Aۆتوبۋستا قازا بولعان 52 وزبەكستاندىقتى جەرلەدى
قازاقستاننىڭ اقتوبە وبلىسىندا اۆتوبۋسقا قاتىستى توتەنشە جاعدايدا قازا بولعاندار جەرلەندى. بۇل تۋرالى ازاتتىقتىڭ وزبەك قىزمەتى (وزودليك) حابارلايدى.
بۇدان بۇرىن وزبەكستاننىڭ توتەنشە جاعدايلار بويىنشا مينيسترلىك وكىلى قازا بولعانداردىڭ اتى-جوندەرى تولىق انىقتالعانىن ايتقان. مينيسترلىك سايتىندا مارقۇمداردىڭ ءتىزىمى جاريالانعان.
قاڭتاردىڭ 18-ءى قازاقستان ارقىلى رەسەيگە وزبەكستاننان ەڭبەك ميگرانتتارىن اپارا جاتقان اۆتوبۋس ورتەنىپ كەتىپ، 52 جولاۋشى قازا بولعان.
شىمكەنت-سامارا تراسساسىندا اقتوبە قالاسىنان 320 شاقىرىم جەردە بولعان وقيعادان بەس ادام: ۇشەۋى قازاقستاندىق، ەكەۋى وزبەكستاندىق امان قالعان. قازاقستان ىشكى ىستەر مينيسترلىگى توتەنشە جاعداي "وتقا سالعىرت قاراۋدان" دەگەن بولجام ايتقان.
Abai.kz
