ەلىمىزدىڭ ەنەرگەتيكا مينيسترلىگى EXPO 2017 كورمەسىندە ۇسىنىلعان ەنەرگەتيكا سالاسىندا جۇزەگە اسىرىلاتىن جوبالاردى ىرىكتەۋدى اياقتاۋعا جاقىن، - دەپ حابارلايدى Abai.kz اقپاراتتىق پورتالى.

بۇل تۋرالى ەنەرگەتيكا ۆيتسە-ءمينيسترى ماعزۇم مىرزاعاليەۆ قازاقستان ۇكىمەتىنىڭ ءباسپاسوز ورتالىعىندا وتكەن بريفينگ بارىسىندا جاريالادى.

«EXPO كورمەسىندە ۇسىنىلعان شەتەلدىك جەتەكشى تەحنولوگيالاردى ەلىمىزدىڭ ەكونوميكاسىنا ەنگىزۋ وتە ماڭىزدى. قازىرگى ۋاقىتتا مينيسترلىك وسى ساۋالدى پىسىقتاۋدا. ءبىز «قازمۇنايگاز»، «قازترانسگاز»، KEGOC سەكىلدى ۇلتتىق كومپانيالاردىڭ 40 استام جەتەكشى ساراپشىسىنان، سونداي-اق ەنەرگەتيكانىڭ ءارتۇرلى سەكتورلارىنىڭ ساراپشى-تالداۋشىلارىنان، مينيسترلىك پەن ۆەدومستۆولىق باعىنىشتى قۇرىلىمداردىڭ وكىلدەرىنەن تۇراتىن ساراپتاۋشى جۇمىس توبىن قۇردىق»، - دەدى م.مىرزاعاليەۆ.

جۇمىس توبىنىڭ وكىلدەرى EXPO 2017 حالىقارالىق پاۆيلوندارى ۇسىنعان جاڭا تەحنولوگيالاردىڭ ساراپتاماسىن وتكىزدى. ونىڭ ناتيجەسىندە اۆستريا، گەرمانيا، نيدەرلاند، رەسەي، فينليانديا سەكىلدى ەلدەردىڭ 105 تەحنولوگياسى كىرگەن ءتىزىم جاسالدى.

«تەحنولوگيالار ءتورت باعىتقا ءبولىندى: مۇناي جانە گاز، كومىر جانە اتوم ونەركاسىبى، ەلەكتر ەنەرگەتيكاسى، جەك جانە ەنەرگيانى ۇنەمدەۋ، ەكولوگيا، سونىڭ ىشىندە قالدىقتاردى باسقارۋ، سۋ تازارتۋ، اۋانىڭ ساپاسىن قاداعالاۋ»، - دەپ كورسەتتى ۆيتسە-مينيستر.

ساراپشىلاردىڭ ىرىكتەپ العان جوبالارى اراسىندا ەلەكتر جەلىلەرى مەن ەبج شىعىندارىن ازايتۋعا باعىتتالعان Smart Greed نەمىس تەحنولوگياسى بار.

«جەلىلەرىمىزدىڭ ارحيتەكتۋراسى مەن ۇلكەن قاشىقتاردى ەسكەرسەك، بۇل قازاقستاندىق ەلەكتر ەنەرگەتيكالىق جۇيەسى ءۇشىن وتە ءتيىمدى»، - دەيدى ەنەرگەتيكا ۆيتسە-ءمينيسترى.

ساراپشىلار نازارىنا جەر استى سۋلارىنان جىلۋ جانە ەلەكتر ەنەرگياسىن شىعارۋ - گەوتەرمالدى كوزدەردى قولدانۋ تەحنولوگياسى ىلىكتى.

«حالىقارالىق باعالاۋ بويىنشا، ءۇي شارۋاشىلىقتارى، فەرمەرلىك قوجالىقتار، ونەركاسىپتىك نىساندار مەن مەكەندەردە قولدانۋعا بولاتىن جاڭعىرتىلاتىن ەنەرگەتيكانىڭ وسى تۇرىندە قازاقستاننىڭ الەۋەتى زور»، - دەپ سانايدى ماعزۇم مىرزاعاليەۆ.

ەنەرگيانى ۇنەمدەيتىن «تۋربوسفەرا» بەلارۋس تەحنولوگياسى تابيعي جانە ىلەسپە گازدى ەلەكتر ەنەرگياسىنا تۇرلەندىرە وتىرىپ، كادەگە جاراتۋعا مۇمكىندىك بەرەدى. تەحنولوگيا جەس ەلەكتر ەنەرگياسىن تۇتىنۋدى ازايتۋعا كومەكتەسەتىن مۇناي شىعاراتىن كومپانيالار ءۇشىن دەمەۋ بەرمەك.

