1 مامىر كۇنى الماتىدا ۇيعىردىڭ ءداستۇرلى تاعامى – لاعمان «بۇعان دەيىن الەمدە بولماعان» ەڭ ۇلكەن مولشەردە ازىرلەنىپ، گيننەستىڭ رەكوردتار كىتابىنا جاڭا رەكورد رەتىندە ۇسىنىلدى. 30 اسپاز ازىرلەگەن لاعمان سالماعى 680 كيلوگرامم بولعانىن Guinness World Records كومپانياسىنىڭ وكىلى بەندجامين بەكحاۋس تىركەپ جازىپ الدى.

لاعمان مەن ونىڭ تۇزدىعى بىرنەشە ۇلكەن ىدىستا دايىندالدى. سونان كەيىن بارلىعىن ءبىر ىدىسقا سالىپ ولشەدى. بۇدان سوڭ رەكورد لاعماننان وسى شارانى تاماشالاۋعا كەلگەن جۇرتتىڭ ءبارى اۋىز ءتيدى.

قازاقستان حالقىنىڭ بىرلىگى مەرەكەسىندە ازىرلەنىپ، جاڭا رەكورد ورناتقان لاعماندى «دوستىق لاعمانى» دەپ اتادى. «الەمدەگى ەڭ ۇلكەن لاعمان» جاساۋ باستاماسىنا قازاق گەوگرافيا قوعامى مۇرىندىق بولعان.

دەرەككوز: www.azattyq.org

اباي-اقپارات