ۇلتتىق بانك قولدانىستاعى يپوتەكالىق تۇرعىن ءۇي قارىزدارىن قايتا قارجىلاندىرۋ باعدارلاماسىن كەڭەيتۋدى قولعا الدى. قۇجاتتا الەۋمەتتىك وسال توپقا جاتاتىن ازاماتتاردى قولداۋ ءۇشىن دە تۇزەتۋلەر ەنگىزىلگەن. قازىر ۇلتتىق بانك، «نۇر وتان» پارتياسى جانە بورىشكەرلەردىڭ باسىن بىرىكتىرەتىن قوعامدىق ۇيىمدار بىرنەشە كەڭەس وتكىزىپ ءجۇر. بىرلەستىك جەتەكشىلەرى بۇل باستامانى تۇيتكىلدى ماسەلەنىڭ ءتۇيىنىن شەشۋگە جاسالعان يگى قادام دەپ سانايدى.

«بۇل باعدارلامالارعا ات سالىسىپ، ءوزىمنىڭ ۇسىنىستارىمدى كىرگىزگەنمىن «كاۋسار بۇلاق» اتىنان. مەندە الەۋمەتتىك جاعدايى تومەن جاندار وتە كوپ، مۇمكىنشىلىگى شەكتەۋلى جاندار كوپ، كوپبالالى انالار كوپ. +باعدارلامادا بولىمدەرى وتە كوپ. قازىر مىنا دوللار جونىندە بولعاننان كەيىن ەكىنشى ەتاپ دەيدى عوي ول دا كوبەيىپ وتىر. ودان كەيىن جالعا بەرۋ باعدارلاماسى ول دا ءجۇرىپ وتىر. ول 20 جىلعا پايىزسىز»، - دەيدى «كاۋسار بۇلاق» الەۋمەتتىك كومەك ورتالىعىنىڭ جەتەكشىسى ۇلداناي قامباروۆا.

قايتا قارجىلاندىرۋ باعدارلاماسىنا ەنگىزىلەتىن وزگەرىس 2016-جىلدىڭ 1- قاڭتارىنا دەيىن شەتەل ۆاليۋتاسىندا قارىز العانداردىڭ ماسەلەسىن تۇپكىلىكتى شەشۋگە مۇمكىندىك بەرەدى. قۇجات وسى ايدىڭ اياعىندا قابىلدانادى دەپ كۇتىلۋدە. قازىرگى تاڭدا قايتا قارجىلاندىرۋعا 220 ميلليارد تەڭگەنى قۇرايتىن 30 مىڭ ءوتىنىم قابىلدانعان. ونىڭ 23 مىڭنان استامى ماقۇلدانىپتى.

«25 مىڭعا جۋىق پروبلەمالىق نەسيەلەردى قايتا قارجىلاندىرۋ ءۇشىن 130 ميلليارد تەڭگە بولىنگەن. قازىرگى تاڭدا سونىڭ 24 ميلليارد تەڭگە يگەرىلمەي قالعان ەدى. ول قارجىنى ءبىز قوسىمشا بانكتەرگە قايتا بولەمىز. وسى ارقىلى قايتا قارجىلاندىرۋ قارقىنى ۇلعايادى. وعان قوسا، بۇل اقشا باعدارلاماداعى ماقۇلدانعان جانە قايتا قارجىلاندىرىلعانداردىڭ اراسىنداعى ايىرماشىلىقتى قامتۋعا سەپتەسەدى. جازعا دەيىن باردارلاما اياسىندا ماقۇلدانعان ءوتىنىم قايتا قارجىلاندىرىلادى»، - دەدى قر ۇلتتىق بانكى قارجىلىق قىزمەتتەردى ءتۇتىنۋشىلاردىڭ قۇقىقتارىن قورعاۋ جانە سىرتقى كوممۋنيكاتسيالار باسقارماسىنىڭ باسشىسى الەكساندر تەرەنتەۆ.

Abai.kz