بۇل تۋرالى امەريكالىق قارجى مينيسترلىگىنىڭ وكىلى توني سەيەگ Bloomberg اگەنتتىگىنە بەرگەن سۇحباتىندا مالىمدەگەن.

ول باياندامانى كوپشىلىك دۇرىس تۇسىنبەي قالعانىن ايتتى. باياندامانىڭ جالپىعا قولجەتىمدى ءبولىمى اشىق دەرەككوزدەرگە نەگىزدەلگەن. ال قۇپيا ساقتالاتىن بولىمىندە قۇپيا دەرەككوزدەر قولدانىلعان.

قارجى مينيسترلىگىنىڭ وكىلى بۇل ءتىزىمدى سانكتسيا رەتىندە قاراستىرۋعا بولمايتىنىن ەسكەرتتى. دەگەنمەن، سەيەگتىڭ حابارلاۋىنشا، مينيسترلىك رەسەيدىڭ جاعىمسىز ارەكەتىنە قارسى تۇرۋ ماقساتىن كوزدەيدى.

30 قاڭتاردا اقش-تىڭ قارجى مينيسترلىگى رەسەي پرەزيدەنتى ۆلاديمير ءپۋتيننىڭ سانكتسياعا ىلىگۋى مۇمكىن جاقتاستارىنىڭ ءتىزىمىن - "كرەملدىك باياناداماسىن" جاريالادى. قۇجاتتا 210 ادامنىڭ ەسىمى اتالادى. ولاردىڭ اراسىندا پۋتين اكىمشىلىگىنىڭ قىزمەتكەرلەرى، مەملەكەتتىك كورپوراتسيالار باسشىلارى، قۇققىققورعاۋ مەكەمەلەرىنىڭ جەتەكشىلەرى جانە وليگارحتار بار. بايانداما جاريالانعان سوڭ اقش قارجى ءمينيسترى ستيۆەن منۋچين وسى قۇجاتتىڭ نەگىزىندە رەسەيگە قاتىستى جاڭا شەكتەۋلەر ەنگىزىلۋى مۇمكىن ەكەندىگىن مالىمدەدى. ولاردىڭ ناقتى قانداي سانكتسيالار ەكەندىگىن مينيستر ايتقان جوق.

Abai.kz