قىرعىز-وزبەك شەكارا كەلىسسوزدەرى ءجۇرىپ جاتىر
وزبەكستاننىڭ نامانعان قالاسىندا قىرعىز جانە وزبەك ۇكىمەتتەرىنىڭ ەكى ەل اراسىنداعى شەكارانى دەليميتاتسيالاۋ جانە دەماركاتسيالاۋ جونىندەگى كەزەكتى كەزدەسۋى باستالدى. بيىل ەكى ەل ماماندارى وسىمەن 15 رەت باس قوسقان.
رەسمي مالىمەت بويىنشا، كەلىسسوزدەر 5 تامىزدا باستالىپ، 13 تامىزدا اياقتالادى. 2016 جىلدىڭ اياعىنان بەرى ەكى ەلدىڭ ءتيىستى مەكەمەلەرىنىڭ وكىلدەرى اي سايىن پىكىر الماسىپ، قىرعىزستان مەن وزبەكستان اۋماقتارىندا كەزدەسىپ ءجۇر.
ەكى ەل دەلەگاتسيالارىنىڭ رەسمي وكىلدەرى "كەلىسسوزدەر ىلگەرىلەدى" دەگەندى ايتتى، بىراق ونىڭ ناتيجەلەرى مەن قاشان اياقتالاتىنى تۋرالى ازىرگە قۇپيا ساقتاپ وتىر.
وزبەكستان مەن قىرعىزستان اراسىنداعى شەكارا 1378 شاقىرىمعا سوزىلىپ جاتىر، ونىڭ 230 شاقىرىمىنىڭ مارتەبەسى ءالى بەلگىلەنبەگەن.
Abai.kz
