قازىرگى ۋاقىتتا mail.ru قىزمەتىنە جۇگىنبەيتىن ينتەرنەت قولدانۋشىلار جوقتىڭ قاسى. اسىرەسە، جاستار اراسىندا «اگەنتشىلەردىڭ» قاتارى قارقىنداپ ارتۋدا. كومپيۋتەردى قويىپ، ۇيالى تەلەفونعا دەيىن ەنىپ العان بۇل بايلانىس قۇرالىنىڭ تيىمدىلىگى ايتپاسا دا تۇسىنىكتى. الايدا، 2003 جىلى mail.ru كومپانياسىنىڭ حابارلاسۋعا وڭتايلى بولۋ ءۇشىن ويلاپ تاپقان بايلانىس قۇرالى بۇگىندە جاستاردىڭ ءىش پىستىرمايتىن ەرمەگىنە اينالعان ءتارىزدى. ولاي دەۋىمىزدىڭ سەبەبى، اگەنتتە اڭگىمە ايت دەپ اڭگىمە ىزدەپ، نە جاڭالىق دەپ جاڭالىق سۇراپ، ازاننان قارا كەشكە دەيىن قارا ءسوزدىڭ قايماعىن ساپىرىپ وتىراتىنداردىڭ قاراسى كوپ قازىر. جاستاردىڭ كوبى اگەنتپەن «اۋىراتىن» بولدى. ءبىز اگەنتشىلەردى بارلاپ، مايل-اگەنتتىڭ زياندى تۇستارىن باعامداپ كورگەن ەدىك.

MAIL.RU-دىڭ جاستارى

ءبارىمىز دە mail.ru-دىڭ جاستارى ەدىك،
ءبارىمىز دە موي ءميردى اشقان ەدىك.
ونلايندار ويدا، وتوشەلدەر تويدا،
وتكليۋچەندەر، نەۆيديمدەر  قايدا ەكەن?» - دەپ ازىلدەپ، اگەنتتەگىلەردى تانىمال ايتىسكەر اقىنىمىز بالعىنبەك يماشەۆتىڭ  تۇگەندەگەنى بار.

قازىرگى ۋاقىتتا mail.ru قىزمەتىنە جۇگىنبەيتىن ينتەرنەت قولدانۋشىلار جوقتىڭ قاسى. اسىرەسە، جاستار اراسىندا «اگەنتشىلەردىڭ» قاتارى قارقىنداپ ارتۋدا. كومپيۋتەردى قويىپ، ۇيالى تەلەفونعا دەيىن ەنىپ العان بۇل بايلانىس قۇرالىنىڭ تيىمدىلىگى ايتپاسا دا تۇسىنىكتى. الايدا، 2003 جىلى mail.ru كومپانياسىنىڭ حابارلاسۋعا وڭتايلى بولۋ ءۇشىن ويلاپ تاپقان بايلانىس قۇرالى بۇگىندە جاستاردىڭ ءىش پىستىرمايتىن ەرمەگىنە اينالعان ءتارىزدى. ولاي دەۋىمىزدىڭ سەبەبى، اگەنتتە اڭگىمە ايت دەپ اڭگىمە ىزدەپ، نە جاڭالىق دەپ جاڭالىق سۇراپ، ازاننان قارا كەشكە دەيىن قارا ءسوزدىڭ قايماعىن ساپىرىپ وتىراتىنداردىڭ قاراسى كوپ قازىر. جاستاردىڭ كوبى اگەنتپەن «اۋىراتىن» بولدى. ءبىز اگەنتشىلەردى بارلاپ، مايل-اگەنتتىڭ زياندى تۇستارىن باعامداپ كورگەن ەدىك.

MAIL.RU-دىڭ جاستارى

ءبارىمىز دە mail.ru-دىڭ جاستارى ەدىك،
ءبارىمىز دە موي ءميردى اشقان ەدىك.
ونلايندار ويدا، وتوشەلدەر تويدا،
وتكليۋچەندەر، نەۆيديمدەر  قايدا ەكەن?» - دەپ ازىلدەپ، اگەنتتەگىلەردى تانىمال ايتىسكەر اقىنىمىز بالعىنبەك يماشەۆتىڭ  تۇگەندەگەنى بار.

