وسىدان ءبىراز بۇرىن «سپورت جۇلدىزدارى» دەگەن جەكەمەنشىك جۋرنالدىڭ باس رەداكتورى مۇساعالي تاسقاليەۆ ەسىمدى ازامات ءوزىنىڭ فەيسبۋك پاراقشاسىندا قازاق كۇرەسى تۋرالى جازىپ، مەنىڭ دە اتىمدى اتاپ، «قازاق كۇرەسىن سەرگەلدەڭگە سالعان كىمدەر؟» دەگەن ساۋال قويعان ەكەن. ويلانا كەلە، مۇنداي نەگىزسىز جازىلعان دۇنيەلەردىڭ قازاق كۇرەسىنىڭ بولاشاعى ءۇشىن اتقارىپ جاتقان شارۋالارىمىزعا قاتىستى كوپشىلىكتىڭ ويىندا كۇمان تۋدىراتىنىن ءارى جەلدىڭ قاي باعىتتان سوعاتىنىن ەسكەرە وتىرىپ، وسىعان دەيىن قازاق كۇرەسى تۋرالى ەل ىشىندە كەرەعار پىكىر قالىپتاسپاسىن دەپ ايتپاي كەلگەن كەيبىر دۇنيەلەردى ەل گازەتى «ەگەمەن قازاقستاننىڭ» بەتىندە اشىق تۇردە جاريالاۋدى ءجون كوردىم. سوندا عانا سپورتسۇيەر قاۋىم قازاق كۇرەسىن سەرگەلدەڭگە سالىپ جۇرگەندەردىڭ كىم ەكەنىن ءوزى-اق اجىراتىپ الار دەپ ءتۇيدىم.

مەن رەسپۋبليكالىق قازاق كۇرەسىنىڭ باسشىلىعىنا 2013 جىلدىڭ سوڭىنا قاراي سايلاندىم. وعان دەيىن رەسپۋبليكالىق فەدەراتسيانىڭ پرەزيدەنتى سەرىك توكەەۆ مىرزا بولاتىن. سول جىلى قازاق كۇرەسىندە مەنىڭ فەدەراتسيانىڭ باسشىلىعىنا كەلۋىمە بىرنەشە كەلەڭسىز وقيعا سەبەپ بولدى. ونىڭ ەڭ ءبىرىنشىسى، ارينە  2013 جىلعى «قازاقستان بارىسى» رەسپۋبليكالىق ءتۋرنيرىنىڭ فينالدىق سىنىندا تورەشىلەردىڭ ەلدى دۇرلىكتىرگەن جۇگەنسىزدىگى ەدى. ەكىنشىسى – «قازاق كۇرەسى قازان قالاسىندا وتەتىن ءحىىى ۋنيۆەرسيادانىڭ باعدارلاماسىنا كىردى»، دەپ «دۇنيەجۇزىلىك «قازاق كۇرەسى» فەدەراتسياسى» دەپ اتالىناتىن ۇيىمنىڭ التى الاشقا جار سالعانىنا قاراماستان، ءتول سپورتىمىزدىڭ اتالعان ويىندار  باعدارلاماسىنا كىرمەي قالۋى. ءۇشىنشىسى – سول جىلى سانكت-پەتەربۋرگ قالاسىندا وتكەن سپورت-اككوردتىڭ اياسىندا قازاق كۇرەسىنەن كورسەتىلىم بولادى دەپ قازاقستاننىڭ اتىنا FILA دەپ اتالىنعان (قازىرگى – UWW, ياعني بىرىككەن كۇرەس الەمى) ۇيىمنان حات كەلىپ، سوعان وراي قازاقستاندىق دەلەگاتسيا سول كەزدەگى قازاقستان رەسپۋبليكاسى سپورت جانە دەنە شىنىقتىرۋ ىستەرى اگەنتتىگى توراعاسىنىڭ ورىنباسارى تاستانبەك ەسەنتاەۆتىڭ باسشىلىعىمەن سانكت-پەتەربۋرگكە بارعانىندا كورسەتىلىم بولاتىن زالدا ءبىزدىڭ سپورتشىلار مەن وكىلدەردەن باسقا ەشكىمنىڭ بولماي شىعۋى، ارتىنان بەلگىلى بولعانىنداي مۇنىڭ ۋنيۆەرسياداعا قازاق كۇرەسىنىڭ كىرمەي قالعانىنا ىرزا بولماعان قازاقستاندىقتاردىڭ  كوڭىلىن اۋلاپ، كوزبوياۋشىلىق ءۇشىن عانا ۇيىمداستىرىلعان شارا بولعاندىعى ەدى.

