قىتايدان كەلگەن قازاق ايەل گۇلجان ءماۋىتحان كەدەن بەكەتىندە تاركىلەنگەن 40 مىڭ دوللارىن قايتارىپ الاتىن بولدى، - دەپ حابارلايدى Abai.kz شقو پروكۋراتۋراسىنىڭ ءباسپاسوز قىزمەتىنە سىلتەمە جاساپ.

پروكۋراتۋرا وكىلدەرىنىڭ ايتۋىنشا، 4 ساۋىردە گۇلجان ءماۋىتحان قىتايدان قازاقستانعا رەپاتريانت رەتىندە كەلىپ، مايقاپشاعاي كەدەن بەكەتىندە توقتاتىلعان. ايەلدىڭ الىپ كەلگەن 40 مىڭ دوللارى تىركەلمەگەن.

كەيىن ءماۋىتحان بۇل قاراجاتتىڭ قايدان شىققانىن قىتايداعى ءۇيىن ساتقاندا الىپ، استانادان ءۇي العىسى كەلگەندىگىمەن تۇسىندىرگەن. ايەل اقشالاي قاراجاتتى شەكارادان وتكىزۋ ەرەجەسىن بىلمەگەن. سالدارىنان "ەكونوميكالىق كونتراباندا" بابى بويىنشا سوتالدى تەرگەۋ باستالعان.

زايسان اۋداندىق سوتى ءماۋىتحاندى كىنالى دەپ تانىپ، 40 مىڭ دوللار قاراجاتىن مەملەكەت پايداسىنا تاركىلەۋ تۋرالى شەشىم شىعارعان. اپەللياتسيالىق ينستاتسيادا سوت ءوندىرىسىنىڭ ءتىلى تۋرالى نورما بۇزىلعاندىقتان بۇل شەشىمنىڭ كۇشى جويىلعان.

"شقو پروكۋراتۋراسى بۇل ءىستىڭ ءمان-جايىن تۇبەگەيلى زەرتتەدى. باقىلاۋ ورگانى ءماۋىتحاننىڭ ارەكەتىندە قىلمىس قۇرامى جوق دەگەن قورىتىندىعى كەلدى. مۇنداي شەشىم ءماۋىتحاننىڭ قحر-دان جاسىرىن اقشا شىعارعىسى كەلمەگەندىگىنەن قابىلداندى. ايەلدىڭ ماقساتى - وتانعا ورالۋ. ءماۋىتحان كوپ ۋاقىت بويى اقشا جيناپ، بار مۇلكىن ساتىپ، ورالمان ستاتۋسىن العان، ال شەكارادان وتكەن كەزدە ەكونوميكالىق قىلمىس جاسادى دەگەن كۇدىكپەن ۇستالىپ، اقشاسى تاركىلەنگەن. بۇل جاعدايدا قىلمىستىق جاۋاپكەرشىلىككە تارتۋ ادىلدىك پرينتسيپىنە جاتپايدى", - دەدى وبلىس پروكۋراتۋراسىنىڭ ءباسپاسوز قىزمەتىندەگىلەر.

گۇلجان ءماۋىتحاننىڭ جاعدايىن Abai.kz اقپاراتتىق پورتالى بىرنەشە رەت جازعان بولاتىن (شەكارا قىزمەتكەرلەرى قانداستاردىڭ قالتاسىن قاعۋدى قاشان توقتاتادى، ساعىنتاەۆ مىرزا! شەكارادا تونالعان جەسىر انانىڭ اقشاسى قايتقان جوق، ادىلبەك مۇقتاشۇلى: ۇستىمىزدەن قىلمىستىق ءىس قوزعالىپ جاتىر).

كەيۋانانىڭ جانايقايىن قالىڭ جۇرتشىلىققا جەتكىزۋدەگى ماقساتىمىز ورىندالعانىنا قۋانىشتىمىز.

Abai.kz