جۇمىستا دا، جولدا دا، ءتىپتى تاماق ءىشىپ وتىرسا دا، اگەنتتەن شىقپايتىندار جەتەرلىك. يتپەن ىزدەپ، جەر-كوكتى شارلاعان ادامىڭدى قازىر اگەنتتەن وڭاي تاباسىڭ. مۇنداعى ءاربىر ادامنىڭ وزىندىك الەمى بار. اركىم  الەمىنە ءوزى تۋرالى مالىمەت جازىپ، نەشە ءتۇرلى سۋرەتىن ەنگىزەدى. ءارى سول الەمدە وزگە ادامدارمەن دوستاسادى. اگەنتشىلەر اگەنت ارقىلى وزگە قالاداعى ادامدارمەن تانىسىپ، سويلەسىپ، ءتۇرىن انىق بىلمەسە دە، سىرىن ءبىلىپ، جان ۇعار جاقىنى ەتىپ ۇلگەرەدى.    م-اگەنتتىڭ ءبىر كەرەمەتى جازعانىڭ كەلەسى ادامعا كوزدى اشىپ-جۇمعانشا جەتەدى. ىبىراي التىنسارينشە ايتقاندا، ايشىلىق الىس جەرلەردەن جىلدام حابار العىزاتىننىڭ ناق ءوزى.

اگەنتكە ءبىر كىرگەن ادامنىڭ ودان تەز شىعۋى مۇمكىن ەمەس. قىزىل ءسوزدىڭ جەتەگىنە ەرىپ، ساعاتتاپ، ءتىپتى تاڭدى تاڭعا ۇرىپ اگەنتپەن اڭگىمە ايتادى. كەلەلى ماسەلە كوتەرىلىپ، ماڭىزدى ماسەلەلەر شەشىلمەسە دە، اگەنتتە ايتەۋىر سويلەسەرلىك اڭگىمە تابىلادى. الايدا، اڭگىمە ىزدەگەن ادامنىڭ التىنداي ۋاقىتى اگەنتتەگى قىزىل ءسوز بەن قىسىر اڭگىمەنىڭ جەتەگىندە وتەدى.

شاعىن بلوگقا مۇڭ شاققان شەرمەندەلەر

ءومىر سىندى قىزىعى بار قايعىسى،

وتىرمايدى مۇندا مۇلدەم جاي كىسى،

اگەنت دەگەن -  بۇل قۇمارلىق وتانى.

وبششەنيەنىڭ ەڭ قولايلى - جايلىسى,

قۇمارلىق وتانى م-اگەنتتە شاعىن بلوگ دەگەن كەرەمەت بار. ونىڭ كەرەمەتتىگى بلوگقا جازعانىڭنان سەنىڭ بۇكىل دوسىڭ ءاپ-ساتتە قۇلاقتانىپ ۇلگەرەدى. ايتىسكەر اقىن بالعىنبەك يماشەۆتىڭ: «شاعىن بلوگ - وسەكشى، جۇرتقا جايار،
سىرىمدى توقتاتايىن ايتا بەرمەي»، - دەيتىنى دە سوندىقتان عوي.

شاعىن بلوگقا: «جۇرەگىمدى نەگە اۋىرتاسىڭ?» - دەپ جازىپ ءبىر ساباز وتىر. ال ەندى ءبىرى: «كوزىڭدەگى مۇڭدى سۇيەم، ەرنىڭدەگى ءشولدى سۇيەم»، - دەپ سۇيىكتىسىنە دەگەن سەزىمىن بارشا جۇرتقا پاش ەتۋدە. «ماۋقىمدى ءبىر باسساڭشى بال تىلىڭمەن، يىعىڭنىڭ ساعىندىم بوكتەرلەرىن»، - دەپ جازىپ، ءبىر بوزبالا سۇيىكتىسىن ساعىنۋدا.  «ءبىر سۇراق بار،  سول سۇراقتان قورقامىن»، - دەپ قورقىپ بىرەۋ وتىر. «ويلارىمدى قوراسىنا قاماي الماي وتىرمىن»، - دەپ عالامتوردا قالىڭ ويعا قامالعان جانە ءبىر جان بار. ەندى ءبىرىنىڭ شاعىن بلوگقا جازعانى ءتىپتى قىزىق. «ءول وندا»، - دەپتى. كەيىپ ايتىلعان ءسوزدىڭ تەك كىمگە ايتىلعانى بەلگىسىز. بلوگتا كوستەڭ ەتە قالعاندا وزىڭە قاراتا ايتىلعانداي تىكسىنىپ قالاسىڭ.