ايتا كەتەتىن جايت، قازاق كۇرەسىنىڭ ۋنيۆەرسيادا باعدارلاماسىنا كىرەتىنىن العاش سۇيىنشىلەگەن دە، سپورت-اككوردتىڭ اياسىندا قازاق كۇرەسىنەن كورسەتىلىم بولادى دەپ حات جولداعان دا سول كەزدەگى FILA-نىڭ، قازىرگى بىرىككەن كۇرەس الەمىنىڭ رەسمي وكىلى گينتاۋتاس ۆيلەيتا بولاتىن. ال ونى ودان ءارى جەلپىلدەتكەن «دۇنيەجۇزىلىك «قازاق كۇرەسى» فەدەراتسياسى» دەپ اتالىناتىن ۇيىمنىڭ باسشىلىعى ەدى. بىراق، وسى اتالعان ۇيىمداردىڭ ەشقايسىسى دا قازاق كۇرەسىنىڭ نەلىكتەن ۋنيۆەرسيادانىڭ باعدارلاماسىنا كىرمەگەندىگى، سپورت-اككوردتا كورسەتىلىمى بولماعاندىعى تۋرالى كۇنى بۇگىنگە دەيىن جاق اشقان ەمەس.

سونىمەن قاتار، ءبىز سول كەزدە «ەۋرازيا بارىسى» حالىقارالىق تۋرنيرىنە دايىندىق جۇرگىزۋ كەزىندە، جارىسقا شەت ەلدىك كوماندالاردى شاقىرۋ بارىسىندا تاعى ءبىر قيىنشىلىققا تاپ بولدىق. ول – «دۇنيەجۇزىلىك «قازاق كۇرەسى» فەدەراتسياسى» دەپ اتالىناتىن ۇيىمنىڭ باسشىلىعى الەمنىڭ الپىستان استام ەلىندە قازاق كۇرەسى فەدەراتسيالارى قۇرىلعان دەپ ۇنەمى باق-قا سۇحبات بەرىپ كەلگەنىنە قاراماستان، ەلىمىزدى قوسا ەسەپتەگەندە الەمدەگى ۇلتتىق فەدەراتسيالاردىڭ ءبىر قولدىڭ ساۋساعانىنان اسپايتىندىعى، ياعني، قازاقستان، موڭعوليا، قىتاي، رەسەي مەن قىرعىزستاننان باسقا بىردە-ءبىر ەلدە قازاق كۇرەسىنىڭ فەدەراتسيالارىنىڭ بولماۋى ەدى.

كوپشىلىك قاۋىم مەن ايتقان جايتتاردىڭ راستىعىنا ينتەرنەتتى اقتارىپ تا، ورتامىزدا جۇرگەن، وسى وقيعالارعا كۋا بولعان ادامداردان سۇراپ تا كوز جەتكىزە الادى.

وسىنىڭ بارلىعى، سول كەزدەگى قازاق كۇرەسىندە قوردالانعان پروبلەمالاردىڭ بار ەكەندىگىن كورسەتتى. سول سەبەپتى دە سۋ باسىنان تۇناتىندىعىن، ال قازاق كۇرەسىنىڭ باستاۋى قازاق جەرىندە ەكەندىگىن، ەڭ الدىمەن ءوز ەلىمىزدەگى قازاق كۇرەسىن دامىتۋ كەرەكتىگىن ەسكەرە وتىرىپ، ءوز كانديداتۋرامدى رەسپۋبليكالىق فەدەراتسيانىڭ پرەزيدەنتتىگىنە ۇسىندىم.

