بۇگىن م. اۋەزوۆ اتىنداعى اكادەميالىق دراما تەاترىندا قازاقستاننىڭ حالىق ءارتىسى، ايگىلى ءارتىس قۇمان تاستانبەكوۆپەن قوشتاسۋ ءراسىمى ءوتتى.

قوشتاسۋ راسىمىندە قر مادەنيەت جانە سپورت ءمينيسترى ارىستانبەك مۇقامەديۇلى جينالعان قاۋىمعا كوڭىل ايتىپ، ەلباسى نۇرسۇلتان نازارباەۆتىڭ كوڭىل ايتۋ حاتىن وقىپ بەردى. مينيستردەن كەيىن الماتى قالاسىنىڭ اكىمى باۋىرجان بايبەك، الماتى وبلىسى، ماڭعىستاۋ وبلىسى، باتىس قازاقستان وبلىسى اكىمدەرىنىڭ ورىنباسارلارى ايگىلى ءارتىستىڭ وتباسى مەن كورەرمەندەرىنە كوڭىل ايتتى.

تەاتردىڭ اقساقالدارى، قازاقستاننىڭ حالىق ءارتىسى ءاسانالى ءاشىموۆ پەن ءسابيت ورازباي قابىرعاسى قايىسا ونەردەگى ىنىسىمەن قوشتاسۋ ءسوزىن سويلەپ، جانىنىڭ بەيىشتە بولۋىن تىلەدى. ءاسانالى ءاشىموۆ ءبىراز ۋاقىت بۇرىن عانا اقش-تا 10 كۇندىك ءىس-ساپاردا بىرگە بولعانىن ايتىپ، «ول كەزدە ارامىزدان كەتىپ قالاتىنىن بىلمەدىك قوي. بىلسەم، قۇشاقتاپ ءسۇيىپ قالار ەدىم عوي، قۇماننىڭ جاقسى ادام ەكەنىن ەلدىڭ ءبارى بىلەدى. بارىنەن دە مەن جاقسى بىلەم، جانى سونداي تازا ادام ەدى» دەگەن وكىنىشىن ءبىلدىردى. "قىز جىبەكتى" تۇسىرگەندە ءانۋار مولدابەك ۇشەۋىمىز ءبىر بولمەدە تۇرىپ ەدىك. 22 جاستاعاعى جاپ-جاس جىگىتتى ورتاعا الىپ، ونەرىنە شىن جاناشىرلىق ءبىلدىرىپ، بىلگەنىمىزدى ۇيرەتىپ ەدىك. سودان باستاپ ونەردەگى ءىنىم، دوسىم، ساحاناداعى سەرىگىم بولدى» دەدى.

(سۋرەتتەر "sputniknews.kz" سايتىنان الىندى)

قوشتاسۋ ءراسىمىنىڭ سوڭىندا ءارتىستىڭ كينو جانە تەاترداعى رولدەرىنەن 4 مينۋتتىق ۆيدەو-روليك كورسەتىلىپ، ارنايى جوقتاۋ ايتىلدى. قۇمان تاستانبەكوۆتىڭ دەنەسى بۇگىن كەڭسايداعى قورىمعا جەرلەندى.

قازاقتىڭ تولەگەنىنىڭ رۋحى، جاساعان ونەرى، حالىق الدىنداعى وبرازى حالىقپەن بىرگە جاساي بەرمەك.

Abai.kz