استانا قالاسىندا تۇراتىن جاندوس قۇرمانباەۆ دەيتىن ازامات بالكونىنا تۋ ىلگەنى ءۇشىن كىنالى سانالىپ، ايىپپۇل تولەۋگە ءماجبۇر بولىپ وتىر. جاندوستىڭ الەۋمەتتىك جەلىلەردەگى جازباسىنا سۇيەنسەك، ايگىلى بوكسشى، جەرلەسىمىز – گەننادي گولوۆكيننىڭ كەزەكتى جەڭىسىنە قاتتى قۋانعان ول ءوزى تۇراتىن كوپ قاباتتى ءۇيدىڭ بالكونىنا ەلىمىزدىڭ كوك بايراعىن ءىلىپ، جەلبىرەتىپ قويادى.

بار «بۇلدىرگەنى»  - وسى. بىراق، جاندوستىڭ مۇنداي پاتريوتتىعىن جاقتىرماعان الدەكىم تاپ سول كەزدە قالالىق اكىمشىلىككە قوڭىراۋ شالىپ، ماسەلەنىڭ ءمان-جايىمەن قۇلاعدار ەتىپ ۇلگەرەدى. ال، الگىندەي حابار العان اكىمشىلىك قىزمەتكەرلەرى قاراپ قالسىن با، «مەملەكەتتىك رامىزدەردى زاڭسىز پايدالانعانى ءۇشىن» جاندوستىڭ جانىن شىعارماسا دا، زاڭدى كولدەنەڭ توسىپ، ونى ايىپپۇلعا جىعىپ جاتىر.

- بىزگە، - دەيدى استانا قالاسى اكىمدىگى ىشكى ساياسات باسقارماسىنىڭ ءبولىم باستىعى گۇلجان ەلەۋباەۆا، - قالا تۇرعىندارىنىڭ ءبىرى قوڭىراۋ سوعىپ ايتتى. سوسىن ءبىز تەز جينالىپ، ءىستىڭ اق-قاراسىنا كوز جەتكىزدىك. ناتيجەدە ازامات جاندوس قۇرمانباەۆ «مەملەكەتتىك رامىزدەردى زاڭسىز پايدالانعانى ءۇشىن» 394 400 تەڭگە ايىپپۇل تولەيتىن بولدى.

وتانداسىنىڭ جەڭىسىنە جەلپىنىپ، بالكونىنا تۋ ىلگەنى ءۇشىن ءوزىن كىنالى سانامايتىن جاندوس زاڭگەرلەردىڭ كەڭەسىنە جۇگىنىپ، اكىمشىلىكتىڭ شەشىمىنە قارسى شىعاتىندىعىن ايتادى.

جاندوس قۇرمانباەۆتىڭ فەيسبۋكتەگى جازباسى قوعامدىق پىكىرگە ۇلكەن قوزعاۋ سالۋدا. قۇرمانباەۆتىڭ پاتريوتتىعىن قولداۋشىلار: «مۇندا تۇرعان نە بار؟ شەتەلدەردە، مىسالى، تۇركيادا تۋ ىلىنگەن بالكوندار وتە كوپ. بۇل - ەلدىڭ وتانشىلدىعىن، ءوز مەملەكەتىن ەرەكشە قادىرلەپ جاقسى كورەتىندىگىنىڭ بەلگىسى ەمەس پە؟» دەيدى.

(جاندوستىڭ الەۋمەتتىك جەلىدەگى دوستارىنىڭ ءبىرى بالكونىنا لاتىش ەلىنىڭ تۋىن ءىلىپ قويدى. "قازاقستاندا قازاقتىڭ تۋىنان باسقا تۋلاردى كوتەرىپ نەمەسە كورنەكى جەرگە قويىپ جۇرە بەرۋگە بولادى. مىنە، مەن لاتۆيانىڭ تۋىن بالكونىما جايىپ قويدىم. ەشكىم ەشتەڭە دەمەيدى. جاندوستى وتانشىلدىعى ءۇشىن جازىقتى قىلعان اكىمىشىلىك شەشىمى وزگەرمەگەنشە، مەن وسىلاي الەم ەلدەرىنىڭ تۋىن بالكونىما بىرىنەن كەيىن ءبىرىن ىلە بەرەمىن. سەندەر دە سويتىڭدەر" دەپ جازادى ول)

سونىمەن، كاسىپقوي بوكس الەمىندە GGG اتالىپ جۇرگەن گەننادي گەنناديۇلى گولوۆكيننىڭ جەڭىسىنە قۋانىپ، ەل بايراعىن بالكونىندا تولقىتقان قازاق بالاسى ايىپپۇل تولەمەك. ءبىر قىزىعى، قازاقستان مەملەكەتىنىڭ تۋىنان قوقىس تاسيتىن قاپ پەن سۇيرەتپە جاساعاندار ءدال جاندوسشا «جازالانا» قويماعان ەدى. سونداي-اق، وزگە ەلدىڭ جالاۋى مەن تۋىن كوتەرىپ، مەرەكەلى شەرۋلەر وتكىزىپ جۇرگەندەر دە قازاقستاندىق بيلىك پەن زاڭ تاراپىنان شەكتەۋ كورگەن ەمەس.

Abai.kz