باسشى بولىپ سايلانعان سوڭ ءوز جۇمىسىمدى رەسپۋبليكالىق فەدەراتسيانى قايتا قۇرۋدان باستادىم. سەبەبى، «رەسپۋبليكالىق ۇلتتىق كۇرەس «قازاق كۇرەسى»  فەدەراتسياسى» رەسپۋبليكالىق قوعامدىق بىرلەستىگى» دەپ اتالىناتىن فەدەراتسيانىڭ رەسپۋبليكالىق مارتەبەسى بولۋ ءۇشىن «قوعامدىق بىرلەستىكتەر تۋرالى» قر زاڭىنا سايكەس كەمىندە سەگىز وبلىستا فيليالدارى بولۋى كەرەك-ءتىن. فيليالدار اشىلماعان، ال وبلىستىق قازاق كۇرەسى فەدەراتسيالارى جەرگىلىكتى قوعامدىق بىرلەستىكتەر رەتىندە قۇرىلىپ، رەسپۋبليكالىق فەدەراتسياعا زاڭدىق تا، ەكونوميكالىق تا تۇرعىدان ەشقانداي قاتىسى جوق وزىندىك زاڭدى تۇلعا (ساموستوياتەلنوە يۋريديچەسكوە ليتسو) رەتىندە جۇمىستارىن اتقارىپ جاتقان ەكەن. سوندىقتان دا، وبلىستىق قازاق كۇرەسى فەدەراتسيالارىن رەسپۋبليكالىق فەدەراتسيانىڭ قۇرىلتايشىلارى، ءارى رەسپۋبليكالىق فەدەراتسيانىڭ جارعىسىن مويىندايتىن، بىراق ەكونوميكالىق تۇرعىدان دەربەس قىزمەت ەتەتىن مۇشەلەرى ەتىپ بەكىتىپ،  «قازاقستان رەسپۋبليكاسى قازاق كۇرەسى فەدەراتسياسى» قاۋىمداستىق نىسانىنداعى زاڭدى تۇلعالار بىرلەستىگى ەتىپ قايتا قۇردىق. تەك وسىدان كەيىن عانا رەسپۋبليكالىق قازاق كۇرەسى فەدەراتسياسى قر ۇلتتىق وليمپيادا كوميتەتى تاراپىنان تانىلدى. بۇعان دەيىن ءبىزدىڭ فەدەراتسيا تاۋەلسىزدىك العاننان بەرگى 23 (!) جىل بويىنا قر ۇوك تاراپىنان تانىلماعان بولاتىن.

ءوز كەزەگىندە، رەسپۋبليكالىق فەدەراتسيا 2014 جىلى قابىلدانعان «سپورت جانە دەنە شىنىقتىرۋ تۋرالى» قر زاڭىنا سايكەس سپورت ءتۇرى ء(بىزدىڭ جاعدايىمىزدا قازاق كۇرەسى ەكەندىگى بەلگىلى) بويىنشا حالىقارالىق فەدەراتسيانىڭ مۇشەسى بولۋى ءتيىستى-ءتىن. وسىعان وراي ءبىز «دۇنيەجۇزىلىك «قازاق كۇرەسى» فەدەراتسياسى» دەپ اتالىناتىن ۇيىمنىڭ جارعىسىمەن تانىسۋ بارىسىندا اتالعان ۇيىمنىڭ مورىندە «حالىقارالىق قوعامدىق بىرلەستىك» دەپ كورسەتىلگەنىنە قاراماستان، ونىڭ «قوعامدىق بىرلەستىكتەر تۋرالى» قر زاڭىنا سايكەس قۇرىلعان، قۇرىلتايشىلارى – توكەەۆ مىرزا باستاعان قازاقستاندىق ازاماتتار، سول كىسىنىڭ قول استىندا حاتشى، جۇرگىزۋشى، ادىسكەر بولىپ جۇمىس ىستەيتىن، ىستەگەن، ءتىپتى كەيبىرىنىڭ قازاق كۇرەسىنىڭ سالاسىنا ءۇش قايناسا سورپاسى قوسىلمايتىن ون ادام ەكەندىگىن،  ال فەدەراتسيانىڭ بار-جوعى استانا قالاسىنىڭ ادىلەت دەپارتامەنتىندە تىركەلگەن جەرگىلىكتى قوعامدىق بىرلەستىك ەكەنىن انىقتادىق.

