بۇرىن قوستانايدا بالالاردىڭ جازعى ساۋىقتىرۋ لاگەرلەرى ويداعىداي جۇمىس ىستەپ، وقۋشىلاردىڭ وسى ماۋسىمدا ەركىن ءبىر دەمالىپ، ويناپ-قۋناپ قايتۋىنا جاقسى جاعداي جاسالاتىن. وعان بالالارمەن قاتار اتا-انالار قۋانىپ قالۋشى ەدى. بالالار بولسا، جاز بويى دەنساۋلىعىن تۇزەتىپ، مەكتەپكە شاتتانا ورالاتىن.

الايدا قازىر بۇلاردىڭ ءبارى دە كوز بۇل-بۇل ۇشقالى تۇر. وسىنداعى جازعى ساۋىقتىرۋ لاگەرلەرىنە كوڭىل بولىنبەي، كەزىندە جوندەۋ جۇمىستارى جۇرگىزىلمەي، بيلىك باسىنداعىلاردىڭ مۇنداي «ۇساق-تۇيەككە» كوڭىل بولمەگەندىگىنەن بۇلاردىڭ بارلىعى دەرلىك جابىلعالى تۇر. مۇنداي كەلەڭسىز جايتتى وبلىستىق ءبىلىم باسقارماسىنىڭ باسشىسى ءباتيما داۋىموۆانىڭ ءوزى دە مويىنداپ وتىر. ماسەلەن، وبلىسىمىزداعى اۋليەكول جانە قارابالىق اۋداندارىنداعى لاگەرلەر دابىل كوتەرەرلىكتەي. مۇندا كوپتەن بەرى كۇردەلى جوندەۋ جۇمىستارى جۇرگىزىلمەگەن، قۇلاۋدىڭ ءسال الدىندا تۇر. سونداي-اق ليساكوۆ قالاسىنداعى «الىي پارۋس»، دەنيسوۆ اۋدانىنداعى «سولنەچنىي» لاگەرلەرلەرى دە وسىنداي كۇي كەشىپ وتىر. ال وبلىسىمىزدىڭ اسا ءىرى قالالارىنىڭ قاتارىنداعى قوستاناي مەن جىتىقارا قالالارىندا ساۋىقتىرۋ لاگەرلەرىنىڭ اتىمەن جوقتىعى ەشكىمنىڭ دە شىمبايىنا باتىپ تۇرعان جوق. ءدال وسىنداي جاعداي قوستاناي، سارىكول جانە تاران اۋداندارىندا دا ورىن العان. وعان وسى اتالمىش قالا مەن اۋدانداردىڭ باسشىلىعىنىڭ سەلت ەتەر ءتۇرى بايقالمايدى. «جانى اشىماستىڭ قاسىندا باسىڭ اۋىرماسىن» دەگەن وسى شىعار.

ءبىزدى اسىرەسە وبلىستىڭ قالا سىرتىنداعى «التىن گۇل» لاگەرىنىڭ جايى قاتتى الاڭداتادى. ول نەگىزىنەن جەتىم جانە اتا-اناسىنىڭ قامقورلىعىنسىز قالعان بالالاردى ساۋىقتىرۋعا ارنالعان. مىنە، بۇل لاگەردىڭ دە جوندەۋ جۇمىستارىن كورمەگەلى كوپ بولدى. بۇگىنگى جايى ادام شوشىرلىق.

بۇل شارۋا دەر كەزىندە قولعا الىنباعاندىقتان، ول سوزىلمالى اۋرۋدىڭ جاعدايىنا اينالىپ كەتتى. بيۋدجەتتە ونى كوتەرەتىن قارجى جوق. وعان بولىنگەن قارجى دىم ماردىمسىز. بار ءۇمىت بۇعان مەملەكەتتىك-جەكە سەرىكتەستىككە تارتۋ ەدى. بۇعان كاسىپكەرلەردىڭ ونشا ىنتاسى بولماي وتىر. وسىنداي ارى يتەرىپ، بەرى جىعۋدىڭ سالدارىنان وبلىسىمىزداعى بالالاردى ساۋىقتىرۋ لاگەرلەرىنىڭ باسىنا بۇلت ءۇيىرىلىپ تۇر. بۇيتە بەرسە، ول لاگەرلەردەن مۇلدەم ايىرىلىپ قالاتىن جاعدايىمىز بار.

جايبەرگەن بولاتوۆ، قوستاناي

Abai.kz