استانادا ەاەو مەن يران اراسىنداعى ساۋدا قاتىناسى تالقىلاندى
استانادا 14 تامىزدا ەۋرازيالىق ۇكىمەتارالىق كەڭەس ەۋرازيالىق ەكونوميكالىق وداق (ەاەو) پەن يران اراسىندا ەركىن ساۋدا ايماعىن قۇرۋ بارىسىن تالقىلادى دەپ حابارلايدى رەسمي باق.
EXPO-2017 كورمەسى اياسىندا استانادا ءوتىپ جاتقان بۇل كەڭەسكە ەاەو ەلدەرىنىڭ ۇكىمەت باسشىلارى مەن ەۋرازيالىق ەكونوميكالىق كوميسسيا توراعاسى تيگران ساركيسيان قاتىستى.
قاتىسۋشىلار ەاەو ەلدەرىندە جۇمىس ىستەيتىندەردى زەينەتپەن قامتاماسىز ەتۋ جونىندەگى كەلىسسوزدى تالقىلاعان. سونىمەن بىرگە ەاەو اياسىندا اۆياتسيا اپاتتارىن تەرگەيتىن ارنايى كوميسسيا قۇرۋ، ۇلتتىق جانە حالىقارالىق جۇرگىزۋ كۋالىگىن ءوزارا مويىنداۋدى دا قاراستىرعان.
رەسەي باسىم تۇراتىن ەۋرازيالىق ەكونوميكالىق وداققا قازاقستان، قىرعىزستان، بەلارۋس جانە ارمەنيا ەلدەرى مۇشە.
Abai.kz
