تەلەجۋرناليستەر ءۇشىن جاڭا ماۋسىم اتالاتىن الداعى كۇز مەزگىلىندە  ۇلتتىق ارنادان كورەرمەنگە جول تارتاتىن «ەنشى» زياتكەرلىك-تانىمدىق تەلەۆيزيالىق جوباسىنىڭ ايماقتىق ىرىكتەۋى قىزىلوردا قالاسىندا ءوتتى. وبلىس ورتالىعىنداعى ءبىلىم وردالارىنىڭ ءبىرى – №101 مەكتەپ-ليتسەيىندە وتكەن جوباعا وبلىس بويىنشا 127 ۇمىتكەر قاتىسۋعا نيەت بىلدىرگەن. ولاردىڭ 15-ءى ەكىنشى كەزەڭدە باق سىناۋ مۇمكىندىگىنە يە بولسا، تەلەۆيزيالىق كەزەڭگە 6 قاتىسۋشى عانا جولداما الدى.ايتا كەتەيىك، اتالمىش جوبا قازاقستان رەسپۋبليكاسى مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتى «ش. شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعى» رمقك تاپسىرىسى نەگىزىندە قولعا الىنعان ەدى. بايقاۋ بارلىعى 4 كەزەڭگە نەگىزدەلگەن. باعدارلاماعا رەسپۋبليكا بويىنشا 10-11 سىنىپ وقۋشىلارى مەن 1-2 كۋرس ستۋدەنتتەرى عانا قاتىسا الادى. ولاردىڭ ىشىنەن 48 قاتىسۋشى ىرىكتەلىپ، جولداما الۋعا مۇمكىندىگى بار. ال، ءبىلىم باسەكەسىندە قويىلاتىن سۇراقتار كوبىنەسە، ۇلتتىق سالت-داستۇرگە، تاريح پەن مادەنيەت، ادەبيەت، فوللور مەن لوگيكاعا نەگىزدەلگەن. قازاق ءتىلىنىڭ مارتەبەسىن ارتتىرىپ، ءتول ءتىلىمىزدىڭ زياتكەرلىك سايىستاعى قولدانىسىن جاڭعىرتۋ ماقساتىندا ەفيرگە شىعاتىن جوبانىڭ ىرىكتەۋ كەزەڭى ەكى بولىمنەن تۇرادى. ەرەجە بويىنشا قاتىسۋشى مۇندا 3 بلوكقا بولىنگەن تاپسىرمالاردى ورىنداۋى شارت. تەستىلەۋدەن جوعارى ۇپاي جيناعاندار ەكىنشى كەزەڭدە اۋىزشا ساۋالدارعا جاۋاپ بەرەدى. بۇعان دەيىن ىرىكتەۋ شارالارى اقتاۋ، وسكەمەن، اقتوبە، الماتى، شىمكەنت، استانا مەن ەلىمىزدىڭ وزگە دە قالالارىندا ۇيىمداستىرىلعان ەدى.

Abai.kz