قازاقستان رەسپۋبليكاسى ۇلتتىق قاۋىپسىزدىك كوميتەتىنىڭ قۇرىلعانىنا 25 جىل تولۋىنىڭ قۇرمەتىنە قر ۇكىمەتىنىڭ قاۋلىسىمەن  «وڭتۇستىك» وڭىرلىك باسقارماسى 2019 اسكەري ءبولىمىنىڭ «قىزىلقۇم» شەكارا زاستاۆاسىنا جانە قارماقشى اۋدانىنداعى №269 ورتا مەكتەپكە ۇلت-ازاتتىق قوزعالىسىنىڭ كورنەكتى وكىلى، وتارشىلدارعا قارسى سىر بويىنداعى حالىق كوتەرىلىسىنىڭ باسشىسى، قازاق دالاسىنىڭ قاس باتىرى - جانقوجا نۇرمۇحاممەدۇلىنىڭ ەسىمى بەرىلدى. - دەپ حابارلايدى Abai.kz اقپاراتتىق پورتالى

شەكارا زاستاۆاسىنا جانقوجا باتىردىڭ ەسىمىن بەرۋ سالتاناتتى شاراسىنا قىزىلوردا وبلىسىنىڭ اكىمى قىرىمبەك كوشەرباەۆ،  قر ۇقك توراعاسىنىڭ ورىنباسارى، شەكارا قىزمەتىنىڭ ديرەكتورى، گەنەرال-مايور دارحان ءدىلمانوۆ، قر پارلامەنتى ءماجىلىسىنىڭ دەپۋتاتى باقىتبەك سماعۇل قاتىستى.

• جانقوجا نۇرمۇحاممەدۇلى ءوز ءداۋىرى ارتقان ۇلى جۇكتى قايىسپاي كوتەرىپ، ەل، حالىق الدىنداعى پارىزىن ادال اتقارىپ كەتكەن پەرزەنتتەر ساناتىندا. وزبىر دا وكتەم جاۋعا قارسى ازاتتىق تۋىن كوتەرىپ، ءومىرىنىڭ اقىرعى كۇندەرىنە دەيىن اتتان تۇسپەگەن باتىردىڭ اڭساعان ارمانىنا ەلباسى باستاعان بۇگىنگى ۇرپاق ءبىز جەتتىك.  سونداي-اق، جانقوجا بابامىزدىڭ ۇرپاعىنا «مەنى قوقانمەن شەكاراعا قويىڭدار، جاي جاتقانشا اياعىممەن قازاقتىڭ قاسيەتتى جەرىن تىرەپ جاتايىن» دەپ امانات قالدىرعانى تۋرالى تاريحتا دەرەكتەر بار. ءالى كۇنگە باتىر بابامىز شەكاراشىلارمەن بىرگە ەل قاۋىپسىزدىگىن قورعاپ تۇرعانداي. كۇنى-ءتۇنى ەلىمىزدىڭ، ءوڭىرىمىزدىڭ تىنىشتىعى مەن قاۋىپسىزدىگىن قورعاپ جۇرگەن شەكاراشىلارىمىزعا بۇل اسقاق رۋح، ايبات بەرىپ، قايراتتاندىرىپ، جىگەرلەندىرە تۇسەرى ءسوزسىز، - دەدى  وبلىس اكىمى ق.كوشەرباەۆ.

سونىمەن بىرگە قر ۇقك توراعاسىنىڭ ورىنباسارى، شەكارا قىزمەتىنىڭ ديرەكتورى دارحان ءدىلمانوۆ جانە قر پارلامەنتى ءماجىلىسىنىڭ دەپۋتاتى باقىتبەك سماعۇل شەكاراشىلاردى زاستاۆاعا جانقوجا باتىردىڭ ەسىمى بەرىلۋىمەن قۇتتىقتادى.

جانقوجا نۇرمۇحاممەدۇلى – 18-19 عاسىردا سىر بويى مەن ارال تەڭىزى ايماعىنداعى حالىقتىڭ ۇلت-ازاتتىعى جولىنداعى كۇرەسىنىڭ قاھارمانى. ول – وڭتۇستىكتە قوقان مەن حيۋا حاندىعىنىڭ شاپقىنشىلىعىنا، باتىستا رەسەي پاتشالىعىنىڭ وتارلاۋ ساياساتىنا قارسى قوزعالىستاردى ۇيىمداستىرعان داڭقتى قولباسشى.

ەستەرىڭىزگە سالا كەتەيىك، 2014 جىل باتىردىڭ تۋعان جەرىندە – قىزىلوردا وبلىسىنىڭ قازالى اۋدانىندا «جانقوجا نۇرمۇحاممەدۇلى جىلى» دەپ جاريالاندى. حالىق باتىرىنىڭ 240 جىلدىعى  كەڭ كولەمدە اتالىپ ءوتىلدى. قىزىلوردا قالاسىندا باتىردىڭ ەسكەرتكىشى ورناتىلدى.

Abai.kz