وسى تۇرعىدان كەلگەندە «دۇنيەجۇزىلىك «قازاق كۇرەسى» فەدەراتسياسى» جەرگىلىكتى قوعامدىق بىرلەستىگى قالايشا ءوزىنىڭ مورىنە، جارعىسىنىڭ تيتۋلدىق بەتىنە «حالىقارالىق قوعامدىق بىرلەستىك» دەگەن اتاۋدى جازا الادى، وعان رۇقسات بەرگەن فەدەراتسيا تىركەۋدەن وتكەن استانا قالاسىنىڭ ادىلەت دەپارتامەنتى مە،  وعان سول فەدەراتسيا تىركەۋدەن وتكەن كەزدە استانا قالاسىنىڭ ادىلەت دەپارتامەنتىندە باسشىلىق قىزمەتتە بولعان سەرىك توكەەۆتىڭ تۋعان ءىنىسىنىڭ ىقپالى بولۋى مۇمكىن بە؟ ەگەر مۇنداي جاعداي ورىن العان بولسا، ەلىمىزدىڭ كەز-كەلگەن مەملەكەتتىك ورگانىنا نەمەسە لاۋازىمدىق تۇلعاسىنا قازاقستان زاڭدارىن بەلدەن باسىپ، ءوز بەتىنشە ارەكەت ەتە بەرۋىنە بولادى ما دەگەن ساۋالدار تۋىندايتىنى راس. دەگەنمەن، بۇل باسقا تاراپتان كەلەتىن اڭگىمە بولعاندىقتان بۇعان توقتالماي-اق قويالىق.

سونىمەن، وسىعان دەيىن «دۇنيەجۇزىلىك «قازاق كۇرەسى» فەدەراتسياسى» دەپ اتالاتىن ۇيىمنىڭ اتاۋىنداعى قازاق كۇرەسى اتاۋىنىڭ تىرناقشاعا الىنىپ جۇرگەنىنە تاڭعالىپ كەلگەن رەسپۋبليكالىق فەدەراتسيانىڭ باسشىلىعى «دۇنيەجۇزىلىك» فەدەراتسيانىڭ اتىنا زاتى ساي ەمەستىگىن، وعان تەك جەكە تۇلعالاردىڭ عانا مۇشە بولىپ كىرە الاتىندىعىن، بىرلەستىك زاڭعا سايكەس قازاقستاننىڭ تەك ءبىر وبلىسىنىڭ نەمەسە قالاسىنىڭ عانا اۋماعىندا ارەكەت ەتە الاتىندىعىن،  سوندىقتان دا فەدەراتسيانى قاۋىمداستىق نىسانىندا قايتا قۇرۋ، ونى قر ادىلەت مينيسترلىگىندە  تىركەۋ، وعان رەسپۋبليكالىق قازاق كۇرەسى فەدەراتسياسىنىڭ مۇشە بولىپ كىرۋى قاجەتتىگىن «دۇنيەجۇزىلىك» فەدەراتسيانىڭ باسشىلىعىنا بىرنەشە رەت ەسكەرتىپ ايتىلعان بولاتىن.

وكىنىشكە قاراي، «دۇنيەجۇزىلىك» فەدەراتسيانىڭ باسشىلىعى رەسپۋبليكالىق فەدەراتسيا باسشىلىعىنىڭ ايتقان ءسوزىن قۇلاققا ىلمەك تۇرماق 2015 جىلى «ازيا كونتينەنتالدىق قازاق كۇرەسى فەدەراتسياسى» قوعامدىق بىرلەستىگىن قۇرىپ، ونى استانا قالاسىنىڭ ادىلەت  دەپارتامەنتىندە تىركەۋدەن وتكىزدى. بايقاپ وتىرعاندارىڭىزداي، بۇل قازاقستاندا قۇرىلعان ءۇشىنشى «حالىقارالىق» فەدەراتسيا. بىراق، ءبارىنىڭ مۇشەلىگى جەكە دارا، ياعني جەكە تۇلعالار. ال، قر قازاق كۇرەسى فەدەراتسياسىنىڭ زاڭدى تۇلعا ەكەندىگىن، الەمدىك سپورتتىڭ زاڭدىلىعى بويىنشا حالىقارالىق فەدەراتسياعا تەك ۇلتتىق فەدەراتسيالار عانا مۇشە بولىپ كىرە الاتىنىن ەشكىم دە ەسكەرمەدى. سوندا ايتىڭىزدارشى: قازاقستاننىڭ قازاق كۇرەسى فەدەراتسياسى مۇشە بولىپ كىرە المايتىن ول قانداي «دۇنيەجۇزىلىك» قازاق كۇرەسى فەدەراتسياسى؟

