قازاق ءالىپبيىن لاتىن گرافيكاسىنا كوشىرۋگە قاتىستى تالقى ءبىتىپ، پرەزيدەنت جارلىق شىعاردى. ءالىپبيدى كيريلليتسادان لاتىن گرافيكاسىنا كوشىرۋ تۋرالى جارلىققا قول قويدى. بۇل تۋرالى "اقوردانىڭ" رەسمي سايتى مالىمدەدى.

2017 جىل. 26-قازان. № 569 جارلىق. بۇل جارلىق بەكىتىلدى. قازاق قوعامىندا قىزۋ تالقىعا تۇسكەن لاتىن گرافيكاسىنىڭ ەكى نۇسقاسىنىڭ ىشىندە ەلباسىنىڭ كوڭىلىنەن شىققانى اپوستروف ارقىلى تۇزىلگەن ەكىنشى نۇسقا بولىپ شىقتى.

سونىمەن جارلىقتا نە جازىلدى؟ كوز جۇگىرتەيىك.

قازاق ءتىلى ءالىپبيىنىڭ كيريلليتسادان لاتىن گرافيكاسىنا كوشىرىلۋىن قامتاماسىز ەتۋ ماقساتىندا قاۋلى ەتەمىن:

1. قوسا بەرىلىپ وتىرعان لاتىن گرافيكاسىنا نەگىزدەلگەن قازاق ءتىلى ءالىپبيى بەكىتىلسىن.

2. قازاقستان رەسپۋبليكاسىنىڭ ۇكىمەتى:

قازاق ءتىلى ءالىپبيىن لاتىن گرافيكاسىنا كوشىرۋ جونىندەگى ۇلتتىق كوميسسيا قۇرسىن;

-قازاق ءتىلى ءالىپبيىنىڭ 2025 جىلعا دەيىن لاتىن گرافيكاسىنا كەزەڭ-كەزەڭىمەن كوشۋىن قامتاماسىز ەتسىن;

-وسى جارلىقتى ىسكە اسىرۋ جونىندە وزگە دە، سونىڭ ىشىندە ۇيىمداستىرۋشىلىق جانە زاڭنامالىق سيپاتتاعى، شارالار قابىلداسىن.

3. وسى جارلىقتىڭ ورىندالۋىن باقىلاۋ قازاقستان رەسپۋبليكاسى پرەزيدەنتىنىڭ اكىمشىلىگىنە جۇكتەلسىن.

4. وسى جارلىق قول قويىلعان كۇنىنەن باستاپ قولدانىسقا ەنگىزىلەدى.

قازاقستان رەسپۋبليكاسىنىڭ

پرەزيدەنتءى                                                                   ن.نازارباەۆ

استانا، اقوردا، 2017 جىلعى 26 قازان.

لاتىن ءالىپبيىنىڭ قازاق تىلىنە ىڭعايلاستىرىلعان نۇسقاسىن ازىرلەۋ مىندەتى جۇكتەلگەن ماماندار ۇسىنىپ، پرەزيدەنت ماقۇل كورگەن ءام قابىلداپ، بەكىتكەن نۇسقا مىناۋ:

جاڭا الىپبيدە بارلىعى 32 قارىپ بولسا، ونىڭ 9-ى اپوستروف ارقىلى جازىلادى.

ايتا كەتەيىك، كۇنى كەشە عانا پرەزيدەنت نازارباەۆ پرەزيدەنت اكىمشىلىگىنىڭ باسشىسى ادىلبەك جاقسىبەكوۆ پەن  پرەزيدەنت اكىمشىلىگىنىڭ باسشىسىنىڭ ءبىرىنشى ورىنباسارى مارات ءتاجيندى قابىلداپ، لاتىن قارپىنە نەگىزدەلگەن قازاق ءالىپبيىنىڭ جوباسىن بەكىتۋ تۋرالى جارلىق ازىرلەۋ كەرەكتىگىن ايتقان ەدى.

Abai.kz