شاعىن بلوگتان ءوزىنىڭ بولماسا دا، وزگە ءبىر اقىننىڭ نەمەسە ويشىلدىڭ ايتقانىن  جازىپ، كوسەمسىپ وتىرىندار دا تابىلادى. ءبىر سوزبەن ايتقاندا، شاعىن بلوگ - اگەنتشىلەردىڭ ومىردەن كورگەنى مەن تۇيگەنىن، وزىندىك ءپالسافاسىن، ودان قالسا، ءدال قازىرگى ساتتە نە ويلاپ، نە ىستەپ جاتقانىنان حابار بەرەدى.

جاستاردىڭ شاعىن بلوگقا جازعانىن وقىپ، ءبىزدىڭ ارامىزدا دا نەبىر «دانالار» ءجۇر ەكەن عوي دەگەن ويعا قالاسىڭ.

سۋرەتتەگى سۇلۋلار

كىرپىگىڭە كۇن شومىلىپ،

سەزىم كۇلگەن ارايلىم،

عالامتورداعى عاجايىپ

سۋرەتىڭە قارايمىن...

مونيتوردان مولدىرەپ

جۇرەگىمدى گۇلدەتتىڭ،

ماحابباتتىڭ سامالىن

سەزىنبەپپىن، بىلمەپپىن!

باقىت دەگەن وسى ما؟!

مۇمكىن، سورىم شىعارسىڭ؟!

ويحوي، مىنا مۇسىنمەن، - دەگەن جولدار جاس اقىن باۋىرجان قاراعىزۇلىنىڭ ينتەرنەتتەگى سۇلۋدىڭ سۋرەتىنە تامسانعان جۇرەك تەبىرەنىسىنەن تۋعان.

ءيا، عالامتورداعى سۋرەتىنە قاراساڭ قىز-جىگىتتىڭ بارلىعى سۇلۋ، بارلىعى كەلبەتتى. بىراق شىن مانىندە اركىم ينتەرنەتتەگى «الەمىنە» ءوزىنىڭ ەڭ ءساتتى تۇسكەن سۋرەتىن قويادى. سول ارقىلى سىرت كوزگە ادەمى كورىنۋگە تىرىسادى. جايشىلىقتاعى قاراپايىم عانا قۇربىڭنىڭ «الەمىنە» كىرسەڭ حاس سۇلۋدىڭ ءوزى ەكەن عوي دەپ تاڭ قالاسىڭ. سودان دا بولار، اگەنتپەن تانىسىپ، كەزدەسكەندەردىڭ: «ينتەرنەتتەگى سۋرەتىنەن ءتۇرى مۇلدەم باسقا»، - دەپ رەنجىپ قايتاتىنى. «مايل-اگەنتتىڭ ەڭ زياندى تۇسى دا - وسى»، - دەيدى پسيحولوگ تورەعالي باتىرحانۇلى. ويتكەنى، عالامتورداعى سۇلۋ سۋرەت پەن سۇلۋ ءسوزدىڭ كوبى جاساندى بولۋى مۇمكىن.

عالامتورداعى عاشىقتىق

ارىلعانداي مازالايتىن بار ويدان،

جالىن اتىپ، سەزىم سالعان سارايدان،

كورمەي جاتىپ، بىلمەي جاتىپ ءبىر-ءبىرىن،

عاشىق بوپتى م-اگەنتتە تالاي جان.

