بۇكىل قازاق قانا ەمەس، سونىمەن بىرگە تاۋەلسىز مەملەكەتتەر دوستاستىعى مەن الەم مادەنيەتىنەن ويىپ تۇرىپ ورىن العان بەلگىلى ءانشى ءارى سازگەر باتىرحان شۇكەنوۆ اياق استىنان قايتىس بولدى. ەرەكشە دارىنىمەن ەل ىقىلاسىنا بولەنگەن مادەنيەت قايراتكەرى ماسكەۋدەگى ءوز پاتەرىندە كەشە تۇندە كەنەتتەن ۇستاعان جۇرەك تالماسىنان كەتتى. بۇل تۋرالى اقپارات قۇرالدارىنىڭ وكىلدەرىنە سازگەر-ءانشىنىڭ اعاسى حابارلادى.

ونىڭ ايتۋىنا قاراعاندا، سوڭعى كەزدەرى باتىرحاننىڭ دەنساۋلىعى سىر بەرىپ، جۇرەك تۇسى شانشىپ اۋىرىپ جۇرگەن كورىنەدى. قازىرگى ۋاقىتتا ونى ماسكەۋدەن ەلىنە جەتكىزىپ، تۋعان ەلىندە جەر قوينىنا بەرۋ ماسەلەسى قاراستىرىلىپ جاتىر. «بۇل ماسەلەمەن قازىر جاقىن ادامدارىمىز اينالىسۋدا، — دەدى ءانشىنىڭ اعاسى الماتى اۋەجايىنان اتتانىپ بارا جاتىپ، — قايعىلى جاعداي ونىڭ ماسكەۋدەگى پاتەرىندە بولعان. ونىڭ ديرەكتورىنىڭ دا سول – باتىرحان تۇرىپ جاتقان ۇيدە تۇراتىنى جاقسى بولعان ەكەن، «جەدەل جاردەمدى» سول كىسى شاقىرىپتى. ايتسە دە، سوڭعى كەزدەرى دەنساۋلىعى قاتتى مازالاپ جۇرگەن باۋىرىمىزعا اق حالاتتى ابزال جاندار اراشا تۇرا الماپتى…».

نەبارى ەلۋ ءۇش جاسقا عانا اياق باسقان ايگىلى مۋزىكانت 1962 جىلدىڭ 18 مامىرى كۇنى قىزىلوردا قالاسىندا دۇنيەگە كەلگەن. ءوزىنىڭ ساز الەمىندەگى جۇلدىزدى جولىن ءانشى روزا رىمباەۆانىڭ توبىندا ساكسافونيست بولىپ باستاعان سازگەر 1988 جىلى ءوزىنىڭ جەكە باستاماسىمەن «ا-ستۋديو» توبىن قۇرىپ، كورەرمەندەرىنىڭ كوزايىمىنا اينالعان «دجۋليا» دەگەن انىمەن بۇكىل كەڭەس وداعىنىڭ، ونىڭ سوڭىن الا بۇكىل تاۋەلسىز مەملەكەتتەر دوستاستىعى كەڭىستىگىن جاۋلاپ العان بولاتىن.

كەيىننەن اتاقتى اللا پۋگاچەۆانىڭ توبىندا ونەر كورسەتكەن باتىرحان شۇكەنوۆ سوڭعى جىلدارى الەمدەگى مادەنيەت قىزمەتكەرلەرىنىڭ بەيبىتشىلىك ميسسياسىنىڭ وكىلى رەتىندە دە الەم كەڭىستىگىندە جارقىراپ شىقتى. «ا-ستۋديو» توبىنىڭ قۇرامىندا كەزىندە باتىرحان ورىنداعان «بەلايا رەكا»، «ستوپ، نوچ»، «ەتي تەپلىە لەتنيە دني»، «سولدات ليۋبۆي» دەگەن اندەر مۇقىم ۇلكەن-كىشى ءسۇيىپ تىڭدايتىن اندەرگە اينالدى. كەيىنگى "وتان-انا", "ساعىم دۇنيە" سەكىلدى اندەرى دە جۇرتشىلىق تاراپىنان جاقسى باعاسىن العان ەدى. جاڭا – جيىرما ءبىرىنشى عاسىردىڭ العاشقى جىلىنان باستاپ ءوزىنىڭ جەكە انشىلىك كارەراسىن دامىتا ءتۇسۋ ماقساتىندا باتىرحان شۇكەنوۆ «ا-ستۋديو» توبىنان ءبولىنىپ شىققان بولاتىن.

مارات ماداليموۆ

Abai.kz