بۇگىندە الەمدى الاڭداتقان ەكسترەميزم مەن تەرروريزم ماسەلەسى ءبىزدىڭ ەلىمىز ءۇشىن دە شەتىن تاقىرىپ ەمەستىگى بەلگىلى. جۇزدەگەن ۇلتتار مەن ەتنوستىڭ، بىرنەشە ءداستۇرلى كونفەسسيالاردىڭ باسىن قوسقان ەلىمىزدىڭ ەرەكشەلىگىن تەرىس ماقساتتا پايدالانعىسى كەلەتىن توپتاردىڭ توبە كوتەرمەي قالماسى دا ايقىن.

تاۋەلسىزدىگىمىزدىڭ جيىرما التى جىلى ىشىندە قازاقستان حالقى اۋەلى اللا تاعالانىڭ مەيىرىم-شاپاعاتىمەن، اۋىزبىرشىلىگىنەن اينىماي، بىرلىگىنە بەكەم ەل ەكەندىگىن تانىتا ءبىلدى. بۇل جولدا ەلباسىمىز نۇرسۇلتان نازارباەۆتىڭ زاماننىڭ تىنىسىن الدىن الا بايقاپ، بولاشاقتى باعدارلاي بىلگەن كورەگەندىگىنىڭ ارقاسىندا ەلىمىزدەگى ءارتۇرلى ءدىن وكىلدەرى مەن ۇلتتار ورتاق ماقساتقا ۇمتىلىپ، بولاشاقتىڭ ىرگەتاسىن بىرگە قالاپ كەلەدى.

وسىناۋ بىرلىككە ۇيىعان جۇزدەگەن ۇلتتاردىڭ ىنتىماقتى مەكەنىنە اينالعان ەلدىڭ تىنىشتىعىن بۇزعىسى كەلەتىن توپتار ءدىندى جەلەۋ ەتىپ، ءدۇيىم جۇرتتى دۇرلىكتىرگەنى كوڭىل قىنجىلتادى. الدى-ارتىن ويلاماعان كەيبىر ازاماتتاردىڭ يسلامنىڭ اتىن جامىلعان ءدىنبۇزار اعىمداردىڭ ارباۋىنا ەرىپ، يسلام قۇندىلىقتارىن اياقاستى ەتىپ، حالىقتى ابىگەرگە سالعانى، راسىندا، وكىنىشتى جايت.

ءدىن ۇعىمى – ادامزاتتى باقىتقا باستاۋشى، جاقسىلىققا جەتەلەۋشى، ساناعا سالماقتى وي سالىپ، كەمەلدىككە جەتكىزۋشى ينستيتۋت. جالپى ادامي قۇندىلىقتاردى باسشىلىققا الاتىن اسىل ءدىنىمىز يسلام دا جازىقسىز ادامنىڭ ومىرىنە، ار-نامىسىنا، جەكە مۇلكىنە قول سۇعۋعا، باسقىنشىلىق جاساۋعا قاتاڭ تىيىم سالادى.

بەيبىتشىلىك پەن مەيىرىمدىلىكتى ماقسات ەتەتىن، حاكىم ابايشا ايتقاندا، ادامزاتتىڭ بارلىعىن باۋىرىم دەپ سۇيۋگە شاقىراتىن يسلام ءدىنى قوعامنىڭ تۇتاستىعىنا، ەلدىڭ بىرلىگىنە سىزات ءتۇسىرۋشى كەز كەلگەن ادامي قۇندىلىققا ساي كەلمەيتىن قۇبىلىستارعا تۇبەگەيلى قارسى. يسلامنىڭ اتىن جەلەۋ ەتىپ، وي-ساناسى قالىپتاسىپ، كوزقاراسى تۇراقتاپ ۇلگەرمەگەن ازاماتتاردى جولدان تايدىرىپ، ەلىمىزدىڭ ىشكى تۇراقتىلىعىنا قاۋىپ ءتوندىرۋ – كەلەشەگىمىزگە قول سالعىسى، تۇنىعىمىزدى لاستاعىسى كەلەتىن قارا ويلى قىلمىسكەرلەردىڭ عانا قولىنان كەلسە كەرەك.

قاسيەتى قۇران كارىمدە اللا تاعالا: «جازىقسىز ادامدى ولتىرگەن ادام – بارلىق ادام بالاسىن ولتىرگەنمەن تەڭ (كۇناھار) بولادى» («ءمايدا» سۇرەسىنىڭ 32-اياتى) دەپ، ادام ءومىرىنىڭ ارتىقشىلىعىن كورسەتەدى.

