“شەكاراسىز رەپورتەرلەر”: تاجىكستاندا ءسوز بوستاندىعىنىڭ جاعدايى مۇشكىل
تاجىكستان ۇكىمەتى تەرروريزممەن كۇرەستى جەلەۋ ەتىپ، ساياسي وپپوزيتسيانى جويدى، ەندى تاۋەلسىز باق-قا قىسىم كورسەتىپ جاتىر. حالىقارالىق "شەكاراسىز رەپورتەرلەر" ۇكىمەتتىك ەمەس ۇيىمىنىڭ ء"باسپاسوز ەركىندىگى يندەكسىندە" تاجىكستان 149-ورىن الدى.
RSF ساراپشىلارىنىڭ پىكىرىنشە، "تاجىكستاندا قاۋىپسىزدىك قىزمەتكەرلەرى تاۋەلسىز جۋرناليستەردى تەرگەۋگە شاقىرىپ، ولاردى قورقىتىپ-ۇركىتىپ وتىر". "تاجىكستان بيلىگى الەۋمەتتىك جەلىلەر مەن اقپاراتتىق ۆەب-سايتتاردى ۇنەمى بۇعاتتايدى. 2016 جىلى بۇل ەلدە بىرنەشە تاۋەلسىز باسىلىم جابىلدى، ۇكىمەت باق ساياساتىنا مەملەكەتتىك باقىلاۋدى كۇشەيتتى", - دەپ جازدى ۇيىم ساراپشىلارى.
ءباسپاسوز ەركىندىگى شەكتەلگەن ەلدەر كىرەتىن "قىزىل ايماقتان" تاجىكستانمەن بىرگە رەسەي، بەلارۋس جانە قازاقستاندى كورۋگە بولادى.
تاجىكستان بيلىگى جىل سايىنعى ء"باسپاسوز ەركىندىگى يندەكسىنىڭ" شىنايىلىعىنا كۇمەن كەلتىردى. تاجىكستان پارلامەنتى تومەنگى پالاتاسىنىڭ اقپارات جانە حالىقارالىق ىستەر جونىندەگى توراعاسى وليم ساليمزودانىڭ مالىمدەۋىنشە، ۇيىم بايانداماسى تاجىكستانداعى جاعدايدى تولىق سيپاتتامايدى. ونىڭ پىكىرىنشە، رەسپۋبليكادا ءسوز ەركىندىگىنىڭ جاعدايى، ورتالىق ازياداعى باسقا دا ەلدەرمەن سالىستىرعاندا، الدەقايدا جاقسى.
ءبىر جىل بۇرىن "شەكاراسىز رەپورتەرلەر" تاجىكستاندا تاۋەلسىز باسپاسوزگە قىسىمنىڭ كۇشەيۋىن سىنعا الىپ، تاجىك جۋرناليستيكاسىنىڭ جاعدايىن "قاۋىپتى" دەپ باعالاعان ەدى.
اباي-اقپارات
