىن ەكى تىلدەگى ء«دىنتانۋ» ونلاين-جۋرنالى كەلەر ايدا تۇساۋىن كەسپەك.

«قازاقستان ءدىنتانۋشىلارى» اتتى ارنايى كاتالوگ قۇراستىرۋ ويىمىزدا بار. ءدىني احۋالدى تىكەلەي زەردەلەۋ ماقساتىندا ەلىمىزدىڭ بارلىق ايماقتارىنا جاپپاي ءىسساپارلار ۇيىمداستىرۋدى دا جۇزەگە اسىرۋدامىز. ءدىنتانۋ كافەدرالارىنا ارنالعان اقپاراتتىق-تانىمدىق جيناق ازىرلەۋدەمىز.

مۇنىڭ بارلىعى – جوعارىدا سانامالانعان نەگىزگى جۇمىس باعىتتارىنان تىس ءوز باستامامىزبەن جاسالىپ جاتقان قوسىمشا دۇنيەلەر.

− ءسوز سوڭىندا ساتباەۆتا وتكەن شاراعا ورالعىم كەلەدى. كونفەرەنتسيادا سويلەگەن سوزىڭىزدە اقساقالدارعا بازىنا رەتىندە ءبىراز لەبىز ءبىلدىرىپسىز. بۇل ماسەلەگە نازار اۋدارۋىڭىزعا نە سەبەپ بولدى؟

− «الدىڭعى جاقسى ارتقى جاسقا ءتالىم ايتپاسا، ەل بولعانىڭ قايسى؟» دەيدى مۇحتار اۋەزوۆ. ارتقى جاسقا تالىمىمەن عانا ەمەس، تۇلعاسىمەن دە ونەگە بولاتىن الدىڭعى بۋىن اعالار ەلدىكتىڭ ەرەن ۇلگىسىن كورسەتىپ، ىنتىماققا ۇيىتۋدىڭ ورنىنا «باس-باسىنا بي بولعان وڭكەي قيقىم» سەكىلدەنىپ، رۋشىلدىق پەن جەرشىلدىكتىڭ دەرتىنەن ايىعا الماي جاتسا، ەل اۋزىنان دۋا كەتكەنى ەمەي نەمەنە؟

ارتقى جاسقا قاشاندا الدىڭعى بۋىننىڭ ونەگەسى كەرەك. ءبىزدىڭ بۋىن تالايلى كەزەڭگە تاپ كەلىپ، تابان جولىن ءوزى ىزدەپ تابۋعا كوبىرەك ءماجبۇر بولدى. بىرەۋ ماڭدايىمىزدان قاشان سيپايدى دەپ جۇرگەندە، ءوزىمىز وزگەلەردىڭ ماڭدايىنان سيپايتىن جاسقا جەتىپ قالىپپىز...

راس، كوكىرەگىمىزدى قۇندىلىققا تولتىرعان كوركەم ادەبيەت پەن ەل اۋزىنداعى ەستى سوزدەن كەمدىك كورگەن جوقپىز. بىراق ءبىزدىڭ الدىمىزداعى، ءبىز وكشەسىن باسىپ كەلە جاتقان بۋىن وتپەلى كەزەڭ تاۋقىمەتىمەن ۇرپاق تاربيەسىنەن گورى نارىق قىسپاعىن ەڭسەرۋگە كوبىرەك الاڭدادى. وقۋداي وقىپ، توقۋداي توقۋعا تىرىسقانىمىزبەن، «تايبۋرىلدىڭ قىرىق ءۇش كۇن كەمدىگى» سەكىلدى اتالى سوزگە قانباي قالعان قۇماردىڭ، تولماي قالعان ءتالىمنىڭ، كورمەي قالعان كورەگەندىلىكتىڭ ورنى ولقى سوعىپ تۇرادى. اق ساقالدى قاريا مەن اق جاۋلىقتى انا كورسەك، ءبىز ىزدەگەن ءبىر جوقتىڭ ورنى تولار ما ەكەن دەپ ءالى كۇنگە جاۋتاڭ-جاۋتاڭ قارايمىز...

مۇمكىن مۇنداي جاعداي بارلىق بۋىننىڭ باسىندا بولاتىن شىعار. وسىدان توعىز عاسىر بۇرىن جازىلعان «اقيقات سىيىندا» احمەت يۇگىنەكي:

«دۇنيە ءبىر كەرۋەن ساراي-دى،

بار جۇراعات سودان تارايدى.

الدىڭعى تولقىن ءوتىپ كەتىپ،

ارتقى تولقىن سوعان قارايدى»

دەپ ايتىپ وتكەن عوي...

− وسى ويلاردىڭ اعىنىمەن قورىتىندى سۇراق ورنىنا سىزگە كوپتەن كوكەيدە جۇرگەن كەيبىر ساۋالدارىمدى قويسام دەيمىن. رۇقسات بولسا...

−       ارينە.

− ومىرلىك ءىس-تاجىريبەڭىز تەك مەملەكەتتىك مەكەمەلەرمەن بايلانىستى بولعان ەكەن. مەملەكەتتىك قىزمەتتەگى ەڭ كۇردەلى ماسەلە دەپ نەنى ايتار ەدىڭىز؟

− ءار ءىستى ءوزىنىڭ مامانى اتقارماۋىنان جانە ءار ىسكە جاناشىرلىق بولماۋىنان اسقان كۇردەلى ماسەلە جوق.

−       وسىنشا مول جۇمىستار اتقارۋداسىز. ءوپتيميسسىز بە؟

−       جوق. مۇلدە.

−       نەدەن ءۇمىت ەتەسىز؟

−       عايىپتان.

−       نەگە؟

− نە نيەتىمىزبەن، نە ارەكەتىمىزبەن نىعمەتكە لايىقپىز دەپ ويلامايمىن.

−       ەل رەتىندە مە، جەكە تۇلعا رەتىندە مە؟

−       مەنىڭ «مەنىم» مەن ء«بىزىمنىڭ» ايىرماشىلىعى جوق.

−       نەنى اڭسايسىز؟

−       سايىن دالانى، اي مەن كۇندى، ارعىماقتار ءدۇبىرىن.

−       نە نارسەگە قۋاناسىز؟

−       ءومىردىڭ وتكىنشىلىگىنە.

−       نەگە الاڭدايسىز؟

−       رۋحاني تاۋەلدى ەل بولۋ قاۋپىنە.

−       نەنى ارمان ەتەسىز؟

−       رۋحى ازات قازاق ەلىن كورۋدى ارمان ەتەمىن...

سۇحباتتاسقان شارافات رىسبايقىزى

دەرەككوزى: E-islam.kz