ورتالىق سايلاۋ كوميسسياسى بەلگىلى قوعام قايراتكەرى ءۋاليحان قايساروۆتى قر پرەزيدەنتتىگىنە ۇمىتكەر رەتىندە تىركەۋدەن باس تارتتى. بۇل تۋرالى قر ورتالىق سايلاۋ كوميسسياسىنىڭ مۇشەسى ءلاززات سۇلەيمەن بۇگىن استانادا وتكەن بريفينگ بارىسىندا ايتتى.

«ۇمىتكەرلەردىڭ ءوز قولدارىمەن تولتىرعان مالىمەتتەرىن ورتالىق سايلاۋ كوميسسياسى مۇقيات تەكسەرۋدە. مىسالى، ءوز كانديداتۋراسىن ۇسىنعان ءۋاليحان قايساروۆ پرەزيدەنتتىككە كانديدات بولىپ داۋىسقا تۇسۋگە نيەت ءبىلدىرۋ تۋرالى وتىنىشىندە باسقا مەملەكەتتىڭ ازاماتتىعىندا تۇرعانىن ءوز قولىمەن كورسەتكەن. وسى ماسەلە بويىنشا ءبىز قر ءىىم-گە اتالعان دەرەكتەردى تەسكەرۋ ءۇشىن سۇراۋ جىبەردىك. سونداي-اق، وسى ۇمىتكەردىڭ مەملەكەتتىك تىلدە تولتىرعان ومىرباياندىق دەرەكتەرىندە بىرنەشە قاتەلەر بار ەكەنى انىقتالدى»، - دەدى ل.سۇلەيمەن.

ايتپاقشى، ءۋاليحان ءابىشۇلى قر پرەزيدەنتىن سايلاۋ ناۋقانىندا وسىمەن ءۇشىنشى رەت قاتارىنان ءوزىن ءوزى ۇمىتكەر رەتىندە ۇسىندى. دەگەنمەن، ۇشەۋىندە دە ونىڭ ءوتىنىمى قابىلدانعان جوق. الدىمەن 2005 جىلى وتكەن ساياسي ناۋقان كەزىندە قايساروۆ ءتيىستى مولشەردە قولداۋشىلارىنىڭ قولىن جيناي الماي جارتى جولدان سۇرىنسە، 2011 جىلعى سايلاۋدا قازاق تىلىنەن بولعان ەمتيحاندى ويداعىداي تاپسىرا العان جوق. ول جازعان ديكتانتتان 28 قاتە تابىلعان بولاتىن.

ال، بۇگىن بەلگىلى بولعانداي، ءۋاليحان قايساروۆ – قازاقستان رەسپۋبليكاسىنىڭ ازاماتى بولماي شىققان.

دەمەك، سايلاۋ تۋرالى كونستيتۋتسيالىق زاڭدى جاتقا بىلەتىن ساياساتكەردىڭ بۇل قادامى كوز الداۋ ما، الدە ماڭىزدى ناۋقاندى پايدالانىپ ۇپاي جيناۋ ما؟

اباي-اقپارات.