قوستاناي قالاسىنداعى «گەولوگ» ساياجايىندا رەسەيدىڭ تۋى جەلبىرەپ تۇر. كولەمى ورتاشا بولاتىن تۋ ساياجايداعى ءۇيدىڭ اۋلاسىنا تىگىلگەن. شەت ەلدەردىڭ جالاۋلارى ەلشىلىكتەردىڭ الدىندا تۇرۋشى ەدى عوي. بىراق ءبىز كورگەن جەر ەلشىلىك ەمەس. قالا سىرتىنداعى ساياجاي.

اتالعان جەر ۋچاسكەسىنىڭ كىمگە تيەسىلى ەكەنىن بىلە المادىق. يەسىن ىزدەپ بارعانىمىزدا ءبىزدى قاقپاداعى قارا قۇلىپ قارسى الدى. باسقا ءتىرى جان جوق. «تىرناق استىنان كىر ىزدەدى» دەپ سوگە كورمەڭىزدەر. كورگەن كوزدە جازىق جوق. ۇزىنقۇلاقتان ەستىگەنىمىزدى ەمەس، ءوز كوزىمىزبەن كورگەنىمىزدى جازىپ وتىرمىز.

قازاقستان ازاماتتارىنىڭ ارقايسىسى ءوزى قالاعان ەلدىڭ بايراقتارىن جەلبىرەتىپ ققويا بەرە مە؟ بۇعان ەندى نە دەۋگە بولادى؟ بىراق جالاۋلاتۋ ناۋقانىنا بەيجاي قاراماۋ كەرەك سياقتى. سەبەبى، مەملەكەتتىك تۋدى بالكونعا ىلگەن استانالىق جاندوس قۇرمانباەۆتىڭ باسى بالەگە قالدى. تۋعان جەرىندە ءوزىنىڭ مەملەكەتىنىڭ تۋىن جەلبىرەتكەن ازاماتقا قر «اكىمشىلىك قۇقىق بۇزۋشىلىق تۋرالى» كودەكسىنىڭ 458-بابى بويىنشا مەملەكەتتىك تۋدى زاڭسىز پايدالاندى دەگەن ايىپ تاعىلدى. سوماسى 396 400 تەڭگە بولاتىن ايىپپۇل سالىندى. زاڭنىڭ اتى – زاڭ. بۇل وقيعاعا قاتىستى بىرجاقتى پىكىر ايتۋدان اۋلاقپىز. بىرەۋدى جاقتاپ، بىرەۋدى داتتاۋ ءبىزدىڭ قۇزىرىمىزداعى دۇنيە ەمەس.

ءوزىمىز كۋا بولعان ساياجايداعى وزگە ەلدىڭ تۋىنا قاتىستى قوستاناي وبلىستىق پروكۋراتۋراسىنا حات جولدادىق. ازىرگە ءتيىستى ورگاننىڭ جاۋابىن كۇتۋدەمىز.

قىمبات دوسجانوۆا

سۋرەتتەردى تۇسىرگەن  تۇسىرگەن باعدات احمەتبەكوۆ

قوستاناي

Abai.kz