ابايدىڭ سەمەيدەگى مەملەكەتتىك-قورىق مۇراجايىندا ۇلى اقىننىڭ 170 جىلدىعىنا، قازاقستان حالقى اسسامبلەياسىنىڭ 20 جىلدىعىنا وراي 24 ساۋىردە «اباي - الەم تىلدەرىندە» اتتى كورمە اشىلدى.

«ەڭ باستى ماقسات – اباي الەمىنىڭ بار قۇدىرەتىن، بولمىس-قۇپياسىن توتركۇل دۇنيەگە بارىنشا مول تانىتۋ. ابايدى جەتە تانىتۋ ارقىلى تۋعان حالقىمىزدىڭ مادەني كەلبەتىن، قادىر-قاسيەتىن، شىققان بيىگىن، رۋحاني جەتىستىكتەرىن الەمگە ايگىلەۋ»، - دەپ ەلباسى ن.نازارباەۆ ايتقانداي كورمەدە اباي مۇراسىن جان-جاقتى تانىتۋعا باسا نازار اۋدارىلدى.

مۇراجاي قورىندا جيناقتالعان 32 تىلگە اۋدارىلعان اباي شىعارمالارىنىڭ بىرەگەي جيناقتارى، قولجازبالارى، تاقىرىپقا بايلانىستى تاريحي فوتوسۋرەتتەر، شەتەل ەلشىلەرىنىڭ العىس-تىلەكتەرى، پىكىرلەرى، اۋدارماشىلار تۋرالى مالىمەتتەر، اۋدارماشىلاردىڭ حاتتارى العاش رەت كورمەگە شىعارىلدى.

كورمەنىڭ اشىلۋ سالتاناتىندا ديرەكتوردىڭ عىلىمي ىستەر جونىندەگى ورىنباسارى م.قايرامباەۆا ءسوز سويلەپ، «دوستىق ءۇيىنىڭ» ديرەكتورى ا.تلەۋباەۆ جانە ارداگەر ح.ماتاەۆ تۇساۋىن كەستى.

سەمەيدىڭ اباي اتىنداعى قازاق دراما تەاترىنىڭ اكتەرى ا.اشىمباەۆ اقىن وبرازىندا ولەڭمەن شاشۋ شاشتى. اباي مۇراجايىنىڭ عىلىمي قىزمەتكەرلەرى م.مۇحامەدوۆا، س.مۇقاتاەۆا، ر.ەلەكەنوۆا قازاق، ورىس، اعىلشىن تىلدەرىندە كورمە بويىنشا ەكسكۋرسيا جۇرگىزدى.

كورمەگە قالانىڭ ءار ۇلت وكىلدەرى، ارداگەرلەر، جوعارى وقۋ ورىندارىندا شەت ەلدەن كەلىپ ءبىلىم الىپ جاتقان ستۋدەنتتەر، مەكتەپ وقۋشىلارى، كوللەدج ستۋدەنتتەرى، زيالى قاۋىم قاتىستى.

اباي-اقپارات