ەلوردادا ءوتىپ جاتقان «استانا ەكسپو-2017» كورمەسى انە-مىنە اياقتالار ۋاقىت جاقىندادى. كوركىمەن كوز تارتار ەكسپو بازاسىندا حالىقارالىق جاسىل تەحنولوگيالار ورتالىعى قۇرىلاتىن بولدى.

بۇل باستامانى 86 مەملەكەتتىڭ باسشىلارى مەن 15 حالىقارالىق ۇيىم قولدادى، دەپ حابارلايدى «Abai.kz» اقپاراتتىق پورتالى  «LS» سايتىنا سىلتەمە جاساي وتىرىپ.

استانادا «بولاشاقتىڭ ەنەرگياسى» اتتى فورۋم ءوتىپ جاتىر. فورۋم اياسىندا ۇيىمداستىرىلعان «حالىقارالىق ەكونوميكا جانە قورشاعان ورتانى قورعاۋ ساياساتى» اتتى XI-كونفەرەنتسياسىنا قاتىسقان حالىقارالىق دەلەگاتسيا ءدال وسىلاي دەپ مالىمدەدى.

اتالعان جيىندا قر ادىلەت مينيسترلىگىنىڭ زياتكەرلىك مەنشىك قۇقىعى دەپارتامەنتىنىڭ ديرەكتورى ناتاليا پان حانىم ءسوز سويلەپ، جەل ەنەرگياسى سالاسىندا يننوۆاتسيالىق تەحنولوگيالاردى دامىتۋ جانە ەنگىزۋ بويىنشا قازاقستاننىڭ زاڭنامالىق الەۋەتى جەتكىلىكتى ەكەنىن ايتتى.

«قازىردىڭ وزىندە دۇنيەجۇزىندە گاز سەكىلدى ءداستۇرلى ەنەرگيا كوزدەرىن تۇتىنۋ سيرەپ بارادى. سوندىقتان، جاڭارتىلعانەنەرگياعا سۇرانىس كۇن ساناپ ارتاتىن بولادى. بۇل تۇرعىدان، قازاقستان رەسپۋبليكاسىنىڭ بىرقاتار زاڭنامالارىنا وزگەرىستەر ەنگىزىلدى. سونىڭ ىشىندە جاڭارتىلعان ەنەرگيان قولدايتىن، وسى سالادا باسەكەلەستىكتى قالىپتاستىراتىن زاڭ جوبالارى قابىلداندى»، - دەدى ناتاليا حانىم.

ايتا كەتەيىك، قابىلدانىپ وتىرعان شارالار لەگى مۇنىمەن شەكتەلمەيدى. حالىقارالىق ۇيىم  باستاماسىنىڭ شەڭبەرىندە قازاقستان جاسىل پاتەنتتەرگە ونلاين-رەەستر جۇرگىزەتىن بولادى.

مىسالى، ەكسپو-2017 كورمەسى بارىسىندا بىرنەشە جوباعا قازاقستان پاتەنت بەردى. ناتاليا حانىمنىڭ ايتۋىنشا، 2015 جىلدان باستاپ اتالعان سالاعا قاتىستى تىڭ جوبالاردى قابىلداۋدىڭ جەتەلدەتىلگەن شاراسى باستالىپ كەتكەن.

كۇنى بۇگىنگە دەيىن «جاسىل تەحنولوگيا» تاقىرىبى بويىنشا 2593 جوباعا پاتەنت بەرىلىپتى.

اسىرەسە، تابيعاتتى قورعاۋعا ارنالعان تەحنولوگيالار تاوىرىبىنداعى جوبالار كوپتەپ تۇسكەن. ال ۇسىنىلعان جوبالاردىڭ 45%-ى قاتتى قالدىق زاتتاردى جويۋ،  36%-ى سۋدى قايتا وڭدەۋ، توعان سۋلاردى تازارتۋعا باعىتتالىپتى.

سونداي-اق، جاڭارتىلعان ەنەرگيا كوزدەرى تاقىرىبى بويىنشا كەلىپ تۇسكەن جوبالاردىڭ ىشىندە 33% جەل قوزعالتقىشى، 23%-ى كۇن ەنەرگياسىنان جىلۋ الۋ، 19%-ى يادرولىق فيزيكا، 14,5%-جارتىلايتوكتى ەلەكتر قۇرىلعىلارى تاقىرىپتارى بويىنشا پاتەنتتەلگەن.

ايتا كەتەيىك، كونفەرەنتسيا تاقىرىبى قورشاعان ورتانى قورعاۋ ماسەلەلەرى مەن وسى باعىتتاعى ساياسي ءام ەكونوميكالىق  سەرىكتەستىكتى ارتتىرۋعا باعىتتالىپ وتىر.

Abai.kz