وڭتۇستىك قازاقستان وبلىسىنىڭ ارىس قالاسىندا ەكىنشى سىنىپتا وقيتىن كىشكەنتايدىڭ قىزدىڭ اتا-اناسى بالدىرعاننىڭ باسىنا ورامال تارتۋىنا رۇقسات بەرۋدى تالاپ ەتىپ وتىر.

ەكىنشى سىنىپ وقۋشىسى ايشا ەسكەرمەس 17 قاڭتار كۇنى مەكتەپكە... العاش رەت باسىنا ورامال سالىپ كەلدى. ءبىلىم ورداسىنىڭ باسشىلىعى، ارينە، باسىنداعى ورامالىن شەشپەسە، قىزدىڭ ساباققا قاتىستىرىلمايتىنىن ەسكەرتكەن. بۇعان قىزدىڭ اكەسى رۋسلانبەك ءابىلوۆ مىناداي ءۋاج ايتىپتى: ء«بىز يسلام ءدىنىن ۇستانامىز، ال قاسيەتتى قۇراندا – «نۇر» سۇرەسىنىڭ 31-اياتىندا – بارلىق ايەل زاتى باسىنا ورامال سالىپ، ۇزىن كويلەك كيۋى كەرەك دەلىنگەن. ءبىز قىز بالا اۋرەتتى جەرلەرىن جاۋىپ ءجۇرۋ كەرەك دەپ ەسەپتەيمىز، ءسويتىپ، وسىنداي شەشىمگە كەلدىك».

ءبىلىم ۇياسىنىڭ باسشىلىعى ايشانىڭ مەكتەپتەگى قالىپتاسقان كيىم ۇلگىسىن بۇزىپ وتىرعانىن ايتادى. ونىڭ ۇستىنە، جارعى بويىنشا ۇلدار دا، قىزدار دا ساباق ۇستىندە باس كيىم كيىپ وتىرماۋعا ءتيىس.

«17 قاڭتاردان باستاپ ايشا مەكتەپكە ورامال تارتىپ كەلەتىن بولدى. اتا-اناسىن شاقىرىپ الىپ، سويلەستىك، ەلىمىزدەگى ءبىلىم بەرۋ تۋرالى زاڭناماعا سايكەس وقۋشىلاردىڭ ءبارى دە مەكتەپتىڭ ىشكى ءتارتىبى مەن ەرەجەسىنە باعىنۋعا ءتيىس ەكەنىن تۇسىندىردىك. سوسىن اتا-انالار جينالىسىن وتكىزدىك، ال ولاردىڭ 99 پايىزى مەكتەپ باسشىلىعىنىڭ ۇستانىمىن قولدادى. ءتىپتى «ايشا ەسكەرمەستى باسقا مەكتەپكە اۋىستىرۋ كەرەك» دەۋشىلەر دە شىقتى»، – دەيدى مەكتەپتىڭ وقۋ ءىسىنىڭ مەڭگەرۋشىسى تالعات احمەتوۆ.

قالالىق ءبىلىم بەرۋ باسقارماسى دا مەكتەپ باسشىلىعىنىڭ كوزقاراسىن قولدايتىنىن ءبىلدىردى، بىراق «ورامال تارتۋعا بولمايدى» دەگەن ءۇزىلدى-كەسىلدى تىيىمنىڭ دا زاڭنامادا جوق ەكەنىن اڭعارتتى. وقو باس يمامىنىڭ كومەكشىسى وركەن ساپارقۇلوۆ تا مەكتەپ ۇستانىمى جاعىنا شىعىپتى. ول قىزدىڭ اتا-اناسىنا: «ەلدەگى قالىپتاسقان ەرەجە مەن مەكتەپتەگى ءتارتىپ ءتىپتى دە يسلام قاعيداتتارىنا قايشى ەمەس، ال ورامالدى قىز بالالار ساباقتان تىس ۋاقىتتا تارتا بەرۋىنە بولادى»، – دەپ ءتۇسىندىرىپتى.

ەكى جاقتا ءوز ۇستانىمدارىنان اينىماي وتىر. ەندى رۋسلانبەك ءابىلوۆ پروكۋراتۋراعا شاعىم تۇسىرسە، ۇستازدار قاۋىمى قۇقىق قورعاۋ ورگاندارىنىڭ كومەگىنە جۇگىنبەك.

Abai.kz