ال، ەندى وسى «دۇنيەجۇزىلىك» فەدەراتسيا ۇيىمداستىرىپ كەلگەن الەم جانە ازيا چەمپيوناتتارىنا كەلەتىن بولساق، بۇل دا اتان تۇيەگە جۇك بولاتىن تاقىرىپ. دەگەنمەن، ءبىز وسى اتالعان چەمپيوناتتاردىڭ بارلىعىنا دەرلىك قازاقستاننىڭ رەسمي قۇراما كومانداسىمەن قاتار بەيرەسمي قۇراما كوماندانىڭ دا قاتار قاتىسىپ كەلگەندىگىن ايتساق جەتكىلىكتى شىعار. تورەشى، جاتتىقتىرۋشى، ءتىپتى، كورەرمەن بولىپ كەلىپ، جارىسقا قاتىسىپ، جۇلدەگەر نەمەسە چەمپيون اتانىپ كەتەتىن، بولماسا، ءبىر ەلدىڭ سپورتشىسى (قازاقستاندىق) باسقا ءبىر مەملەكەتتىڭ (مىسالى، تاجىكىستاننىڭ) اتىنان سىنعا ءتۇسىپ، فينالعا شىققاندا قايتادان ءوز ەلىنىڭ (قازاقستاننىڭ) سپورتشىسى بولىپ شىعا كەلەتىن سپورت تۇرىنەن الەم نەمەسە ازيا چەمپيوناتىن بىلەسىز بە؟ بىلمەسەڭىز، بۇل قازاق كۇرەسىنەن الەم جانە ازيا چەمپيوناتى بولاتىن. ال، افريكا، ەۋروپا، امەريكا چەمپيوناتتارى تۋرالى ايتىپ قاجەتى جوق. «دۇنيەجۇزىلىك» فەدەراتسيانىڭ اتقارعان تىرلىگى مىنە وسىنداي. ەگەر سوزىمدە قاتەلىك بولسا، «دۇنيەجۇزىلىك» فەدەراتسيا وزدەرى ەلىمىزدەن تىس جەرلەردە ۇيىمداستىرعان الەم، ازيا، افريكا چەمپيوناتتارىن ەلىمىزدىڭ قاي تەلەارناسىنان كورسەتتى، كورسەتپەسە بەينەنۇسقاسىن حالىققا ۇسىنا الا ما ەكەن؟ سوندا قالىڭ كوپشىلىك قالعانىن مەن ايتپاي-اق اتالعان چەمپيوناتتارعا ءوز باعاسىن بەرەر ەدى.

ال، ەندى بۇل چەمپيوناتتاردىڭ، ولاردىڭ ناتيجەسى، بەرىلگەن اتاقتار مەن قوسىلعان ۇستەمەلەردىڭ زاڭدى، زاڭسىزدىعىنا باعا بەرەتىن مەن ەمەس. سوندىقتان بۇل تاقىرىپتى قوزعاماي-اق قويايىق.

مەن تەك رەسپۋبليكالىق فەدەراتسياعا باسشى بولىپ كەلگەن كەزدەن-اق قازاق كۇرەسىنە ابىرويسىزدىقتان باسقا ەشنارسە بەرمەيتىن بۇل ۇدەرىسكە توقتام سالۋعا  تىرىستىم. بىراق، «باياعى جارتاس ءبىر جارتاس». ءالى كۇنگە وزگەرگەن ەشنارسە جوق.

