قر پارلامەنتى ءماجىلىسى توراعاسىنىڭ ورىنباسارى داريعا نازارباەۆا باستاعان قازاقستاندىق دەلەگاتسيانىڭ گەرمانياعا جانە ليحتەنشتەين كنيازدىگىنە رەسمي ساپارمەن باردى. بۇل تۋرالى ءماجىلىستىڭ ءباسپاسوز حابارلادى. 

ساپاردىڭ نەگىزگى ماقساتى – 2017-2018 جىلدارعا بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە قازاقستاننىڭ كانديداتۋراسىن جىلجىتۋ، سونداي-اق، ەكى ەل اراسىنداعى پارلامەنتارالىق ءوزارا ءىس-قيمىلدىڭ قازىرگى احۋالى مەن كەلەشەگىن تالقىلاۋ.

باعدارلاما اياسىندا بەرليندە بۋندەستاگ توراعاسىنىڭ ورىنباسارى يوحاننەس زينگحاممەرمەن جانە بەرلين سەناتىنىڭ سپيكەرى رالف ۆيلاندپەن جانە بۋندەستاگ دەپۋتاتتارى – سانفرەد گرۋند باستاعان «گەرمانيا – ورتالىق ازيا» دوستىق پارلامەنتتىك توپ مۇشەلەرىمەن كەزدەسۋ ءوتتى. كەزدەسۋ بارىسىندا قازاقستان مەن گەرمانيانىڭ پارلامەنتارالىق بايلانىستارىن نىعايتۋ ماسەلەلەرى كەڭىنەن تالقىلاندى. وسى رەتتە تاراپتار 90-جىلدارى تاريحي وتانىنا ورالعان ەتنيكالىق نەمىس ازاماتتارىنىڭ ء«بىزدىڭ ەلدەرىمىزدىڭ اراسىن بايلانىستىراتىن كوپىر» ەكەندىگى ايتىلدى. اسىرەسە، حالىقارالىق كۇن تارتىبىندەگى وزەكتى سۇراقتارعا نازار اۋدارىلدى.

گەرمانيالىق تاراپ قازاقستاننىڭ «تەك ورتالىق ازيادا ەمەس، جالپى ازيا اۋماعىندا تۇراقتىلىق كەمەسى» بولا ءجۇرىپ، عالامدىق ساياساتتىڭ ەڭ جاۋاپتى جەرلەرىندە قوماقتى تاجىريبە جيناپ، حالىقارالىق قاتىناس الاڭىندا ماڭىزدى ەلگە اينالعانىن ايتۋدا. سونىمەن قاتار، قازاقستان پرەزيدەنتىنىڭ ۋكرايناداعى جاعدايدى رەتتەۋگە قاتىستى دانەكەرلىك رولىنە اسا جوعارى باعا بەرە وتىرىپ، ءوز تاراپتارىنان مينسك كەلىسىمدەرىن جۇزەگە اسىرۋ اياسىندا جانجالدى بەيبىت جولمەن شەشۋ ءۇشىن بار كۇش-جىگەرلەرىن جۇمىلدىراتىنىنا سەندىردى.

ال، گفر سىرتقى ىستەر مينيسترلىگىنىڭ ستاتس-حاتشىسى ماركۋس ەدەرەرمەن كەزدەسۋىندە داريعا نازارباەۆا قر پرەزيدەنتىنىڭ 2017-2018 جىلدارعا قازاقستان كانديداتۋراسىن بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە جىلجىتۋ ماسەلەلەرى جونىندەگى ارنايى وكىلى رەتىندە گەرمانيا كانتسلەرى ا.مەركەلدىڭ اتىنا ەلباسىنىڭ جولداۋىن تابىس ەتتى.

دەلەگاتسيا باسشىسى كەزدەسۋ يەلەرىن قازاقستاننىڭ ايماقتىق جانە حالىقارالىق تۇراقتىلىق پەن قاۋىپسىزدىكتى نىعايتۋ جولىندا اتقارىپ جاتقان جۇمىستارىنان حاباردار ەتتى. وسى رەتتە يادرولىق قارۋسىزدانۋ جانە تاراتپاۋ، سونداي-اق، اوسشك جانە ەقىۇ اياسىنداعى بەلسەندى ءىس-قيمىلدارعا نازار اۋدارىلدى. د.نازارباەۆا قازاقستان تاراپىنان اۋعانستانعا جاسالىپ جاتقان گۋمانيتارلىق جانە تەحنيكالىق كومەكتەردى دە ءسوز ەتتى. ايتا كەتەرلىگى، 2010 جىلدان بەرى مىڭداعان ستۋدەنتتەردىڭ قازاقستان جوعارى وقۋ ورىندارىندا ەركىن ءبىلىم الۋىنا جول اشقان ءبىلىم باعدارلاماسى جۇزەگە اسىرىلۋدا.

قازاقستاننىڭ مادەنيارالىق جانە دىنارالىق ۇنقاتىسۋدى قولداۋ ءارى دامىتۋ جولىنداعى قوسىپ جاتقان ۇلەسى دە جان-جاقتى باياندالدى.

د.نازارباەۆا گەرمانيانىڭ قوعامدىق-ساياسي جانە ىسكەر توپتار وكىلدەرىمەن كەزدەسۋىندە ەلباسىنىڭ وتكەن جىلدىڭ قاراشا ايىنداعى «نۇرلى جول – بولاشاققا باستار جول» جولداۋىندا ايتىلعان قازاقستاننىڭ جاڭا ەكونوميكالىق ساياساتىنىڭ نەگىزگى باعىتتارىنا جانە ەلدەگى ينۆەستيتسيالىق كليماتقا توقتالدى.

تاراپتار ەكى ەل اراسىندا، سونىڭ ىشىندە ەۋرازيالىق ەكونوميكالىق وداق اياسىندا ساۋدا-ەكونوميكالىق ىنتىماقتاستىقتى كەڭەيتۋ مۇمكىندىكتەرىن تالقىلادى.

اباي-اقپارات.