قازىرگى جاستاردىڭ اراسىنداعى جەڭگەتاي - اگەنت. ولاردىڭ قاي-قايسىسىنىڭ دا اگەنتتە عاشىعى بار. سىرلى سەزىمدەرىن حابارلاما ارقىلى جولداپ جۇرگەن ولار ءبىر-ءبىرىنىڭ ءتۇرىن بىلمەسە دە، سىرىن بىلەدى. اماندىقتارىن اگەنت ارقىلى ءبىلىپ، ءتىپتى اگەنتتەگى وزگە ادامداردان ءبىر-ءبىرىن قىزعانىپ، قىرقىسىپ تا الادى. اگەنت- جەڭگەتاي ارقىلى تانىسىپ جاتقاندار دا، تانىستىقتارى ماحابباتقا ۇلاسىپ، تابىسىپ جاتقاندار دا جەتەرلىك قازىر. جاستاردىڭ عالامتوردان عاشىق بولۋ قارەكەتىنىڭ دۇرىس-بۇرىستىعىن تورەعالي باتىرحانۇلىنان سۇراعان ەدىك. پسيحولوگ: «مەنىڭ جۇمىس تاجىريبەمدە كەزدەسكەن اجىراسۋعا بەل بۋعان  وتباسىلاردىڭ كوپشىلىگى - عالامتورمەن تانىسقاندار. ويتكەنى، مۇنداي ماحاببات كوپ رەتتە باياندى بولا بەرمەيدى. ادام مايل-اگەنتپەن تىلدەسكەندە شىنايى بولمىسىن كورسەتىپ، شىنايى سويلەسپەيدى. قيالىنان ءبىر وبرازدى ويلاپ الادى داعى، سول وبرازعا ەنىپ الىپ، وزگەلەرمەن حات جازىسادى. ال كەزدەسكەندە اگەنتتە جازعان نەبىر كەرەمەت سوزدەردىڭ سول ادامنىڭ تابيعي بولمىسىنان تۋماعاندىعى، جاساندى ەكەندىگى بايقالىپ تۇرادى»،  - دەيدى. قىز-جىگىتتەردىڭ كەزدەسكەن سوڭ ومىردە مۇلدە باسقا ادام ەكەن دەپ، ات كەكىلىن كەسىسىپ، اگەنتتە مۇلدە سويلەسپەي كەتەتىندىگى بالكىم، سودان شىعار. جاستاردىڭ بويىنداعى شىنشىلدىقتى جويىپ، جاساندىلىققا يتەرمەلەيتىندىگىن ەسكەرسەك، م-اگەنتتىڭ تاعى ءبىر زياندى تۇسىن بايقايمىن.

اگەنتشىلەردىڭ ايتقاندارىنان

قىزدار-ۇلدار بىرلەسىپ اپ جازىسىپ،

شىن ومىردە قىزعانىسىپ، الىسىپ،

وسىلايشا ءوتىپ جاتىر ۋاقىتى،

كۇن-تۇنىمەن كەزەكتەسىپ جارىسىپ.

كەزەكتەسىپ جازىسىپ وتىرعان بەيتانىس ەكى ادامنىڭ اگەنتتەگى اڭگىمەسى بىلايشا ءوربيتىنى بارىمىزگە تانىس كۇندەلىكتى جايت.

- پريۆەت!

- سالەم!

- مى زناكومى؟

- نەت، نو بيراك سيز ماگان درۋجبا پرەدلوگات ەتتينيز...

- ا-ا-ا!

- كاي جاكتانسىز؟

- سەمەيدەن. ا ۆى؟

- تالدىكتان.

- م-م-م!

- ناستروەنيەن كاك؟

- نورمالنو! ا سيزدين!

- توجە جاكسى.

اڭگىمە وسىلايشا ءوربىپ،  انانى-مىنانى ءسوز ەتىپ، جالعاسا بەرەدى. تەك وزگە تۇگىل ءوزىمىز دە بايقامايتىنىمىز، بايقاساق تا ەتىمىز ۇيرەنىپ كەتكەندىكتەن شىعار، ءتىلىمىزدى شۇبارلاپ ورىسشا قوسىپ جازاتىنىمىز. اگەنتتە ورىسشا قوسپاي تازا قازاقشا جازاتىن ادام - ىلۋدە بىرەۋ. قازىرگى جاستاردىڭ اراسىندا قازاقشا مەن ورىسشانى ارالاستىرىپ جازۋدان ارالاس ءتىل پايدا بولعان ءتارىزدى. اگەنتشىلەردىڭ جازعانىنا قاراپ، ارالاس تىلدىلەر قالىپتاسىپ كەلە مە دەپ قورقام.

م-اگەنتتە ءجيى قولدانىلاتىن سوزدەر: سالەم! قالايسىڭ؟ قال قالاي؟ نە جاڭالىق؟ جاڭالىق جوق. اڭگىمە ايت... نە ايتايىن؟ سونىمەن... سونىمەن سول... نەگە؟ سولاي ما؟ جاي ما؟

بۇلاردى اگەنتشىلەر تىلدەسكەندەرىنىڭ بارىنە كۇنىگە جازادى. سوندىقتان بۇل سوزدەردى اگەنتتە ءجيى قولدانىلادى دەۋىمىزگە ابدەن بولادى.

