تۋعان جەرگە دەگەن سۇيىسپەنشىلىك ونىڭ ءار تاسىن، ءار بۇلاعىن قۇرمەتتەۋدەن، تابيعات اناعا ەرەكشە ءمان بەرۋدەن باستالادى ەمەس پە؟ وسى سوزىمىزگە دالەل: جۋىردا وڭتۇستىك قازاقستان وبلىسى، سوزاق اۋدانىنداعى كەلىنشەكتاۋ ەتەگىندە ورنالاسقان اباي ەلدى مەكەنىندە XII عاسىرعا ءتان ەكى بالبال تاس تابىلدى. كونە تاس ەسكەرتكىشتى جەرگىلىكتى تۇرعىندار قاراتاۋ جازىعىنداعى ارپا وزەنى بويىنان بايقاعان. ەر مەن ايەلدىڭ سۇلباسى قاشالىپ بەينەلەنگەن تاس، ورتا عاسىرداعى تاريحتان سىر شەرتەدى. اباي ەلدى مەكەنىنەن 3 شاقىرىم قاشىقتىقتا ورنالاسقان ارپا وزەنەن ەرەكشە تاستى بايقاعان اۋىل ازاماتتارى جەردەن قازىپ العان. كونە ەسكەرتكىش شىعىسقا قاراپ ورناتىلعان.

اباي اۋىلىنىڭ تۇرعىنى ءجانسات سەيىتوۆ «ءبىر تاستىڭ ۇشى شىعىپ ەرەكشە كورىندى. اۋىل ازاماتتارى جابىلىپ كوتەرىپ ەدىك، جان-جاعىنان سۋرەتتەر شىعا باستادى. سونىمەن ول تاستى بولەك قويدىق. ءدال سول ماڭايدان تاعى ءبىر تاس كورىندى. ول دا جەردەن 3-4 سم شىعىپ تۇر ەكەن. كوتەرىپ ەدىك، ول دا قوزعالمادى. ابايلاپ قاراساق ەكىنشى بەتىندە سۋرەتى بار ەكەن. بىزگە ولاردى الۋ قىزىق بولدى»، - دەيدى.

تابىلعان جادىگەردى اۋدان اكىمى س. پولاتوۆ ارنايى بارىپ كورىپ، ەرەكشە قورعاۋدى تاپسىردى. كونە تاس مۇراجاي قىزمەتكەرلەرىنىڭ قىزىعۋشىلىعىن تۋدىرىپ وتىر. ولاردىڭ سوزىنشە، بالبالتاستار ەجەلگى تۇركى داۋىرىنە ءتان. تەرەڭ تاريحتان سىر شەرتەر قۇندى دۇنيەنى عالىمدار زەرتتەۋگە مۇددەلى. بالبال تاس اۋداندىق س. قوجانوۆ اتىنداعى مۇراجايدا ساقتالاتىن بولدى.

Abai.kz