ول ول ما، بىلتىردان بەرى «دۇنيەجۇزىلىك» فەدەراتسيا قازاق كۇرەسىنىڭ اشعابادتا وتكەن جابىق كەشەندەگى V ازيا ويىندارىنىڭ باعدارلاماسىنا كىرەتىنىن ايتىپ جالپاق الەمگە جار سالدى. شىنىن ايتايىق، بۇعان باسىندا ءبارىمىز دە قۋاندىق. دەگەنمەن، ءاۋ باستاعى اپتىعىمىزدى باسىپ، باجايلاپ سۇراستىرىپ بىلسەك، قازاق كۇرەسىنىڭ جابىق كەشەندەگى V ازيا ويىندارىنا كىرەتىنى راس ەكەن. بىراق… اڭگىمە سول «بىراق»-تا بولىپ تۇر. «باقسام باقا ەكەن» دەمەكشى، قازاق كۇرەسى بۇل ازيا ويىندارىنا جەكە سپورت ءتۇرى بولىپ ەنبەگەن ەكەن، تەك بەلبەۋ كۇرەسىنىڭ قۇرامىندا كىرىپتى. بۇعان قازاق كۇرەسىنىڭ جاناشىر جانكۇيەرى اشعابادتا وتكەن جابىق كەشەندەگى V ازيا ويىندارىنىڭ   www.ashabat2017.com رەسمي سايتىنا، نەمەسە ازيا ويىندارىنىڭ يەگەرى ازيا وليمپيالىق كەڭەسىنىڭ www.ocasia.com رەسمي سايتىنا كىرىپ كوز جەتكىزە الادى. بۇل سايتتاردىڭ ەشقايسىسىندا قازاق كۇرەسى ازيا ويىندارىنىڭ باعدارلاماسىنا كىردى دەگەن ءسوز جوق. بۇل ويىننىڭ باعدارلاماسىندا وزبەكتىڭ كۋراشى، تۇركىمەننىڭ كوروشى، تاتاردىڭ بەلبەۋ كۇرەسى، ورىستىڭ سامبوسى، جاپوننىڭ دجيۋ-دجيتسۋى بار. بىراق، قازاقتىڭ كۇرەسى جوق. سەبەبى، «دۇنيەجۇزىلىك» فەدەراتسيانىڭ باسشىلىعى قازاق كۇرەسىن بەلبەۋ كۇرەسىنىڭ قانجىعاسىنا بوكتەرىپ بەردى. بۇل بۇرىنعى FILA, قازىرگى UWW-بىرىككەن كۇرەس الەمىنىڭ ءداستۇرلى كۇرەس تۇرلەرى كوميتەتىنىڭ باسشىلىعىنا كىرەتىن، ءوزى  الدىمەن ءتۇبى قىرعىزدىڭ كۇرەسى دەلىنەتىن الىش-بەلبەۋ كۇرەسى فەدەراتسياسىن باسقارعان، كەيىننەن حالىقارالىق بەلبەۋ كۇرەسى فەدەراتسياسىنا پرەزيدەنتى بولعان جانە قىرعىز بەن قازاق كۇرەسىن وسى فەدەراتسيانىڭ اياسىنا تارتا باستاعان گينتاۋتاس ۆيلەيتانىڭ «ساياساتى».

قازاق كۇرەسىنە كەلگەندە ءبىزدىڭ ماقساتىمىز بيىك، ارمانىمىز اسقاق ەدى.  ول ماقسات، ول ارمان قازاق كۇرەسىن وليمپيادا باعدارلاماسىنا ەنگىزۋ بولاتىن. بۇل قالىڭ قازاق جۇرتىنىڭ ماقساتى مەن ارمانى دەپ بىلەمىن.