اۋىزەكى تىلدە قۋانۋ، وكىنۋ، جەكىرۋ سىندى سەزىمدەرىمىزدى ءبىلدىرۋ ءۇشىن وداعاي سوزدەردى ءجيى قولدانامىز عوي. ال اگەنتتەگى تىلدەسۋشىلەردىڭ ديالوگىندا ولاردىڭ كوڭىل-كۇيىنەن حاباردار ەتىپ قۋانۋ، قورقۋ، مۇڭايۋ، جىلاۋ، ريزا بولۋ سەزىمدەرىن بىلدىرەتىن ءوڭتاڭبالار (سمايليكتەر) شاۋىپ جۇرەدى. قۋانىشتىمىن، ريزامىن دەگەندى مىنا ءبىر ءوڭتاڭبا ☺  ءون بويىنا سىيدىرىپ تۇر. م-اگەنتتە جاقسى كورەتىن ادامىڭا «مەن سەنى جاقسى كورەمىن» دەپ جازىپ، ۋاقىت شىعىنداماي-اق مىنانداي ♥ ءوڭتاڭبانى جىبەرسەڭ بولدى. قولدانىسقا قولايلى وسىنىسىنان بولار، قازىرگى جاستاردىڭ اگەنت دەسە ىشكەن اسىن جەرگە قوياتىندىعى.

مايل-اگەنت ارقىلى تىلدەسكەندە سويلەمدى قۇرمالاس ەتىپ قۇراپ، ۇزىن-سونار ەتىپ جازىپ وتىرۋعا ۋاقىت جوق. سوندىقتان دا اركىم ويىن قىسقا دا ناقتى ەتىپ جازۋعا تىرىسادى. اگەنتشىلەر كوبىنە جالاڭ جانە تولىمسىز سويلەمدەر ارقىلى تىلدەسەدى. ءارى قىسقارعان سوزدەردى ءجيى قولدانىپ، سوزدەردى قىسقارتىپ جازۋعا بەيىم تۇرادى.  مۇنى كورىپ كەيدە ءتىلىمىز تاق-تۇق بولىپ، كوركەم سويلەۋ قاسيەتىمىزدەن ايرىلىپ قالمايمىز با دەپ تە شوشيمىن. بۇل قورقىنىش تەك ءبىزدى عانا ەمەس، پسيحولوگ تورەعالي باتىرحانۇلىن دا الاڭداتادى ەكەن. پسيحولوگتىڭ پىكىرىنشە، عالامتوردا قىسقا حابارلامالار ارقىلى تىلدەسىپ ۇيرەنگەن ادامنىڭ اۋىزەكى سويلەسۋ قابىلەتى تومەندەيدى ەكەن. ءارى اگەنتتە جازۋ ارقىلى تىلدەسۋگە بەيىمدەلىپ قالعان ادام اۋىزەكى سويلەسكەندە دە ويىن قىسقا جەتكىزۋگە بەيىمدەلىپ كەتەتىن كورىنەدى.

اقىندار دا اگەنت «اۋرۋىنا» شالدىققان با؟

جاسىمدا «مايل.رۋ-دى» ەسكەرمەدىم،
پوشتاما حات كەلسە دە، تەكسەرمەدىم.
ەندى «ميرگا» دوستۋپ جوق جۇمىسىمدا،
قولىمدى مەزگىلىنەن كەش سەرمەدىم .

ۇلى اقىنىمىز اباي  جاسىندا عىلىم-ءبىلىم ۇيرەنبەگەنىنە وكىنسە، قازىرگىنىڭ اقىنى بالعىنبەك يماشەۆ «مايل.رۋ-دى» ەسكەرمەگەنىنە وكىنىپ ءجۇر.

اقىن دەگەننەن شىعادى، ەرمانوۆتىڭ ايتىسى توقتاعالى بەرى ايتىسكەر اقىنداردىڭ ءبارى ينتەرنەتپەن ايتىساتىندى شىعاردى. قازىرگى ۋاقىتتا بالعىنبەك يماشەۆ، اينۇر تۇرسىنباەۆا، اقمارال لەۋباەۆا، جىبەك بولتانوۆا سىندى ايتىسكەرلەر اگەنتتەن تۇسپەيدى.

