قۇرمەتتى وقىرمان، ينتەرنەتتەن ءسانىمنىڭ زاتتىبەك پەن تۇرسىنبەككە ارناعان رومانتيكالىق ءازىلىن كورگەن بولارسىز. دەگەنمەن، قازاق رەپى تۋرالى نە بىلەسىز؟ ءسىز قازاق رەپىنىڭ «بەتپەردەسى» شەشىلگەنىن بىلەسىز بە؟

بارىمىزگە بەلگىلى، ەلىمىزدە ۇلكەندەر جاعى قازاق رەپىنە قارسىلىق تانىتىپ ءجۇر. مەنىڭشە، بۇل - بەكەرشىلىك ءىس. ۇلكەندەردىڭ اتالمىش باعىتقا ءتىپتى كوڭىل دە بولمەۋىن وتىنەر ەدىم. ەلگە تانىلعان قازاق رەپەرلەرىنەن جاقاۋ، شوقان، شىڭعىستى اتاۋعا بولادى.

جاقاۋ رەپتىڭ ەش پايدا بەرمەيتىنىن بۇرىننان دا ايتىپ جۇرگەن بولاتىن. ال قازىر ول رەپ ساحناسىن بوساتتى. بالا-شاعاسى بار امانگەلدىنى (جاقاۋ) رەپ اسىرادى دەسەڭىز، كۇلكىگە قارىق قىلاسىز. شوقانعا كەلسەك، قازىرگى تاڭدا ونىڭ دارەجەسى تومەندەپ كەتكەن. شىڭعىستىڭ جاعدايى ايتپاسا دا تۇسىنىكتى. سونىمەن قاتار ساپالى ءونىم جاسايتىن اتىراۋلىق تارلان دەگەن جىگىت بار. بەلگىلى ءبىر كومپانيانىڭ قىزمەتكەرى رەپ ارقىلى كۇنىن كورەدى دەپ ويلاي كورمەڭىز. 2012 جىلى جاريا ەتىلگەن «قانسوناردا» البومى بيىل عانا شىقتى. ءيا، بۇل البوم دا رەپپەن اينالىسۋدىڭ بوس ارەكەت ەكەندىگىن دالەلدەدى. جالپى، ادامنىڭ رەپتە ءومىر ءسۇرۋى مىناداي سەبەپتەرىن كورسەتسە كەرەك:

1) رەپەر دە كەز كەلگەن شىعارماشىلىق ادامى (ايتارى بار ادامدار توبى) سەكىلدى رۋحاني الەمگە بويلايدى;

2) اتاق-ابىرويدى ماقسات ەتىپ (ايتارى جوق ادامدار توبى), بار كۇشىن سوعان جۇمسايدى;

3) قاراپايىم ەلىكتەۋشىلىك.

جاقاۋ مەن تارلاننىڭ جىرىنداعى ءماتىندى زەرتتەيتىن بولساق، ماعىنانى دا، ادەبي ۇيقاستى دا تابامىز. ال شىڭعىس پەن شوقاننىڭ جانە قالعان قازاق رەپەرلەرىنىڭ ماتىندەرىن قارايتىن بولساق، پەشكە جاعىپ، ءۇيدى اعاشسىز جىلىتۋعا بولادى. سوندىقتان جاقاۋ مەن تارلاندى اقىندىق شابىت ءاردايىم مازالاپ تۇراتىنى انىق.

ۇلكەندەر جاعى بىلە بەرمەيتىن بولار، بىراق ەلىمىزدە قازاق رەپى جوق. رەپەرلەردىڭ ءبىر بولىگى ءوز ءومىرىن جىرلاسا، ەكىنشى بولىگى پيار جاساپ، اتاق جيناۋمەن اۋرە. ءبىر جاعىنان، قازىرگى تاڭدا ستۋديادا ترەك جازدىرۋ تىم قولجەتىمدى. Youtube-تە «Kery tart» («كەرى تارت») دەگەن باعدارلامادا ەلىمىزدەگى رەپكە قىسقا-نۇسقا ساراپتاما جاسالىنادى. ونى قازاقتىڭ قاي بالاسى جۇرگىزەتىنىن بىلمەيمىن. دەگەنمەن، وسى ارنادا قازاق رەپىنىڭ بەتپەردەسى شەشىلىپ، ماسقاراسى شىعىپ جاتادى.

