اقش مەكتەبىندە اتىستان ەكى وقۋشى قازا تاۋىپ، 17-ءسى جارالانعان
امەريكادا كەنتۋككي شتاتىنداعى بەنتون قالاسىنىڭ ورتا مەكتەبىنىڭ بىرىندە 15 جاستاعى ءجاسوسپىرىم سىنىپتاستارىنا وق اتقان.
شتات گۋبەرناتورى مەتت بەۆين ارنايى ءباسپاسوز ءماسليحاتى كەزىندە اتىستان ەكى وقۋشىنىڭ قازا تاپقانىن مالىمدەدى. 15 جاستاعى قىز وقيعا ورنىندا قازا تاپسا، ءبىر بوزبالا اۋرۋحانادا كوز جۇمعان. بارلىعى 17 ادام جارالانعان. ولاردىڭ 15-نە وق تيگەن.
پوليتسيا وق اتقان ءجاسوسپىرىمدى ۇستاعان. ول جايىندا ازىرگە تولىق مالىمەت جوق. بىراق قۇقىق قورعاۋ ورگاندارىنىڭ حابارلاۋىنشا، وعان قارسى قىلمىستىق ءىس قوزعالۋى مۇمكىن.
2013 جىلدان بەرى اقش مەكتەپتەرىندە قارۋ-جاراق قولدانعان 283 وقيعا تىركەلگەن.
Abai.kz