ساراپشىلار قاشىرتقى سۋلاردى اۋىزسۋ ساپاسىنا جەتكىزۋگە مۇمكىندىك بەرىپ، قالدىق قوسپالاردىڭ كوندەنساتىن اوك تىڭايتقىش رەتىندە قولدانۋعا جاعداي جاسايتىن فين تەحنولوگياسىنىڭ ناتيجەلىلىگىن راستادى. ۆيتسە-ءمينيستردىڭ ايتۋىنشا، تەحنولوگيانى قولدانۋ مۇمكىندىكتەرى قازاقستاننىڭ قالالىق سۋارناسى مەكەمەلەرىمەن زەرتتەلۋدە.

«كوگىلدىر كومىر» پولشالىق تەحنولوگياسى زياندى زاتتاردىڭ شىعارىلىمىن 80 پايىزعا تومەندەتىپ، كومىر جاعۋدىڭ تيىمدىلىگىن جوعارىلاتۋعا مۇمكىندىك بەرەدى. قازاقستانداعى كومىر گەنەراتسياسى 70 پايىزدان استام ەكەندىگى بارشاعا ايان. سوندىقتان قورشاعان ورتاعا زياندى اسەردى ازايتۋ ماسەلەسىنىڭ وزەكتىلىگى جوعارى»، - دەپ اتاپ ءوتتى ەنەرگەتيكا ۆيتسە-ءمينيسترى.

ماعزۇم مىرزاعاليەۆ حابارلاعانداي، «قازگيدرومەت» رمم ماماندارى ەكولوگيالىق باقىلاۋ جۇرگىزۋدىڭ فين تەحنولوگياسىن سىنقتان وتكىزۋگە كىرىستى. EXPO 2017 پاۆيلونىندا تانىستىرىلعان ەكولوگيالىق باقىلاۋ بويىنشا يننوۆاتسيالىق ستانتسيا استانالا ورناتىلدى. ستانتسيا ەلوردانىڭ اتموسفەرالىق اۋاسىنىڭ قۇرامىن باقىلاپ، ازوت ديوكسيدى، كومىرتەك وكسيدى، كۇكىرت ديوكسيدى، وزون، رم-2,5 جانە رم-10 ولشەنگەن بولشەكتەرى سەكىلدى زاتتاردىڭ قۇرامىن تىركەيدى.

«مەن ونەركاسىپتىك كاسىپورىندار جۇمىسىنا، جالپى قازاقستاننىڭ ەكونوميكاسىنا وڭ اسەر بەرە الاتىن EXPO-2017 كورمەسىندە تاڭدالعان تەحنولوگيالاردىڭ قولدانبالى ەكەندىگىن كورسەتەتىن بىرنەشە مىسالىن كەلتىردىم»، - دەپ كورسەتتى ماعزۇم مىرزاعاليەۆ.

105 تەحنولوگيانىڭ ىشىنەن 45-ءى توعىز وتاندىق كومپانيانىڭ تۇبەگەيلى زەرتتەۋىندە. 14 تەحنولوگيانى 2 ۋنيۆەرسيتەت، ال 12 جوبانى ەكى اكىمدىك پىسىقتاۋدا.

الايدا ۆيتسە-مينيستر باق وكىلدەرىن ارتىق ەيفورياعا بەرىلۋدەن ساقتاندىرىپ، تەحنولوگيانى ىرىكتەۋدەن ونى جۇزەگە اسىرۋعا دەيىنگى جولدىڭ قاشىق ەكەندىگىن ءبىلدىردى. سونىمەن قاتار كەز كەلگەن تەحنولوگيانى ىسكە اسىرۋ قوسىمشا رەسۋرستاردى قاجەت ەتەدى.

«سونىمەن بىرگە، وڭ اسەر ەكونوميكالىق، ەكولوگيالىق، الەۋمەتتىك تۇرعىدان دا زور بولۋى مۇمكىن»، - دەيدى ماعزۇم مىرزاعاليەۆ.

ايتا كەتەيىك، استاناداعى كورمەنى 2 ميلليون تۋريست تاماشالايدى دەپ توپشىلاعان. بيىل 4 ميلليون ءتۋريستتى قوناق ەتتى. كورمە پاۆيلوندارىن ۇزىن-ىرعاسى 30 ميلليون ادام كىرىپ كورگەن.

Abai.kz