وقىرمان جۇرت بىلمەۋى مۇمكىن، سوندىقتان قازاق رەپىندەگى نەگىزگى جاڭالىقتاردى ايتا كەتەيىن. «اش قازاق پرو» ۇيىمى جابىلعانىمەن، «دجيحانگەر Music» بوپ جالعاسىن تاپتى. سايكەسىنشە، بۇل ۇيىمدا جاستار بۇرىنعىداي كوپ ەمەس. ءيا، Sanim دە وسى ۇيىمنىڭ مۇشەسى. ەكى توپتىڭ دا باسشىلىعى شىڭعىسقا بۇيىرعان. ال ول Sanim سەكىلدى جاس كەزىندە جاقاۋعا «diss» (قۇرمەتسىزدىك بەلگىسىندەگى رەپ) جازىپ، وزىنە پيار جاساعان بولاتىن. سول جىلدارى تىڭدارماندار ەكى جاقتىڭ رەپ-ايتىسىن باقىلاۋمەن بولدى. ناتيجەسىندە «اش قازاقتار» كوزدەگەن ماقساتىنا جەتىپ، تىڭدارمانداردىڭ تەلەفونىنان تابىلدى.

«دجيحانگەر Music» بيىل توعىزىنشى رەپ-ايتىستى وتكىزگەلى جاتىر. نەگىزى، شىڭعىس مۇنداي نارسەمەن اينالىسپايتىنىن ايتقان ەدى. جالىققان بولار، سوندىقتان مۇنداي پيار جاساۋ ارەكەتىنە كوشتى. سەبەبى، بۇعان دەيىن وتكىزىلگەن رەپ-ايتىستار كوزبوياۋشىلىققا تولدى، جەڭىمپازدار سىيلىقسىز قالدى. ءبىر جاعىنان، جەڭىمپازدار قاتارىنان تەك جاقسى قارىم-قاتىناستا بولعاندار تابىلدى. سونىمەن قاتار ەرىككەن رەپەرلەر ءبىر-بىرىمەن جاۋلاسۋ ارقىلى دا «جەر ورتەپ» اتىن شىعارۋدا.

جالپى، رەپ دەگەن - مۋزىكالىق باعىتتاردىڭ ءبىرى. بىزگە بۇل رەسەي ارقىلى جەتكەسىن، البەتتە، ءبىزدىڭ جۇگەرمەكتەر سولاردان كوشىرەدى، ەلىكتەيدى. سونىمەن قاتار مۋزىكا الەمىندەگى كەز كەلگەن ءانشى (توپ) جوبا بولىپ سانالادى. جوبانىڭ ساپاسى ارتقان سايىن ونى تۇتىنۋشىلار كوبەيەدى. ال جوبانىڭ ساپاسىن جاۋاپكەرشىلىككە الاتىن بىردەن-ءبىر ادام – پروديۋسەر. كۇلكىڭىز كەلەر، بىراق بىزدەگى قازاق رەپىندە پروديۋسەرلەر جوق. تەك ستۋديالىق جابدىقتار جاعىنان ەرەكشەلىكتەر بولادى.