سۇلۋ سوزدەن ساراي سالىپ، شابىت پاتشالىعىندا ءومىر سۇرەتىن ءبىزدىڭ اقىندارىمىزعا  مايل اگەنت مايداي جاعىپتى. مونيتوردىڭ ار جاعىنداعى بەيتانىس ارۋدى جانىم، جاپىراعىم، ءتاتتىم، پەرىشتەم، اينام، ايىم،  قارعام، كۇنىم دەپ ەركەلەتىپ، سول ارۋدى مۋزام دەپ مۋزاسىنا بالاپ، التىنداي ۋاقىتىن اگەنتكە سارپ ەتەدى. بارشا جۇرتقا جاريالايتىن شاعىن بلوگتىڭ مۇمكىندىگىن ءبىزدىڭ اقىندار سياسى كەپپەگەن جاڭا ولەڭىن جۇرتقا جايۋعا پايدالانىپ ءجۇر. ونىڭ دالەلى - باقىتگۇل باباش، رىسبەك دابەي، باۋىرجان قاراعىزۇلى، قالقامان سارين، اقبەرەن ەلگەزەك سىندى جاس اقىندار ەلدىڭ عانا ەمەس، م-اگەنتتىڭ دە اقىنىنا اينالعانداي...

«اگەنتومانيادان» قالاي ايىعامىز؟

جاقىندا ۋنيۆەرسيتەتتە بىرگە وقىعان دوسىمنىڭ جۇمىسىنا بارعام. جۇمىس ۇستىندە دوسىم م-اگەنتىن قوسىپ قويىپتى. سالدەن سوڭ بىزگە ءدارىس بەرگەن الپىستى القىمداعان پروفەسسور اپايىمىزدىڭ دا اگەنتتە وتىرعانىن كورىپ، كوزىمىز شاراسىنان شىعا جازدادى. قىزىق ءۇشىن دوسىم اپايىمىزعا م-اگەنتتە سالەمدەسىپ ەدى: «ءاي، بۇل قاي، بالا؟» - دەپ ول كىسى دە ەلەڭ ەتە قالدى. اپايىمىز سويلەسەر ادام تاپپاي وتىر ەكەن، ارنەنى ايتىپ توقتاماي قويماسىن با؟ ءسوز اراسىندا: «اگەنت دەگەن - ءتاۋىر نارسە ەكەن عوي ءوزى. ماعان وزگە شاكىرتتەرىمنىڭ لوگينىن بەرەسىڭ بە؟» - دەپ قويادى. ال كەپ كۇلەيىك. جاستاردى قويىپ، ۇلكەندەردىڭ دە اگەنتكە قىزىعۋشىلىعى ويانا باستاپتى. كومپيۋتەر مەن ۇيالى تەلەفوننىڭ ءتىلىن بىلسە، ءبىرازدان كەيىن كونتاكتىگە كەمپىر-شالدار دا قوسىلىپ، وسەك ايتاتىن ءتۇرى بار.

مەكتەپكە پەداگوگيكالىق تاجىريبەدەن وتۋگە بارعان قۇربىمنىڭ: «6-7-سىنىپتارعا ساباق بەرگەن كۇننىڭ ەرتەڭىنە الەمىمە سىنىپتاعى وقۋشىلاردىڭ جارتىسىنان كوبى كىرىپ، سۋرەتتەرىمدى كورىپ، دوس بولۋعا ۇسىنىس جاساپتى»، - دەگەنى بار. ءيا، قازىر وقۋشىلار دا اگەنتتەن شىقپايدى.

جاقىندا ءبىر زامانداسىمنىڭ شاعىن بلوگتاعى «اگەنت، مەنى ۇيگە جىبەرشى...»  دەگەن ءسوزىن وقىپ، جاتىپ كۇلگەنمىن. كۇلگەنىمىزبەن، سول ءسوزدىڭ استارىندا ءزىل بارىن اڭعارمايمىز. م-اگەنت قازىر جاستى دا، جاسامىستى دا جىبەرمەي وزىنە ماتاپ تۇرعان تىلسىم كۇش ءتارىزدى. ءتىپتى دۇنيەنىڭ بار قىزىعى سوندا تۇرعانداي اگەنتكە تاۋەلدى بولىپ قالعاندار دا بار. قازىرگى جاستار «اگەنتى باردىڭ كۇنى - جارىق، اگەنتى جوقتىڭ كۇنى - قارىپ» دەگەننىڭ كەبىن كيىپ وتىر.

