وسىدان ەكى ءۇش جىلدىڭ الدىندا مۇقاڭنىڭ (مۇحتار ماعاۋين) «كەسىك باس ء–تىرى تۇلىپ» حيكاياسىنىڭ اسەرلى تۇستارىنان قازىرگى موڭعول تىلىنە اۋدارىپ ۇزىندىلەر جاريالاعان ەدىم. سول-اق ەكەن، «قۇدا تۇسۋشىلەر» كوبەيىپ، حيكاياتتى تولىق اۋدارىپ بەرۋدى، سونىڭ جەلىسىندە فيلم ءتۇسىرۋدى قالاعاندار دا تابىلا كەتتى.

عالىم بوقاش باۋىرىم ارقىلى مۇقاڭنان اۋدارۋعا رۇقساتىن الىپ، اۋدارىلعان نۇسقاسىن ۇلانباتىرعا جىبەردىم. بىزدە بولماعان قىزۋ تالقىلاۋ سول جاقتا ءجۇرىلدى. ونىڭ كوركەم شىعارما ەكەنىن تۇسىنگەندەر، ءبىر ءسوزىن دە قالىس قالدىرماي، ادەبيەت تۇرعىسىندا كەڭىنەن تالقىلاپ، ونىڭ جالپى كوشپەندىلەر تاريحىندا تەڭدەسى جوق تۋىندى ەكەنىن مويىنداپ جاتسا، كەلەسى توپ شىعارماعا قولداۋ كورسەتكەن ادامداردى سىناپ، ونىڭ موڭعوليانىڭ تاۋىلسىزدىگىنە قاتىستى كوپتەگەن «قۇپيانىڭ» پەردەسىن اشاتىنىن ايتىپ، شىعارمانىڭ جاريا ەتىلۋى موڭعول وقىرماندارىنا كەرى اسەر بەرەتىنىنەن ساقتاندى. تالاستىڭ اياعى ويرات پەن قالقانىڭ جەكە نامىسىن قوزدىردى. ونىڭ سەبەبى، ورىس تاراپىنان ارنايى دايىندالعان جانسىز دامبيجانتسان تۋرالى كەيبىر اقيقاتتارى ءالى كۇنگە ورتالىق موڭعول تاراپىنان اشىق ايتىلمايتىنىندا بولاتىن. ورتالىق، قالقا موڭعولدار دامبيجانتساندى «موڭعوليانى ءبولۋشى» دەپ قاراستىرسا، دەموكراتيالىق توڭكەرىستەن كەيىنگى ويراتتىڭ عالىم، جازۋشىلارى وعان شاڭ جۋىتقىسى كەلمەيدى. كەيبىر جاعدايدا، ونى «ويراتتىڭ كوسەمى» دەپ ايتاتىن دا ۇلتشىلدار جەتەرلىك. الايدا، مۇقاڭنىڭ ناقتى تاريح جەلىسىمەن، سونشالىقتى بيىك دەڭگەيدە جازىلعان بۇل شىعارماسى ءوز باعاسىن الدى، موڭعولدارعا جەتتى. ەندىگى كەزەكتە ونىڭ كىتاپ بولىپ جارىق كورۋى، قازىرشە توقتاپ تۇرعان ءتۇسىرىلىم تولىقتالىپ، جەكە فيلم (شىعارماشىلىق قۇپياعا بايلانىستى رەجيسسەردىڭ اتىن اتامادىق) بولىپ شىعاتىنىنا سەنەمىن.

«قازىرگى كوشپەندىلەردىڭ اراسىنداعى ەڭ ۇلى جازۋشى» دەگەن اتاقتى مۇقاڭا ونى جاقتايتىن موڭعولدار بەردى. «شىڭعىس حاندى» اۋدارساڭىز دەگەن دە ۇسىنىس تۇسۋدە... ونى ەندى ۋاقىت كورسەتەر. مۇمكىن، دەنساۋلىعىمىز سىر بەرمەسە...

جۇكەل حاماي.

اباي.kz