بۇگىن پالاتا سپيكەرى نۇرلان نىعماتۋليننىڭ توراعالىعىمەن ءماجىلىستىڭ جالپى وتىرىسى ءوتتى. ءماجىلىس توراعاسى ەلىمىزدىڭ ترانزيتتىك-كولىك الەۋەتىن پايدالانۋعا باعىتتالعان راتيفيكاتسيالاناتىن زاڭ جوبالارىنىڭ ماڭىزدىلىعىن اتاپ ءوتتى دەپ حابارلايدى اباي-اقپارات ءماجىلىستىڭ ءباسپاسوز قىزمەتىنە سىلتەمە جاساي وتىرىپ .

حالىق قالاۋلىلارى قازاقستان مەن وزبەكستان اراسىنداعى حالىقارالىق اۆتوموبيل قاتىناسى تۋرالى ۇكىمەتارالىق كەلىسىمدى، سونداي-اق، قازاقستان مەن نورۆەگيا اراسىنداعى حالىقارالىق اۆتوموبيل تاسىمالدارى تۋرالى ۇكىمەتارالىق كەلىسىمدەگى زاڭنامالىق تۇزەتۋلەردى راتيفيكاتسيالاۋعا ارنالعان زاڭ جوبالارىن ماقۇلدادى.

ن. نىعماتۋلين اتاپ وتكەندەي، وزبەكستان جانە نورۆەگيامەن جاسالعان كەلىسىمدەر ەلىمىزدىڭ كولىكتىك ينفراقۇرىلىمىن پايدالانا وتىرىپ، جاھاندىق لوگيستيكالىق جۇيەنى قالىپتاستىرۋعا باعىتتالعان.

- بۇل مەملەكەت باسشىسى نۇرسۇلتان ءابىشۇلى نازارباەۆتىڭ قازاقستان رەسپۋبليكاسىنىڭ ترانزيتتىك الەۋەتىن جۇزەگە اسىرۋ جانە قازاقستاننىڭ ەڭ قۋاتتى ەۋرازيالىق كولىكتىك-لوگيستيكالىق حابقا اينالۋى تۋرالى جۇكتەگەن مىندەتتەرىن ورىنداۋ ءۇشىن  وتە ماڭىزدى، - دەدى ءماجىلىس توراعاسى.

كەلىسىمدەردى راتيفيكاتسيالاۋ جولاۋشىلاردى، سونداي-اق اۆتوموبيل كولىگىن، ساۋدا-ەكونوميكالىق ىنتىماقتاستىقتى دامىتۋ ءۇشىن نورماتيۆتىك-قۇقىقتىق بازانى قۇرۋعا مۇمكىندىك بەرەدى.

اباي-اقپارات