ءاسانالىنىڭ مەشىتى
![](http://abai.kz/content/uploads/2017/06/6235356.jpg)
«ءاسانالىنىڭ مەشىتى»
قايمانا قازاق وسىلاي اتاپ كەتىپتى. ءاسانالى ول مەشىتتى اتاسى ىسقاق ءپىراداردىڭ ارۋاعى ريزا بولسىن دەپ سالدىرعان عوي. اكتەردىڭ ءوزى ءوسىپ-ونگەن جەرى – جامبىل وبلىسىنىڭ سارىسۋ اۋدانىنداعى جايىلما اۋىلىندا. دۇرىس اتاۋى – ىسقاق ءپىرادار مەشىتى. رەسمي تىركەلگەن.
ىسقاق ءپىراداردىڭ اۋليەلىگى بولعان كورىنەدى. قىزىل جولبارىس كەيپىندەگى قورعاۋشى كيەسى بولعان ەكەن...
اتاسىنىڭ ءتۇر-تۇلعاسى ءاسانالىنىڭ ەسىندە جوق. ەمىس-ەمىس. جادىندا جاتتالىپ قالعانى ءبىر-اق جاعداي.
ىسقاق ءپىرادار دۇنيەدەن وتكەن كۇن. كەنەت اشىق اسپاندا ءبىر شوكىم اپپاق بۇلت پايدا بوپتى دا، اق جاۋىن توگىپ تاستاپتى. جۇرت اڭ-تاڭ. بۇنىسى نەسى، التى اي جاز بويى ءبىر تامشى تامبايتىنى قايدا؟ «ويپىرماي، اۋليە بولعان كىسى ەكەن عوي»، – دەپ تامسانىپتى...
اكەدەن جالعىز ءاسانالى بالا كۇنىندە باسقا بالالاردى باۋداي تۇسىرگەن قىزىلشادان امان قالعان. سوندا جۇرت ايتىپتى: «ىسقاق ءپىراداردىڭ ارۋاعى قورعاپ قالعان» دەپ...
«قىز جىبەك» ءفيلمى ءتۇسىرىلىپ جاتقاندا دا ءبىر ءولىمنىڭ اۋزىنان قالعان. قاپشاعايدىڭ وقىستان وپىرىلىپ تۇسكەن جارتاسى قۇلاپ، بۇنى باسىپ قالۋ قاۋپى تونگەندە، استىنداعى جۇيرىك اتى الىپ ءوتىپتى...
كولىگى وتقا ورانىپ، جارىلعان كەزدە دە وتباسىمەن بىرگە اپاتتان امان قالعان...
ءبىر كورىپكەل ايتىپتى: «سىزگە اتاڭىزدىڭ قىزىل جولبارىسى قونعان» دەپ. سول راس-اۋ...
ءبىر عاجابى، «قىز جىبەك» فيلمىندە ءاسانالى سومداعان بەكەجان بەينەسى ءبارىنىڭ مىسىن باسىپ تۇرادى.
كەيدە ماعان بۇتكىل قازاق كينوسىن ءاسانالىنىڭ مىسى باسىپ تۇرعانداي كورىنەدى. ءبىر كەزدە بار ابىرويىنان ايرىلىپ قالا جازداعان تەاتر ونەرى دە سونىڭ «تاك-تاگىمەن» قايتا تارتىپكە كەلىپ ەدى عوي...
راسىندا سولاي. ءاسانالى – ونەردىڭ قىزىل جولبارىسى.
كولەڭكەڭمەن قورعاي ءجۇر، ونەردىڭ قىزىل جولبارىسى!
جان تىلەۋ
Abai.kz