بۇگىن، قازاقستان رەسپۋبليكاسى پرەزيدەنتى ءوز جارلىعىمەن «ەلىمىزدە لاتىن گرافيكاسىنا ءوتۋ» جونىندە شەشىم شىعاردى.

بۇل قادام، قازاق ەلىنىڭ تاۋەلسىزدىك العاننان كەيىنگى ەڭ ماڭىزدى، ءبىزدىڭ ۇلتتىق كودقا تىكەلەي تاعدىرلى اسەرى بار شەشىم. وسى شەشىم، قازاق ۇلتىنىڭ، ءبىزدىڭ حالىقتىڭ رۋحاني-گۋمانيتارلىق بەتالىسىن، باعىتىن انىقتايتىن بىردەن-ءبىر جول.

بۇگىنگى زامانىمىزدىڭ باستى تەندەنتسياسى – يننوۆاتسيالاردى ەسەلەنە پايدالانۋ مەن نوۋ-حاۋ، ءداستۇرلى ەمەس ەنەرگيانى پايدالانۋ، قوعامدىق دامۋ مەن الەۋمەتتىك مودەرنيزاتسيالاۋدىڭ باستى وزەگى بولىپ تابىلادى. ءبىزدىڭ بالالارىمىزدىڭ وسىنداي جىلدام دا، وزگەرمەلى ۋاقىتتا ءومىر سۇرۋگە قابىلەتتى بولۋى جەتكىلىكسىز، ولار وسى وقيعالار مەن ۇدەرىستەردىڭ قايناعان ورتاسى مەن توپ باسىندا بولۋى شارت.

سوندىقتان دا، لاتىن ءارپىن ەنگىزۋ ۇلتىمىز ءۇشىن ماڭىزدى، وتە قاجەتتى، ۋاقىت تالابىنا ساي كەلەتىن جاڭا اتريبۋت. ماسەلەگە وسى تۇرعىدان قاراساق،  لاتىن گرافيكاسىن ەنگىزۋ ماسەلەسىنە ۇلت بولىپ، قوعام بولىپ ات سالىساتىن ۋاقىت جەتتى! ءدال قازىر ءار-ءبىر ازامات ءوز ازاماتتىعىن كورسەتۋى قاجەت.

گرافيكا دەگەنىمىز – قاتىپ قالعان دوگما ەمەس، «كوش جۇرە تۇزەلەدى»، ۋاقىت پەن زامان ۇردىسىنە قاراي ءالىپبي دە وزگەرەتىن بولادى. قازىرگى ماسەلە، وسى ساياسي، گۋمانيتارلىق قادامدى قولداۋ.

قازىر بىزگە تۇتاس ۇلتتى جۇمىلدىرا الاتىن، زامانۋي اعىمعا سايكەس، جاڭا باعىتتاعى رۋحاني اعىم قاجەت. لاتىن قارپىن ەنگىزۋدىڭ ەڭ باستى مايەگى مەن وزەگى، ونىڭ باستى دراماتۋرگياسى وسىندا جاتىر.

جاھاندانۋ پروتسەسسى ءوزىنىڭ جاعىمدى جاقتارىمەن قاتار، ۇلتتىق مادەنيەتتى كورروزياعا ۇشىراتا وتىرىپ، رۋحاني الەمىمىزگە وشپەس سىزات تۇسىرەتىندىگىن كورسەتىپ وتىر. وسىناۋ رۋحاني الاپاتى كوپ زاماندا ءومىر ءسۇرىپ قانا قويماي، قارىشتاپ دامۋ ءۇشىن ءاردايىم دامۋ ۇستىندە بولۋ شارت.

ءبىز الەمدىك مادەنيەت كەڭىستىگىندە رۋحاني-مادەني «گەتتوعا» اينالماۋىمىز كەرەك! لاتىن ءارپىن ەنگىزۋدىڭ ءمان-جايى وسىنداي كۇرەستەن تۋادى.

لاتىن ءارپى – ءبىزدىڭ ءداستۇرلى مادەنيەتىمىزدى دامىتۋدىڭ، الەمدىك عىلىمي اينالىمعا ەنۋ جولىنداعى «رۋحاني ءليفتى»، ىرگەتاسى بولماق. ءبىز ازاماتتارىمىزدىڭ بولاشاعىن قولدايتىندىقتان، لاتىن قارپىن قولدايمىز! بولاشاعىڭا ات سالىس!

ەرلان سايروۆ

Abai.kz