جەتىسۋ ولكەسى قاشاننان ونەر بەسىگى بولعان. سوندىقتان دا بولار، وسى ايماقتىڭ ورتالىعى تالدىقورعاندا سالىنىپ جاتقان مۋزىكا مەكتەبىن ونەرسۇيەر قاۋىم اسىعا كۇتىپ ءجۇر.

300 ورىندىق مۋزىكا مەكتەبى قالادا جاڭادان بوي تۇزەگەن وڭتۇستىك-باتىس تۇرعىن اۋدانىندا ورنالاسقان. ەكى قاباتتى مەكتەپ وزىنە عانا ءتان ساۋلەتتىك شەشىمىمەن ەرەكشەلەنەدى، عيماراتتىڭ كەيپى امفيتەاترعا ۇقساس، 200 ورىنعا ارنالعان جەكە كونتسەرت زالى بار. مۇندا مۋزىكالىق عيماراتقا ءتان بارلىق قاجەتتىلىكتەر مەن ەرەكشەلىكتەر ەسكەرىلگەن. كەشە وسى نىساننىڭ قۇرىلىس جۇمىستارىنىڭ بارىسىن ءوز كوزىمەن كورىپ قايتقان وبلىس اكىمى ا. باتالوۆ نىسانداعى جۇمىستاردىڭ ساپاسىنا باسا نازار اۋداردى.

جالپى جاڭا وقۋ جىلىندا تالدىقورعان قالاسىندا بۇدان وزگە تاعى ەكى  - ارقايسىسى 1200 ورىندىق جالپى ءبىلىم بەرەتىن مەكتەپتەر سالىنىپ جاتىر.

قۇرىلىسشىلىق كوزى قىراعى وبلىس باسشىسى نىسانداعى ۇساق-تۇيەكتەن باستاپ ءاربىر كەمشىلىكتى قالت جىبەرمەدى. مەكتەپتەر اۋماقتارىن كوركەيتۋ جۇمىستارىنىڭ سولعىنداعىنا، عيماراتقا قويىلعان جەلدەتكىش شىلتەردىڭ، كارنيزدەردىڭ ساپاسىنا دەيىن ءمان بەرىپ، سىن-ەسكەرتپەلەرىن ايتتى.  قۇرىلىس جۇرگىزۋ بارىسىندا ۇساق-تۇيەك بولمايتىنىن، ءاربىر دەتالدىڭ دا ماڭىزدى ەكەنىن مەردىگەر ۇيىم باسشىلارىنىڭ ەستەرىنە سالدى. جاڭا مەكتەپتىڭ ءبىرى جوعارىدا اتاپ وتكەن جاڭا وڭتۇستىك-باتىس تۇرعىن اۋدانىندا بولسا، ەكىنشىسى سولتۇستىك-باتىسىندا تۇرعىزىلىپ جاتىر.

ەكىنشى مەكتەپ قۇرىلىسىنىڭ باس مەردىگەرى – «Melior Logistik»، جوبالاۋشى ۇيىم – «ارلان-جوبا قۇرىلىس» جشس. مۇندا قازىر ىشكى ارلەۋ جۇمىستارى ءجۇرىپ جاتىر.

اتالعان ءۇش نىساننىڭ دا سالىنىپ بىتەتىن مەرزىمى شىلدە ايى دەپ جوسپارلانىپ وتىر. ءبىلىم كۇنىندە بۇل ءبىلىم وشاقتارى ءوزىنىڭ العاشقى تاربيەلەنۋشىلەرىن قابىلدايتىن بولادى.

جالپى الماتى وبلىسىندا 758 مەكتەپتە 373035 بالا وقيدى، ياعني 2016 جىلمەن سالىستىرعاندا وقۋشى سانى 20 مىڭعا وسكەن. وبلىستاعى دەموگرافيالىق ءوسىمنىڭ قارقىنى ەسكەرە كەلە بىلتىرعى جىلى ءبىلىم سالاسىندا جاڭادان 35 نىسان پايدالانۋعا بەرىلدى، سونىڭ 33-ءى مەكتەپ ەكەنىن قۋانا ايتۋعا بولادى. وعان قوسا 5,2 ملرد. تەڭگەگە 24 نىسان كۇردەلى جوندەۋدەن وتكەن.

ساعىنىش نامازشاموۆا

Abai.kz