پسيحولوگ تورەعالي باتىرحانۇلى جاستار مايل-اگەنتكە اۋەستەنىپ، مانيا سىندى پسيحيكالىق اۋرۋعا دۋشار بولۋى مۇمكىن. ينتەرنەتكە تاڭىلعانشا جاستاردىڭ كوزبە-كوز قىزۋ اڭگىمە وتكىزەتىن ارنايى كلۋبتارعا جازىلعانى دۇرىس دەيدى. پسيحولوگتىڭ ءسوزىنىڭ جانى بار. ءتۇرلى تاقىرىپتار توڭىرەگىندە وي ءبولىسىپ، جاستاردىڭ ءبىر-بىرىمەن تىكەلەي قارىم-قاتىناس جاساۋىنا مۇمكىندىك تۋدىراتىن ارنايى پىكىر كلۋبتارى كوبەيسە، شىركىن! ولار قىزىقتى تاقىرىپتار كوتەرىپ، اگەنت ءتارىزدى جاستاردى تارسا عوي. سوندا بالكىم ءبىزدىڭ جاستار اگەنت «اۋرۋىنان» ايىعار ما ەدى...

كومپيۋتەردىڭ الدىندا كوپ وتىرۋ، بىرىنشىدەن، ادامنىڭ كوزىنە اسەر ەتەتىندىگىن، ۇزدىكسىز ەكرانعا قادالىپ وتىرۋ - كوزدىڭ كورۋىن السىرەتىپ، قۇلاقتىڭ ەستۋ قابىلەتىن ازايتاتىنىن، ەكىنشىدەن، ەكراننان تارالاتىن ەلەكتروماگنيتتى تولقىندار دەنساۋلىققا زيان ەكەنىن عالىمدار الدەقاشان دالەلدەگەن. ۇيالى تەلەفوننىڭ زياندى ەكەنىن ايتىپ، دەنەدەن بارىنشا الىس ۇستاۋ قاجەتتىگىن ەسكەرتكەن دە. وعان قۇلاق اساتىن جاستار جوق. م-اگەنت جۇيەسىمەن تىلدەسۋ - جاستاردىڭ سۇيىكتى ىسىنە اينالىپ، بۇل جولدا التىننان قىمبات ۋاقىتىن دا، اقشاسىن دا اياماۋدا.  ەڭ وكىنىشتىسى، سول شىعىننىڭ وزگە ەلگە كەتىپ جاتقاندىعى. ءارى مايل-اگەنتتە كوپ وتىراتىن جاستاردىڭ قازاقشا جازعاندا تىلىمەن قوسا، ساۋساعى دا «ساقاۋلانىپ» بارادى. ويتكەنى، ءبىزدىڭ اقپارات جانە بايلانىس اگەنتتىگى ءالى كۇنگە دەيىن mail.kz-بەن قازاقشاسى ءتاۋىر م-اگەنت جاساي الماي وتىر. قازاق تىلىندەگى ءتول ارىپتەرىمىزدى كەيبىر كومپيۋتەرلەر مەن ۇيالى تەلەفونداردا تاڭبالاۋ مۇمكىن ەمەس. مۇمكىن بولعاننىڭ وزىندە حابارلامانى الۋشىدا كوبىنە ول ارىپتەر وقىلمايدى.

اگەنتكە تاڭىلعان جاستار ەرتەڭگى كۇنى اۋىزەكى سويلەسۋدە دە: «كال كالاي؟ نە يستەپ جاتسين؟» - دەپ جۇرمەسە بولعانى.

شاعىن بلوكتاعى شاعىن تراكتاتتار

• بىرەۋدى ساعىنايىن دەسەڭ ساعىنا المايسىڭ، اگەنتتى اشساڭ وتىرادى.
• سونبەشى، كوز الدىمنان كەتپەشى، ماڭگى وتىرشى اگەنتتە...
• ادام دەگەن اگەنتتە اڭگىمەنى ايتادى، سوسىن ۇيىنە قايتادى.
• ماقالا جازۋعا ماحابباتيزاتسيا مەششات ەتىپ جاتىر.
• ماحاببات!!! كەيدە - شوكولاد، كەيدە - شاپالاق. ساق بول!
• ماحاببات وپا بەرمەيدى، بوپا (بوپە) بەرەدى...
• مەن بىرەۋدى ساعىنام، كوزىمدە جاس، زارىعىپ...
• مەن سەنى سۇيەمىن، ۋاقىت...
• باقىتتى بولعىڭ كەلسە اقىلدىلىقتى ۇيرەن نەمەسە اقىلدى ايەلگە ۇيلەن

«اق جەلكەن» جۋرنالى، №9 (2010), 16-18 بەتتەر.