ءتىس دارىگەرىندە كەزەكتە وتىرعام. جەكە ستوموتولوگيا، كەلۋشىلەرگە جاعدايدى جاساپ-اق قويىپتى. تەلەديدار قوسۋلى تۇر ەكەن. بىرىنەن-ءبىرى جارىسىپ ءان ايتىپ جاتىر. كەزەگىم كەپ دارىگەرگە كىرىپ كەتتىم. كۇتىپ وتىرعان جارتى ساعاتتا قانشاما اۋەن تىڭدادىم، نەلىكتەن بىرەۋى بولسىن جۇرەكتى قوزعامادى ەكەن دەگەن سۇراق تۇرىپ قالدى. سوندا بارىپ وسىدان بەس جىل بۇرىن جازعان مىسالىم ەسىمە ءتۇستى.

ول ومىرىمدەگى ءبىر تالانتتىنىڭ تاعدىرىنا ارناپ جازىلعان ەدى. ونى اتىمەن اتامايتىنمىن، ويتكەنى ونىڭ ەسىمى – مەن ءۇشىن ونەر ەدى. تۇلا بويى تۇنىپ تۇرعان ونەر. مەن ءۇشىن ومىردەگى ەڭ تالانتتى ادام دا سول بولاتىن. بىرنەشە اسپاپتىڭ قۇلاعىندا وينايتىن. ونەر تۋرالى، شىنايى ونەر تۋرالى سىرلاسىم دا سول ەدى. ونىڭ قور بولعان كۇيىن، اۋىزى تىعىندالعان تالانتىن، جۇرەككە سالماق سالعان تاعدىرىن ەشكىمگە تىلەمەيمىن.

«ۇلىدان ۇرپاق قالمايدى» دەگەندى دە سونىڭ تاعدىرىنان ءتۇسىندىم، بىراق ءبارىبىر ءبىر وكىنىش قالادى ەكەن كەۋدەدە. سول قىرشىن كەتكەن «ونەردىڭ» ومىرىنەن كەيىن قوعامعا كەرەك ازامات كورسەم، وسىنىڭ قانى قالسا ەكەن، ارتىندا ىزدەۋشىسى بولسا ەكەن دەپ، جاقسى قىزدارعا «ماقتاپ» ءجۇرۋ ادەتكە اينالدى.

ەرتەدە ءبىر بۇركىتتىڭ جۇمىرتقاسى تاۋىقتىڭ ۇياسىنا ءتۇسىپ قالىپتى. تاۋىق-انا قايدان ءبىلسىن، ءوزى باستىرادى. ۋاقىتى جەتىپ، بالاپاندار جۇمىرتقانى جارىپ شىعادى. ءوز بالاپاندارمەن بىردەي ايالاپ، ماپەلەپ وسىرەدى. بارلىق بالاپاندار بىرگە وينايدى، اتەشتەن اكەلىك قورعان، قامقورلىق كورسە، تاۋىقتان انانىڭ مەيىرىمىن سەزىنەدى. اسىر سالعان بالعىن بالالىق شاق زىماراپ وتە شىعادى. بالاپاندار وسەدى، اياققا تۇرا باستايدى.

كۇندەردىڭ كۇنىندە بۇركىتتىڭ بالاپانى ءوز بويىنداعى وزگەشەلىكتى بايقايدى. ول قوراعا ەمەس، دالاعا قارايدى، شارباققا ەمەس، تاۋعا كوز تىگەدى. تاۋىقتىڭ ءتول بالاپاندارى تاۋىق پەن اتەشتىڭ ارەكەتىنە ەلىكتەپ ەسەيەدى، قىلىعىن قايتالايدى. ال بالا-بۇركىت كوكتە قالىقتاعان قۇستارعا قارايدى. سونىسىن سەزگەن «بالاڭ-بۇركىت» ءبىر كۇنى «تاۋىق-اناعا»: «مەن اناۋ اسپانداعى الىپتارداي ۇشقىم كەلەدى، ماعان ۇشۋدى ۇيرەتشى، - دەيدى. سوندا تاۋىق-انا وعان: «سەن – تاۋىقسىڭ! تاۋىقتار ۇشا المايدى»، - دەيدى. مىنە، سولاي قىران كوكتى قيالداپ قالا بەرەدى.

ءتىس دارىگەرىنەن شىعىپ بارا جاتىپ، تەلەديدارداعى «جىلتىراعاندارعا» تاعى ءبىر كوز تاستادىم دا، ەسكە تۇسكەن مىسالىمدى قايتا جازۋ كەرەك-اۋ دەپ ويلادىم. سەبەبى، ساف اۋەنمەن تۋىپ-ءوسىپ-ولەتىن قازاققا مۋزىكانىڭ نە ەكەنىن كورسەتكىسى كەلەتىن كەي كەۋدەمسوقتاردى كورگەندە، قىراننىڭ ۇياسىنا كەزدەيسوق ءتۇسىپ قالعان تاۋىقتىڭ بالاپاندارى-اۋ دەرسىڭ. قاۋىرسىنىن قاعادى كەپ، قۇر قاعادى. ءبىر قالىقتامايدى-اۋ، قالىقتامايدى.

ايدانا شوتبايقىزى

Facebook-تەگى پاراقشاسىنان