ەلباسىمىز مازمۇنى مەملەكەتتىك باعادارلاماعا تاتيتىن «بولاشاققا باعدار: رۋحاني جاڭعىرۋ» اتتى ماقالاسىندا: «ماقساتقا جەتۋ ءۇشىن ءبىزدىڭ سانامىز ىسىمىزدەن وزىپ ءجۇرۋى، ياعني ودان بۇرىن جاڭعىرىپ وتىرۋى ءتيىس. بۇل ساياسي جانە ەكونوميكالىق جاڭعىرۋلاردى تولىقتىرىپ قانا قويماي، ولاردىڭ وزەگىنە اينالادى» دەگەن بولاتىن.

راس، بۇرىن تەحينيكا، ەكونوميكا ءبارىن شەشەدى دەپ ويلاۋشى ەدىك. قازىر ءبارى وزگەرىپ جاتقان زاماندا ماسەلەنىڭ دەنىن ۇلتتىق سانا شەشەدى دەگەن اقيقاتقا كوز جەتكىزىپ وتىرمىز.  ەگەر حالىق وتە ءبىلىمدى بولسا، ول كەز كەلگەن ورتاعا دا، زامانعا دا بەيىمدەلىپ كەتەدى ەكەن.  سوندىقتان ءبىرىنشى جەتىستىككە تەز جەتەتىن ەكونوميكا ەمەس، ۇلتتىق سانا بولادى.

رۋحاني جاڭعىرۋ قازاقستاندا تەك بۇگىن باستالىپ جاتقان جۇمىس ەمەس. ول جونىندە پرەزيدەنت:

«ءبىز تاۋەلسىزدىك كەزەڭىندە بۇل باعىتتا بىرنەشە اۋقىمدى ءىس اتقاردىق. 2004 جىلى «مادەني مۇرا» باعدارلاماسى اياسىندا قازاقستان اۋماعىنداعى تاريحي-مادەني ەسكەرتكىشتەر مەن نىسانداردى جاڭعىرتتىق. 2013 جىلى «حالىق – تاريح تولقىنىندا» باعدارلاماسى ارقىلى الەمنىڭ ەڭ بەلدى ارحيۆتەرىنەن ءتول تاريحىمىزعا قاتىستى قۇجاتتاردى جۇيەلى تۇردە جيناپ، زەرتتەدىك. ەندى وسىنىڭ بارىنەن دە اۋقىمدى جانە ىرگەلى جۇمىستاردى باستاعالى وتىرمىز» ، - دەدى.

زاماناۋي قازاقستاندا قازىر ءبىلىم مەن عىلىمعا كوپ كوڭىل ءبولىنىپ جاتىر. تاياۋداعى ون جىلدا ءومىر سالتى تۇبەگەيلى وزگەرەدى. ەلباسى بۇعان دايىن بولۋ كەرەكتىگىن ەسكەرتتى. سوندىقتان اشىق بولۋ، باسقالاردىڭ ەڭ وزىق جەتىستىكتەرىن قابىلداي ءبىلۋ كەرەك. سەبەبى بۇل – تابىستىڭ كىلتى، وزىق زەردەنىڭ باستى كورسەتكىشى. پرەزيدەنتتىڭ ايتۋىنشا، جاڭعىرعان قوعامنىڭ  ءوزىنىڭ رۋحاني كودى بولادى. جاڭا تۇرپاتتى جاڭعىرتۋدىڭ ەڭ باستى شارتى – سول ۇلتتىق كودتى ساقتاي ءبىلۋ. ال، «ۇلتتىق كود، ۇلتتىق مادەنيەت ساقتالماسا، ەشقانداي جاڭعىرۋ بولمايدى». تاعى دا ەلباسىنىڭ ءوز سوزىنە جۇگىنەيىك:

«ءبىز اركىم جەكە باسىنىڭ قانداي دا ءبىر ىسكە قوسقان ۇلەسى مەن كاسىبي بىلىكتىلىگىنە قاراپ باعالاناتىن مەريتوكراتيالىق قوعام قۇرىپ جاتىرمىز. بۇل جۇيە جەڭ ۇشىنان جالعاسقان تامىر-تانىستىقتى كوتەرمەيدى. وسىنىڭ ءبارىن ەگجەي-تەگجەيلى ايتىپ وتىرعانداعى ماقساتىم – بويىمىزداعى جاقسى مەن جاماندى سانامالاپ تەرۋ ەمەس. مەن قازاقستاندىقتاردىڭ ەشقاشان بۇلجىمايتىن ەكى ەرەجەنى ءتۇسىنىپ، بايىبىنا بارعانىن قالايمىن. ءبىرىنشىسى – ۇلتتىق كود، ۇلتتىق مادەنيەت ساقتالماسا، ەشقانداي جاڭعىرۋ بولمايدى. ەكىنشىسى – العا باسۋ ءۇشىن ۇلتتىڭ دامۋىنا كەدەرگى بولاتىن وتكەننىڭ كەرتارتپا تۇستارىنان باس تارتۋ كەرەك».

ماقالادا رۋحانياتتى قايتا تۇلەتۋ كوزدەلگەن. ول ءۇشىن مەملەكەت باسشىسى بىرنەشە باستاما كوتەرىپ، جوبالار ۇسىندى. سونىڭ ءبىرى – قازاق ءتىلىن بىرتىندەپ لاتىن الىپبيىنە كوشىرۋ. ۇلت جاناشىرلارى مەن قوعام بەلسەندىلەرىنىڭ پىكىرىنشە، ءبىزدىڭ قوعام مۇنداي ۇردىسكە دايىن. ونىڭ ۇستىنە وسكەلەڭ ۇرپاق لاتىن قارىپتەرىمەن تانىس. اعا بۋىن وكىلدەرىنە دە لاتىن قارىپى ەش قيىندىق تۋدىرا قويمايدى. ۇلتتىڭ رۋحاني جاڭعىرۋىنىڭ ءبىر باستاۋى ،مىنە،  وسىندا جاتسا كەرەك.

تىنىسبەك ءشارىپۇلى، قر ۇعا اكادەميگى