دۇكەننىڭ كوكسەگەنى قازاق كوشىنىڭ توقتاۋى ما؟
قر باس پروكۋرورى ج.ق.اسانوۆقا;
قر Iشكi iستەر ءمينيسترى ق.ن.قاسىموۆقا;
قر ۇلتتىق قاۋىپسىزدىك كوميتەتىنىڭ
توراعاسى ك.ق.ماسىموۆكە!
قۇرمەتتى جاقىپ قاجمانۇلى!
قۇرمەتتى قالمۇحانبەت نۇرمۇحانبەتۇلى!
قۇرمەتتى كارىم قاجىمقانۇلى!
سوڭعى ۋاقىتتا قىتاي حالىق رەسپۋبليكاسىندا تۇراتىن ەتنيكالىق قازاقتاردىڭ قازاقستان رەسپۋبليكاسىنا كەلۋىنە شەكتەۋ قويىلعانى، ناقتالاپ ايتساق، ولاردىڭ شەتەلگە شىعۋ تولقۇجاتتارىنىڭ جيىلىپ الىنعانى، ەلىمىزگە كەلىپ تۇراقتى تىركەۋگە تۇرعان قانداستارىمىزدىڭ ەلىمىز تاراپىنان بەرىلگەن ىقتيارحاتىنا تارتىپ الىنعانى، ءسويتىپ قىتاي ۇكىمەتى جاعىنان تۋىسقاندرىمىزدىڭ ساياسي قىسىمعا ۇشىراپ جاتقانى تۋرالى سان ءتۇرلى اڭگىمەنىڭ باق-تا ءجيى جازىلا باستاعانى ءمالىم.
وسى ماسەلەگە بايلانىستى، "ەۋرازيا" ارناسىنىڭ جاڭالىقتار قىزمەتى تىلشىسىنە قىتايتانۋشى، ل.ن. گۋميلەۆ اتىداعى ەۇۋ فيلولوگيا فاكۋلتەتى قىتاي ءتىلى كافەدراسىنىڭ مەڭگەرۋشىسى، پروفەسسور، عىلىم دوكتورى، حالىقارالىق «الاش» ادەبي سىيلىعىنىڭ يەگەرى دۇكەن ءماسىمحانۇلى وزگەشە ءبىر پىكىر ايتتى.
قىتايتانۋشى دۇكەن ءماسىمحانۇلىنىڭ ايتۋىنشا، قىتاي ۇكىمەتىنىڭ ول ەلدەگى ەتنيكالىق قازاقتارعا بۇلايشا قىسىم جاساۋىنا ەڭ باستى سەبەپ: «بىرىنشىدەن، بۇعان مىنا ءدىني ەكسترەميزم قىتايداعى – شىڭجاڭداعى كەيبىر جاعدايلار مۇرىندىق بولىپ وتىر. ياعني، شىڭجاڭنان كەلگەن قازاق اعايىندار، ۇيعىرلار. بۇلار وسى قازاقستانعا كەلىپ، ىقتيارحات الىپ نەمەسە ازاماتتىق العاننان كەيىن، كەيبىر جاستار سەرياعا بارىپ، جيھات سوعىسىنا قاتىسقان. Cودان كەيىن كەيبىر جاستار نەمەسە جاسامىس كىسىلەر بولسا دا، ولار وسى قازاقستاندى ترانزيتتىك مەملەكەت ەتىپ، ساۋدا ارابياسىنا قاجىلىق ساپارعا بارىپ، سودان ارى قاراي قالىپ قويىپ، «شىعىس تۇركىستاننىڭ ازاتتىعى» دەگەن ۇيىمدارىنا قوسىلىپ، جالپى قىتايدىڭ ساياساتىنا قارسى ۇيىمدارعا مۇشە بولعان...»-دىعى ەكەن. پروفەسسور، عىلىم دوكتورى، حالىقارالىق «الاش» ادەبي سىيلىعىنىڭ يەگەرى دۇكەن ءماسىمحانۇلى بۇل پىكىردى جايدان-جاي ايتپاسا كەرەك.
قۇرمەتتى جاقىپ قاجمانۇلى!
قۇرمەتتى قالمۇحانبەت نۇرمۇحانبەتۇلى!
قۇرمەتتى كارىم قاجىمقانۇلى!
سوندىقتان سىزدەردەن،
- د.ءماسىمحانۇلىنىڭ بۇل دەرەكتى قايدان العانىن نەمەسە بۇل سوزدەردى قانداي دەرەكتەرگە سۇيەنىپ ايتقانىن;
- قازاقستان رەسپۋبليكاسىنا شىڭجاڭنان كەلىپ ىقتيارحات نەمەسە ازاماتتىق العان قانشا قازاق سەرياعا بارىپ، جيھات سوعىسىنا قاتىسقانىن جانە «شىعىس تۇركىستاننىڭ ازاتتىعى» دەگەن ۇيىمدارىنا قوسىلعانىن;
- قازاقستان رەسپۋبليكاسىنا شىڭجاڭنان كەلىپ ىقتيارحات نەمەسە ازاماتتىق العان قانشا ۇيعىر سەرياعا بارىپ، جيھات سوعىسىنا قاتىسقانىن جانە «شىعىس تۇركىستاننىڭ ازاتتىعى» دەگەن ۇيىمدارىنا قوسىلعانىن;
- قازاقستان رەسپۋبليكاسىنا شىڭجاڭنان كەلىپ، سەرياعا بارىپ، جيھات سوعىسىنا قاتىسقان جانە «شىعىس تۇركىستاننىڭ ازاتتىعى» دەگەن ۇيىمدارىنا قوسىلعان ۇيعىرلار بولسا، ول ۇيعىرلارعا قازاقستان رەسپۋبليكاسىنىڭ ىقتيارحاتىن نەمەسە ازاماتتىعىن كىم، قاشان، قانداي سەبەپپەن بەرگەنىن جەكە-جەكە انىقتاپ، ءتيىستى اشىق اقپارات بەرۋلەرىڭىزدى، ەگەر بۇل دەرەك جالعان بولسا، دۇكەن ءماسىمحانۇلىن جاۋاپكەرشىلىككە تارتۋلارىڭىزدى سۇرايمىن!
ءشارىپحان قايسار
Abai.kz
