مىرزان كەنجەباي. كەڭدىگى دە كەسىر بولدى قازاققا
ماڭدايىنا باق بىتپەگەن ءبىر ەلى
شالقاردا ءبىر شال بار ەدى كيەلى
«تويعانعا ءماز جۇرە بەرسە، بۇل قازاق
قابىل بولماس دەۋشى ەدى ەش تىلەگى»
بايلىعىن دا ايتا بەرمە دالانىڭ،
بايلىق دەگەن باقىت ەمەس قاراعىم،
ەرسى ۇرانعا ەرە بەرمەي،
ەس جيىپ،
مىنا وزبەك ۇلتىنا دا ءبىر قاراعىن.
باسشىلارى انا ءتىلىن باپتايدى،
ۇل مەن قىزى سالت-ءداستۇرىن ساقتايدى،
ساتىلمايدى «كوممۋنيزم كەلەد» – دەپ
ۋادەمەن اعىزساڭ دا اق مايدى
اۋزىن تىرناپ بۇگىن بىتەۋ جارانىڭ،
سول ءبىر قايران قارتىمدى ەسكە الامىن
ەسكە الامىن
بىراق ەسى كىرمەيتىن
قازاق دەگەن ەرجەتپەيتىن بالامىن.
قاڭعى قاپتاپ، تىرناعىما تۇرماس كىل،
جال-جاياما اۋىز سالعان مىڭ قاسقىر
«اق مول بولسىن!» – دەپ تىلەسەم ناۋرىزدا
ايران ەمەس ىشەتىنىم – «فۋدماستەر»
ەلۋ جىلدان سوڭ كەلەر دەپ عاجاپ كۇن
ءوزىمدى الداپ، وزگەلەرگە مازاقپىن،
بۇل بايلىقتىڭ جوعى جاقسى ەد بارىنان
ءوز بايلىعى سورى بولدى-اۋ قازاقتىڭ
موڭكە ايتقان «ءدۇدامالداۋ» ءدىنىم بار،
موڭكە ايتقان «الاشۇبار» ءتىلىم بار.
كوك تيىندىق پايداسى جوق قازاققا
كۇناراتپا فورۋمدار بار، جيىن بار
مۇنايىم بار، مۇناي ەمەس – مۇڭىم بار،
ۋرانىم بار، ۋران ەمەس – ۋىم بار،
«بايقوڭىردا باقىت قۇسى – «پروتون»،
دەسە سەنەم، – ءبىرىڭ ءولىپ ءبىرىڭ قال!»
«تورگە شىقسىن باسقالاردىڭ باسى» - دەپ
قۇدايىم-اي، نەگە مۇنشا جاسىق ەك؟
«كەلەر كۇنىڭ بولادى، – دەپ، – كۇماندى» –
ءدال كەلدى عوي موڭكە ايتقان قاسىرەت
يت يىسكەمەس توز-توز بولدى-اۋ اينالام،
شار بولاتتاي شارت ەتەدى قاي بالاڭ
باتىر ەدىك، اڭقاۋ ءسابي بولدىق-اۋ
ويىنشىق قىپ قۇمعا قىلىش قايراعان.
ىزدەگەنگە تەگىن بايلىق – از باق پا –
كەلىپ جاتىر ارامزا دا، كاززاپ تا
وي مەن قىرعا قاڭعىمانى قاپتاتىپ
كەڭدىگى دە كەسىر بولدى-اۋ قازاققا
Abai.kz