اتا زاڭىمىزدا مەملەكەتىمىز دەموكراتيالى، زايىرلى، قۇقىقتىق جانە الەۋمەتتىك مەملەكەت دەپ جاريالاندى. ال، مەملەكەتتىڭ باستى قۇندىلىعى ادام، ونىڭ ءومىرى جانە بوستاندىقتارى بولىپ تانىلادى. ءسىز بەن ءبىزدىڭ ءومىرىمىز ەڭ باستى ءارى قىمبات قازىناسى رەتىندە بەلگىلەنگەن وتانىمىزدا ەركىندىك، تەڭدىك پەن تاتۋلىقتى تۋ ەتكەن، ورتاق تاريحى بىرىكتىرگەن قازاقستان حالقىنىڭ بەيبىت ءومىرى مەن تىنىشتىعىنا جەتەر بايلىق جوق. دانا حالقىمىزدا «باقىت قۇسىنىڭ قادىرىن قونعاندا ەمەس، ۇشقاندا بىلەسىڭ» دەگەن ءتامسىل بار. بار باقىتىمىزدىڭ پارقىنا جەتىپ، بۇگىنگى جەتكەن بيىگىمىزگە، تاتۋ-ءتاتتى تۇرمىس-تىرشىلىگىمىزگە قاناعات ەتۋ – وسىنى سان عاسىر ارمان ەتكەن قايمانا قازاقتىڭ بۇگىنگى ايتار شۇكىرى ەمەس پە؟! تاعى دا قۇرانعا نازار سالساق، «شۇكىر ەتسەڭدەر، ارتتىرىپ بەرەمىن» دەپ، اللا تاعالا ءيىسى مۇسىلمانعا ۋادە ەتەدى.

اللاعا شۇكىر، ءبىز – باقىتتى زاماننىڭ كۋاگەرلەرىمىز. ەلىمىزدە ءدىن، سەنىم ەركىندىگىنە كەپىلدىك بەرىلگەن. ءدىن اتىن جامىلىپ، حالىق اراسىندا بۇلىك شىعارۋ، قارۋ اسىنىپ ادام ءولتىرۋ – كەشىرىلمەيتىن ۇلكەن كۇنا بولىپ سانالادى. كۇنى كەشە اقتوبەدە بولعان قاندى وقيعا ادام تۇگىلى، جان-جانۋار مەن جاندىكتەردىڭ تىرشىلىگىنە ەرەكشە ءمان بەرگەن ءداستۇرلى يسلام قۇندىلىقتارىمەن ەش قيىسپايدى جانە دە ءدىندار رەتىندە ءبىز بۇل قۇبىلىستى قاتاڭ ايىپتايمىز.

ءاربىر ادامنىڭ جانى، ءومىرى – وزىنە امانات بولسا، بۇگىنگى ادامزات قوعامىن تۇتاس قالىپتا، دۇرىس باعىتتا ۇستاپ تۇرۋ دا – بارشاعا امانات ەكەندىگىن ۇمىتپايىق. ولاي بولسا، قازاق ەلىنىڭ ىشكى تۇتاستىعى مەن قاۋىپسىزدىگىن، تىنىشتىعىن ساقتاۋدا ەرىنبەي ەڭبەك ەتىپ، كوزىمىزدىڭ قاراشىعىنداي قورعاۋىمىز – ازاماتتىق ءھام مۇسىلماندىق پارىزىمىز.

رۋحاني كەلىسىم، ۇلتتار مەن ءداستۇرلى دىندەر اراسىنداعى بىرلىك – باعا جەتپەس بايلىعىمىز، ال تۇراقتىلىق – تۇعىرىمىز. ءبىز بۇگىنگى بەرەكەلى كۇنگە بىرلىكتىڭ، تاتۋلىقتىڭ ارقاسىندا جەتتىك. ەلدىڭ الەۋمەتتىك-ەكوميكالىق كورسەتكىشى حالىقتاردىڭ ءوزارا تاتۋلىعى نەگىزىندە دامي تۇسەتىنى بەلگىلى. ەل باسقارعان پاراساتتى باسشىلار قاشان دا بىرلىك پەن تاتۋلىققا اسا ءمان بەرگەن. 18 قازان – رۋحاني كەلىسىم كۇنى رەتىندە ەنۋى – قازاق توپىراعىنا بەيبىتشىلىك ورناتىپ، تۇراقتى قوعام قۇرۋ يدەياسىنان تۋعان ۇلكەن باستاما. اللاعا شۇكىر، ءبىز اۋەلدەن مۇسىلمانبىز. قازاق توپىراعىنا جەتكەن اسىل ءدىنىمىز سول داۋىردەن بەرى حالقىمىزدىڭ جۇرەر جولى، مەملەكەتىمىزدىڭ رۋحاني تىرەگى بولىپ كەلەدى. اللا تاعالا حالقىمىزدىڭ بىرلىگى مەن بەرەكەسىن ارتتىرىپ، تاۋەلسىزدىگىمىزدى باياندى ەتكەي! تىلەگىمىز قابىل، مۇراتىمىز اسىل بولعاي!

ناۋرىزباي قاجى تاعانۇلى،  قمدب-نىڭ نايب ءمۇفتيى

Abai.kz