مەن ۇلى ساياساتكەر دە، كەمەڭگەر ساياساتتانۋشى دا ەمەسپىن، قاراپايىم قازاقپىن. بىراق سوڭعى قازاق-قىرعىز قاتىناسىنا قاتىستى جايتتى ءتۇسىنۋ ءۇشىن دانىشپان بولۋدىڭ قاجەتى جوق. ءبىرىنشى ءسوزىنىڭ ءوزى دە، بۇگىنگى ءسوزى دە ناعىز ساياسي ارانداتۋ.

اتالمىش سوزدەردەن كەيىن قوس ۇلتتىڭ اراسىندا سىنا قاعىلارى انىق. ويتكەنى قوعامنىڭ ىشىندە ءتۇرلى تۇسىنىكتەگى ادامدار بار. تۇركى حالىقتارىنىڭ بىرلىگى ەڭ ماڭىزدى بولۋعا ءتيىس ساتتە، ولاردىڭ ارازداسۋى، ارتىنشا السىرەۋى كىمگە ءتيىمدى؟ ارينە، تۇركى ەلدەرىنىڭ كوركەيۋىن قالامايتىندارعا. دەمەك قىرعىز باسشىسى سولاردىڭ ءسوزىن سويلەپ وتىر.

قازاق بيلىگى دە سۇتتەن اق، سۋدان تازا ەمەس شىعار، بىراق ءدال مۇنداي ايىپتاۋعا بارا قويماس. بىرەۋدەن قورىققانى ءۇشىن ەمەس، بىرلىكتى قالاعانى ءۇشىن. دارحان كوڭىل قازاق وسى ۋاقىتقا دەيىن حان كەنەنىڭ باسىن ورىستان سۇراسا دا، قىرعىزدان داۋلاعان ەمەس! ويتكەنى قىم-قۋىت زاماندا بىزگە بىرلىك ماڭىزدى. قاراپايىم قازاقتىڭ ساياسي ساۋاتتىلىعى كەي تۋىستاس باۋىرلارىمىزعا قاراعاندا جوعارى ەكەنىنە وسىندايدا ريزا بولامىن. باستىسى بىرلىك بۇزىلماسىن!

اسحات قاسەنعالي

Facebook-تەگى پاراقشاسىنان