الماتىدا دۇركىرەگەن دۋمان ءوتتى. دوستىق ۇيىندە جەتىسۋ كازاكتارى وداعىنىڭ قۇرىلعانىنا 150 جىل تولۋىنا وراي مادەني ءىس-شارا ۇيىمداستىرىلدى. بۇل تۋرالى "Abai.kz" اقپاراتتىق پورتالى حابارلايدى.

الماتى قالاسىندا ورنالاسقان دوستىق ۇيىندە تامىزدىڭ 12- كۇنى  جەتىسۋ كازاكتارى وداعىنىڭ 150-جىلدىعىنا ارنالعان ءىس-شارا وتكىزىلدى.

ءىس-شارانى «جەتىسۋ كازاكتارى وداعى» قوعامدىق بىرلەستىگىنىڭ، «قازاقستاننىڭ ورىس، سلاۆيان جانە كازاك ۇيىمدارىنىڭ اسسوتسياتسياسى» زتب، «جەتىسۋدىڭ حالىق داستۇرلەرى» قب الماتى ق. اكىمدىلىگىنىڭ، قحا حاتشىلىعى مەن «قوعامدىق كەلىسىم» كمم جانە استانالىق جانە قازاقستاندىق ميتروپوليت الەكساندردىڭ قولداۋىمەن ۇيىمداستىردى.

ءىس-شارا جكو اۋداندىق جانە وبلىستىق فيليالدارىنىڭ، پراۆوسلاۆيەلىك شىركەۋدىڭ وكىلدەرى، الماتى ق. مەن وبلىسىنىڭ ەتنومادەني بىرلەستىكتەرىنىڭ مۇشەلەرى، «كسوا» زتب رەسپۋبليكالىقى كەڭەسىنىڭ مۇشەلەرى مەن رەسەي فەدەراتسياسىنان كەلگەن قوناقتاردىڭ قاتىسۋىمەن ءوتتى.

الماتىداعى دوستىق ۇيىندە وتكىزىلگەن دوڭگەلەك ۇستەلدە قازاقستان رەسپۋبليكاسىنىڭ پرەزيدەنتى، قازاقستان حالقى اسسامبلەياسىنىڭ توراعاسى ن.ءا.نازارباەۆكە قازاقستانداعى بىرلىك پەن بەيبىتشىلىكتى كۇشەيتۋ، ەكونوميكانى بەلسەندى دامىتۋ مەن حالىقتىڭ ماتەريالدىق قامسىزداندىرۋدى كوبەيتۋدەگى اسا ماڭىزدى جۇمىسى ءۇشىن العىس ءبىلدىرىلدى.

ايتا كەتەيىك، جەتىسۋ كازاكتارى وداعىنىڭ وكىلى ۆلاديمير شيحوتوۆ مىرزا "Abai.kz" اقپاراتتىق پورتالىنا سۇحبات بەرىپ، وداقتىڭ قازىرگى تىنىس-تىرشىلىگى تۋرالى ايتىپ بەرگەن بولاتىن.

الماتىدا وتكەن بۇل يگى شاراعا "Abai.kz" اقپاراتتىق پورتالى دا قۇرمەتتى قوناقتار قاتارىندا شاقىرىلدى.

ەرعالي بەرىكۇلى

Abai.kz