Sanim دە - ۋاقىتشا جوبا. ول دا ءبىر كۇنى بۇل ىسىنەن جالىعىپ، ەكى قولعا كۇرەك تاباتىنى ءسوزسىز. ءيا، رەپ باعىتىنا كوبىنەسە داۋىسى جوق انشىسىماقتار كەپ جاتادى. ەسترادا جانرىنىڭ دا كۇنى وسى. داۋىسى جوق انشىلەر توي ارقىلى «قايرات نۇرتاسقا» اينالعىسى كەلەدى. «اش قازاقتىڭ» جابىلىپ، قايتا قۇرىلۋى، جاقاۋدىڭ رەپتەن كەتۋى، شىمكەنتتىك Baller-ءدىڭ دە جاستاردى الداۋى، ت.ب. قازاق رەپىندەگى جاڭالىقتار بۇل باعىتتىڭ قازاق بالاسىنا ابىروي اكەلمەيتىنىن دالەلدەي ءتۇستى. سۇيىكتى ءىسىم دەپ اينالىسۋ – ادامنىڭ ءوزىن-ءوزى الداۋى. جاستاردىڭ بۇل باعىتقا بەرىلەتىنى ەلىكتەۋىندە جاتىر. جاسىراتىنى جوق، رەپەرلەر ءوز جىرلارىن «تاۋار»، ء«ونىم» دەپ ەسەپتەيدى.

مۋزىكانىڭ ادامعا اسەرى وتپەي قويمايدى. ادام جاقسى مۋزىكانى تىڭداعان سايىن جان دۇنيەسى جاقسارا باستايدى. ال ءبىزدىڭ رەپەرلەردىڭ جىرلاپ جۇرگەنى: قوسىلماعان ماحاببات، اگرەسسيالى قىرام-جويام، ت.ب. نەگىزى، قازىرگى تاڭدا رەپ اۋەندەردى وقۋشىلار مەن ستۋدەنتتەر تىڭدايدى. ولاردىڭ مىنەزىنە، تاربيەسىنە ماعىناسىز رەپتەردىڭ زيانى تيمەي قويمايدى.

Sanim-گە ورالساق، ونىڭ بۇل كليپى - بار بولعانى پيار جاساۋدىڭ ارەكەتى ەكەنى ايدان انىق. بايقاساڭىز، «رومانتيكالىق ءازىل» دەپ الدىن-الا جاۋابىن دا دايىنداپ وتىر. تۇرسىنبەك پەن زاتتىبەك ەسترادانىڭ ادامى بولعاندىقتان، Sanim-ءدى تانىمايتىن ەسترادا كوپ كەشىكپەي ونى ءسوز ەتەتىن بولادى. ال ار جاعىندا «دجيحانگەر Music» ۇيىمىنا جارناما جاسالادى. مەنىڭشە، بۇل «قۋىندى» نەمەسە «جۋىندى» ۇيىمنىڭ جوسپارىنداعى بار دۇنيە سياقتى.

رەپەرلەردىڭ كونتسەرتتىك بيلەتى 500 تەڭگەدەي-اق بولار. بىراق بۇل 500 تەڭگە قالتاڭىزعا سىيماي جاتسا، جاقىنىڭىزعا سىيلىق جاساۋعا مۇمكىندىگىڭىز بار. ال تەلەفونىڭىزدى بولاشاعى جوق رەپەرلەردىڭ ساپاسىز، ماعىناسىز اندەرىنە تولتىرعان بولساڭىز، ونىڭ جادى تولىپ كەتەدى. بىلەسىز بە، ءبىر رەپ كەمىندە 5 مب-تان جوعارى بولسا، اكە-شەشەڭىزدىڭ، جاقىندارىڭىزدىڭ ءبىر سۋرەتى 1 مب-تان ارەڭ اسادى. قۇرمەتتى وقىرمان، ءسىزدىڭ تاڭداۋىڭىزعا، شەشىمىڭىزگە قارسىلىعىم جوق، بىراق جاس كەزدە ۋاقىتتى ءبىلىم الۋعا، كىتاپ وقۋعا، ۇيرەنۋگە جۇمساعان دۇرىس. ءيا، ەرىككەن قازاق رەپەرلەرىنىڭ، قازاق رەپىنىڭ ارقاسىنان قاعاتىن ادامدار تابىلار، الايدا كوزى اشىق، ساناسى وياۋ، وڭ-سولىن اجىراتا بىلەتىن ازاماتتار وعان قۇرمەت كورسەتپەيدى، ۋاقىتىن دا بولمەيدى.

مەدەت جانسانوۆ.

اباي.kz