«تۇركىمەنستان حرونيكاسىنىڭ» حابارلاۋىنشا، ارنايى قىزمەت كۇدىكتى ەكى ادامدى ۇستاعان.

«28 تامىزدا تۇركىمەنباشى قالاسىنىڭ كەمەجايىندا ارنايى قىزمەت تەراكتىنىڭ الدىن الدى. قاسكۇنەمدەر - اعايىندى ەكەۋ، تۇركىمەن ازاماتتارى. ولار تۇركىمەنباشى مەن باكۋ اراسىنا قاتىنايتىن «باقتيار» كەمەسىنە جارىلعىش زاتتار الىپ كىرمەك بولعان»، - دەپ جازادى باسىلىم.

سونىمەن بىرگە اقپاراتقا سايكەس، اعايىندىلار كەمەگە بىرنەشە بيلەت ساتىپ العان. ولاردان بولەك كەمەدە 170 جولاۋشى مەن ونداعان اۆتوكولىك بولعان. كۇدىكتىلەر جارىلعىش زاتتاردى جەكە-جەكە الىپ كىرىپ، كەمەنىڭ ىشىندە جارماق بولعان.

ماۋسىم ايىندا ازاتتىقتىڭ تۇركىمەن قىزمەتى دەرەككوزدەرىنە سۇيەنىپ، تۇركىمەنستاننىڭ قاۋىپسىزدىك قىزمەتى ەل اۋماعىندا تەراكتى بولۋ مۇمكىن دەگەن اقپارات العانىن جاريالاعان. اقپارات تۇرىكتىڭ ارنايى قىزمەتىنەن ءتۇسۋى مۇمكىندىگى دە ايتىلعان. وندا تەراكتى "يسلام مەملەكەتى" ەكسترەميستىك ۇيىمىنىڭ ستيلىندە جاسالىنۋى مۇمكىن دەلىنگەن.

Abai.kz