قازاقستان كوممۋنيستەرىن  تۇلەن ءتۇرتتى. بۇل جولعى تۇلەن تۇرتكەن اڭگىمەنى باسقانىڭ ەمەس، باقانداي دەپۋتاتتىڭ اۋزىنان ەستىدىك.

بىلدەي دەپۋتاتىمىز قازان توڭكەرىسىنىڭ 100 جىلدىعى اياسىندا ماسكەۋدىڭ كرەملىندە جاتقان پرولەتاريات كوسەمى لەنيننىڭ دەنەسىن قازاقستانعا اكەلىپ الۋدى ۇسىنىپتى.

لەنيننىڭ ءولى دەنەسىن ەلىمىزگە اكەپ العىسى كەلەتىن كوممۋنيست -  قر پارلامەنتى ءماجىلىسىنىڭ دەپۋتاتى، حالىقتىق كوممۋنيستەر فراكتسياسىنىڭ وكىلى ۆلاديسلاۆ كوسارەۆ ەكەن.

قازاقستان پارلامەنتىنىڭ ەڭ كارى دەپۋتاتى (ونىڭ جاسى 80-نەن  استى) Informburo.kz-گە بەرگەن سۇقباتىندا ۆلاديمير ءيليچتىڭ دەنەسىن قازاقستانعا اكەلۋگە ابدەن بولاتىنى ايتىپتى.

«ءبىز بۇل ماسەلەنى اۋىق-اۋىق كوتەرىپ تۇرامىز. بۇل ابدەن مۇمكىن نارسە. قازاقستانعا لەنيننىڭ دەنەسىن الىپ كەلۋگە بولار ەدى، بىراق ءبىزدىڭ كۇشىمىز ءالسىز، ول تۇگىلى ءبىز بيلىككە قوقىسقا كەتكەن ەسكەرتكىشتەردى قايتا ورناتتىرا الماي وتىرمىز»، — دەيدى كوسارەۆ.

ال ورىس جۇرتى بۇل تۇستا لەنيننىڭ دەنەسىن جەرلەۋ ماسەلەسىن اقىلداسىپ جاتىر. رەسەي دۋماسىنىڭ ءبىر توپ دەپۋتاتى  لەنيندى جەرلەۋدى ۇسىنعان. ال رەسەي حالقىنىڭ 63 پايىزى پرولەتاريات كوسەمىن كومۋ كەرەك دەپ داۋىس بەرگەن.

«كاپيتاليستىك الەمنىڭ لەنينگە دەگەن وشپەندىلىگى جويىلماي كەلەدى. ءبىزدىڭ قوعامدى جاڭارتىپ، ونى كاپيتاليزمگە اينالدىرعىسى كەلەتىندەر كەڭەس زامانىن ەسكە تۇسىرەتىن جەر بەتىندەگى  نارسەنى تۇگەل سىپىرىپ تاستاۋعا بار. بىراق بۇل اپتىق تا باسىلار. مەن رەسەيدەگى كوممۋنيستەرگە كۇشىمىزدى بىرىكتىرەيىك، ءسويتىپ وسىنداي دۇنيەلەرگە جول بەرمەيىك دەگىم كەلەدى» — دەيدى كوسارەۆ.

ءتۇيىن: قازاق حانى كەڭەسارىنىڭ باس سۇيەگىن ەلگە قايتارۋ ماسەلەسىندە ء"لام-ميم" دەمەگەن، كەشەگى كەيكى باتىردىڭ باسىن ەلگە جەتكىزەردە جىمداي بولىپ، جاق اشپاعان كوسارەۆتى نە تۇلەن ءتۇرتتى؟

انىعىندا، پوستكەڭەستىك كەڭىستىكتەگى كوپ ەل سابەتتىڭ سارقىنشاعىنان ارىلۋدى قولعا الۋعا باياعىدا كىرىسىپ كەتكەن. مىسالى، ۋكراينا سوۆەتتىك كەزەڭنىڭ قالدىقتارىنان ارىلۋ ءۇشىن لەنيننىڭ بارلىق ەسكەرتكىشتەرىن قۇلاتقان بولاتىن.

ارۋاعى اداسقان، ءتانىن جەر قابىلداماعان ۆلاديمير يليچ لەنيننىڭ ەسكەرتكىشتەرى قازاق دالاسىندا كۇنى بۇگىنگە دەيىن سامساپ تۇر. دالىرەك ايتساق، بولشەۆيك كوسەمىنىڭ باقانداي 159 ەسكەرتكىشى بار بىزدە. 

لەنين اتانى ۇلىقتاۋدا اقمولا وبلىسى الدا تۇر. وڭىردە لەنيننىڭ 49 ەسكەرتكىشى انىقتالعان. ال كەرەكۋ وڭىرىندە 44, سولتۇستىك قازاقستان وبلىسىندا 24 تاس تۇعىر بار.

بۇل ماقتانىش پا، الدە وتارشىلدىق سانادان ارىلا الماۋشىلىق پا؟

ول ول ما، جاقىندا بەلگىلى بولعانداي قازاقستاندا بۇگىندە لەنيننىڭ اتىمان اتالاتىن 352 كوشە بار ەكەن. بۇل انىعىندا، گەرونتوكراتيالىق جۇيەگە نەگىزدەلگەن بيلىكتىڭ شيرەك عاسىرلىق جۇمىسىنىڭ جەمىسى. نەمەسە حالىق ساناسى ازات بولعانىمەن، بيلىك ەسكى قوعام فورماتسياسىنان ءالى كۇنگە ارىلا الماي كەلەدى دەگەن ءسوز.

ۋكراينانىڭ ءىرى قالالارىنان باستاپ، شالعايداعى اۋىلدارعا دەيىن سابەتتىك جۇيەمەن بايلانىستى بارلىق اتاۋدىڭ كوزىن جويۋعا، ءتىپتى كوممۋنيستىك پارتيانىڭ اتاۋىن دا وزگەرتۋگە شەشىم قابىلدادى. بۇل دەكوممۋنيزاتسيا دەپ اتالدى. ناتيجەسىندە 300-گە جۋىق ەلدى-مەكەن، 7 قالا، 9 اۋدان اتاۋى وزگەرتىلدى. قازىر كوممۋنيستىك سيپاتتاعى 6100 كوشە اتاۋلارى وزگەرتىلۋدە.

ەڭ سوراقىسى سول، الاشتىڭ استاناسى سانالاتىن سەمەيدەگى لەنين كوشەسىنە  ۇلت كوسەمى ءاليحان بوكەيحاننىڭ اتىن بەرۋدى ءبىزدىڭ «Abai.kz» پورتالى بىرنەشە مارتە كوتەردى. وعان دا «ءلام-ميم» دەگەن جان تابىلمادى.

وسى تۇرعىدان الىپ قاراستىرعاندا دەپۋتات كوسارەۆتىڭ بۇل ۇسىنىسى قانشالىقتى اقىلعا قونىمدى؟ كوسارەۆتىڭ كوزدەگەنى نە؟ ول لەنيندى كەنەسارىدان ارتىق كورە مە؟
نۇرگەلدى ابدىعانيۇلى

Abai.kz