تاجىكستاندا 500 مىڭ دوللار پارا الدى دەگەن شەنەۋنىك 11 جىلعا سوتتالدى
تاجىكستاننىڭ ەكونوميكالىق دامۋ مينيسترلىگىنىڭ ينۆەستيتسيانى باعدارلاۋ باسقارماسىنىڭ توراعا ورىنباسارى بولعان اسكار نۋراليزودا 11 جىلعا باس بوستاندىعىنان ايىرىلدى. وسىعان دەيىن ونىڭ 500 مىڭ دوللار پارا الىپ جاتقان جەرىنەن ۇستالعانى ايتىلعان.
دۋشانبەنىڭ سينو اۋداندىق سوتى بۇرىنعى شەنەۋنىككە قاتىستى سوت ۇكىمى 10 قاڭتاردا شىققانىن راستادى. بىراق ۇكىم ءالى زاڭدىق كۇشىنە ەنبەگەن.
نۋراليزودا بىلتىر 28 قىركۇيەكتە كوررۋپتسياعا قارسى اگەنتتىكتىڭ مالىمەتى بويىنشا، «افسونا» مەيرامحاناسىندا 490 مىڭ دوللار پارا الىپ جاتقان جەرىنەن ۇستالعان. ءۇيىن تاركىلەۋ كەزىندە تاعى دا 10 مىڭ دوللار تابىلعان.
سونىمەن بىرگە اسكار نۋراليزودا 2016-2020 جىلدارعا ارنالعان ينۆەستيتسيالىق باعدارلاماعا حاتلون وبلىسىنان قۇس فابريكاسىن دامىتۋ تارماعىن ەنگىزۋ ءۇشىن، جالوليددين بالحي دەگەن اۋدان تۇرعىنىنان 1 ميلليون دوللار پارا سۇراعان دەلىنەدى.
كوررۋپتسياعا قارسى اگەنتتىك اسكار نۋراليزودا ايەلىنە ارناپ جاڭا تۇرعىن ۇيدەن 70 مىڭ دوللار كولەمىندە جاڭا پاتەر الىپ بەرۋىن دە تالاپ ەتكەن دەيدى.
Abai.kz