مىنە، جوعارىداعى جايتتاردىڭ بارلىعى ءبىزدى قول قۋسىرىپ قاراپ وتىرماۋعا،  ارەكەت ەتۋگە يتەرمەلەدى. 2013 جىلدان باستاپ قر قازاق كۇرەسى فەدەراتسياسى مەن «قازاقستان بارىسى» قازاق كۇرەسىن دامىتۋ قورى بىرلەسە وتىرىپ گرۋزيا، ۋكراينا، وزبەكستان، پولشا، تۇركيا، ارگەنتينا، ۋرۋگۆاي، كانادا جانە ت.ب. ەلدەرىندە قازاق كۇرەسىنىڭ ۇلتتىق فەدەراتسيالارىن اشۋعا مۇرىندىق بولدى.  ال، قازاق كۇرەسىنىڭ ازيا ويىندارى باعدارلاماسىندا بەلبەۋ كۇرەسىنىڭ قۇرامىندا كىرۋى بىزگە جانساقتاۋ قيمىلدارىنا بارۋعا ءماجبۇر ەتتى. «دۇنيەجۇزىلىك» فەدەراتسيانىڭ باسشىلىعىمەن قازاق كۇرەسىن جەكە-دارا سپورت ءتۇرى رەتىندە دامىتۋعا، بىرلەسە ارەكەت ەتۋگە شاقىرعان بىرنەشە كەلىسسوزدەرىمىز ەش ناتيجە بەرمەگەننەن كەيىن، قازاقستان رەسپۋبليكاسى قازاق كۇرەسى فەدەراتسياسى قۇرىلتايشى، ءارى تولىققاندى مۇشە بولىپ تابىلاتىن «حالىقارالىق قازاق كۇرەسى فەدەراتسياسىن» قۇردىق. بۇل فەدەراتسيانىڭ قۇرىلتايشىلارى جانە مۇشەلەرى قاتارىندا قازاقستان، موڭعوليا، قىتاي جانە جوعارىدا اتالعان مەملەكەتتەرمەن قاتار الەمنىڭ وتىزدان استام ەلىنىڭ ۇلتتىق فەدەراتسيالارى بار. ءبىز بۇل ارەكەتىمىزبەن قايتكەن كۇندە دە قازاق كۇرەسىن دزيۋدو، كۋراش، سامبو ت.ب. سياقتى جەكە سپورت ءتۇرى، ۇلتتىق مۇرامىز رەتىندە ساقتاپ قالعىمىز كەلەدى جانە بۇل ماقساتىمىزعا جەتۋ ءۇشىن ايانباي ەڭبەك ەتەمىز. ايتا كەتەتىن جايت، وسى اتالعان ءۇش كۇرەستىڭ ۇشەۋى دە بىرىككەن كۇرەس الەمىنىڭ ۇيىمىنىڭ قۇرامىنا كىرمەي-اق، ءتىپتى كەيبىرى كىرىپ تۇرعان جەرىنەن شىعىپ كەتىپ تە ءوز جولىن، ءوز دامۋ باعىتىن تاڭداعان كۇرەس تۇرلەرى. قازىرگى تاڭدا اتالعان كۇرەستەردىڭ كەز كەلگەنىنىڭ بەدەلى بىرىككەن كۇرەس الەمىنىڭ قۇرامىنا كىرىپ وتىرعان بەلبەۋ كۇرەسىنەن باسىم بولماسا كەم ەمەس، قازاق كۇرەسىنە ۇلگى بولا الاتىنداي-اق كۇرەس تۇرلەرى.

تاسقاليەۆ «قازاقستان بارىسى»، «ەۋرازيا بارىسى»، «الەم بارىسى» تۋرنيرلەرىنىڭ كەرەمەت جوبا ەكەندىگىن ءوزى دە ايتىپتى. بۇل جوبالاردىڭ وسى جىلداردىڭ ىشىندە تەك تاسقاليەۆتىڭ عانا ەمەس قالىڭ بۇقارانىڭ دا كوڭىلىنەن شىققاندىعىن ەسكەرە وتىرىپ، باسقا بىرنارسە قوسۋدى ارتىق دەپ بىلەمىز. تەك، «كوممەرتسيالىق جوبالار» دەگەنى عانا قيسىنعا كەلمەيدى. سەبەبى، وسى جوبالاردىڭ ارقاسىندا قازاق كۇرەسى الىس-جاقىن شەتەلدەردە تىكەلەي ەفيردەن كورسەتىلىپ، وعان تولىققاندى قۇراما كوماندالار قاتىسىپ، ءتول سپورتىمىزدى ءبىراز ەل تانىپ قالدى. وسى جوبالاردى جۇزەگە اسىرۋ بارىسىندا الەمنىڭ جوعارىدا اتالعان ءبىراز ەلىندە قازاق كۇرەسىنىڭ فەدەراتسيالارى اشىلىپ، جۇمىس ىستەي باستادى. «دۇنيەجۇزىلىك «قازاق كۇرەسى» فەدەراتسياسى» ون التى جىلدان بەرى ىستەي الماعان شارۋانى اينالدىرعان ءتورت-بەس جىلدا ارتىعىمەن اتقارىپ جاتساق، ول دا وسى جوبالاردىڭ جەتىستىگى دەپ بىلگەن ءجون.

ارمان شوراەۆ

قازاقستان رەسپۋبليكاسى قازاق كۇرەسى فەدەراتسياسىنىڭ پرەزيدەنتى،

«قازاقستان بارىسى» قازاق كۇرەسىن دامىتۋ قورى قامقورلىق كەڭەسىنىڭ توراعاسى

Abai.kz